1 राजाओं 9

सुलैमान ताहीं यहोवा का दूसरा दर्शन

1 जिब सुलैमान यहोवा के भवन अर राजभवन नै बणा चुक्या, अर जो किमे उसनै करणा चाह्या था, उसनै वो कर लिया, 2 फेर यहोवा नै जिस तरियां गिबोन म्ह उस ताहीं दर्शन दिया था, उस्से तरियां ए दुसरी बार भी उस ताहीं दर्शन दिया। 3 अर यहोवा नै उसतै कह्या, "जो प्रार्थना गिड़गिड़ाहट कै गैल तन्‍नै मेरे तै करी सै, उस ताहीं मन्‍नै सुण्या सै, यो जो भवन तन्‍नै बणाया सै, उस म्ह मन्‍नै अपणा नाम सदा खात्तर राखकै उस ताहीं पवित्र करया सै; अर मेरी आँख अर मेरा मन सदा ओड़ै लाग्गे रहवैगें। 4 अर जै तू अपणे पिता दाऊद की तरियां मन की खराई अर सिधाई तै अपणे-आपनै मेरै स्याम्ही जाणकै चालदा रहवै, अर मेरे सारे हुकमां कै मुताबिक करै, अर मेरी विधियाँ अर नियमां नै मानदा रहवै, तो मै तेरा राज्य इस्राएल कै उप्पर सदा खात्तर स्थिर करुँगा; 5 जिसा मन्‍नै तेरे पिता दाऊद ताहीं वचन दिया था, ‘तेरे कुल म्ह इस्राएल की गद्दी पै विराजण आळे सदा बणे रहवैगें।’ 6 पर जै थम या थारे वंश के माणस मेरै पाच्छै चालणा छोड़ दें; अर मेरे उन हुकमां अर विधियाँ ताहीं जो मन्‍नै थारे ताहीं दिए सैं, ना मान्‍ने, अर जाकै पराए देवत्यां की उपासना करो अर उननै दण्डवत करो, 7 तो मै इस्राएल नै इस देश म्ह तै जो मन्‍नै उनतै दिया सै, काट गेरुगां अर इस भवन ताहीं जो मन्‍नै अपणे नाम कै खात्तर पवित्र करया सै, अपणी नजर तै उतार दियुँगा; अर सारे देशां के माणसां म्ह इस्राएल की उपमा दी जावैगी अर उसकी कहावत चाल्‍लैगी। 8 अर यो भवन जो ऊँच्‍चे पै रहवैगा, तो जो कोए इसके धोरै होकै चाल्‍लैगा, वो हैरान होवैगा, अर ताड़ी बजावैगा अर वे एक दुसरे तै पूछैंगे, ‘यहोवा नै इस देश अर इस भवन कै गैल इसा क्यूँ करया सै;’*9:8 मत्ती 23:38 9 फेर माणस कहवैंगे, ‘उननै अपणे परमेसवर यहोवा ताहीं जो उनके पुरखां नै मिस्र देश म्ह तै लिकाड़ ल्याया था। उसनै छोड़कै पराए देवत्यां ताहीं पकड़ लिया, अर उन ताहीं दण्डवत करया अर उनकी उपासना करी इस करकै यहोवा नै या सारी विपत्ति उनपै गेर दी।’" 10 सुलैमान नै तो यहोवा के भवन अर राजभवन दोनुआं के बणाण म्ह बीस साल लाग्गे।*9:10 मन्दर के बणाण खात्तर 20 साल (1 राजाओं 6.38) अपणा महल बणाण खात्तर 13 साल (1 राजाओं 7.1). 11 फेर सुलैमान नै सोर के राजा हीराम ताहीं जिसनै उसतै मन मान्‍ने देवदार अर सनोवर की लाकड़ी अर सोन्‍ना दिया था, गलील देश के बीस नगर दिए। 12 जिब हीराम नै सोर तै जाकै उन नगरां ताहीं देख्या, जो सुलैमान नै उसतै दिए थे, फेर वे उस ताहीं आच्छे न्ही लाग्गे। 13 फेर उसनै कह्या, "हे मेरे भाई, ये किसे नगर तन्‍नै मेरे ताहीं दिए सैं?" अर उसनै उनका नाम कबूल *9:13 कबूल बेकारदेश धरया। अर योए नाम आज कै दिन ताहीं पड्या सै। 14 फेर हीराम नै राजा कै धोरै एक सौ बीस किक्‍कार सोन्‍ना भेज्या*9:14 लगभग 4 टन सोन्‍ना था। 15 राजा सुलैमान नै माणसां ताहीं जो बेगारी पै राख्या, इसकी जरूरत या थी, के यहोवा का अर अपणा भवन बणावै, अर मिल्‍लो अर यरुशलेम की शहरपनाह अर हासोर, मगिद्दो अर गेजेर नगरां ताहीं दृढ़ करै। 16 गेजेर पै तो मिस्र के राजा फिरौन नै चढ़ाई करकै उस ताहीं ले लिया था अर आग लगाकै फूँक दिया, अर उस नगर म्ह रहणआळे कनानियाँ ताहीं मार गेरया अर, उस ताहीं अपणी बेट्टी सुलैमान की राणी का निज हिस्सा करकै दिया था, 17 आखर सुलैमान नै गेजेर अर नीच्‍चै आळे बेथोरोन नगर, 18 बालात अर तामार ताहीं जो जंगळ म्ह सैं, दृढ़ करया, ये तो देश म्ह सैं। 19 फेर सुलैमान के जितने भण्डार आळे नगर थे, अर उसके रथां अर सवारां के नगर, उन ताहीं बल्के जो किमे सुलैमान नै यरुशलेम, लबानोन अर अपणे राज्य के सारे देशां म्ह बणाणा चाह्या, उन सारया ताहीं उसनै दृढ़ करया। 20 एमोरी, हित्ती, परिज्जी, हिब्बी अर यबूसी जो रहगे थे, जो इस्राएली न्ही थे, 21 उनके वंश जो उनकै बाद देश म्ह रहगे, अर उननै इस्राएली सत्यानाश ना कर सके, उन ताहीं तो सुलैमान नै दास करकै बेगारी पै राख्या, अर आज ताहीं उनकी वाए दशा सै। 22 पर इस्राएलियाँ म्ह तै सुलैमान नै किसे ताहीं दास न्ही बणाया; वे तो योद्धा अर उसके कर्मचारी, उसके हाकिम, उसके सरदार, अर उसके रथां, अर सवारां के प्रधान होए।

23 जो खास हाकिम सुलैमान के काम्मां कै उप्पर ठहरकै काम करण आळयां पै राज करैं थे, ये पाँच सौ पचास थे।

24 जिब फिरौन की बेट्टी दाऊदपुर तै अपणे उस भवन ताहीं आगी, जो सुलैमान नै उसकै खात्तर बणाया था, फेर उसनै मिल्‍लो नगर*9:24 मिल्‍लो सहायक छात ताहीं बणाया।

25 सुलैमान उस वेदी पै जो उसनै यहोवा कै खात्तर बणाई थी, हर साल तीन बार होमबलि अर मेलबलि चढ़ाया करै था अर साथ ए उस वेदी पै जो यहोवा कै धोरै थी, धूप जळाया करै था, इस तरियां उसनै उस भवन ताहीं त्यार कर दिया।

26 फेर राजा सुलैमान नै एस्योनगेबेर नगर म्ह जो एदोम देश म्ह लाल समुन्दर कै किनारे एलोत कै धोरै सै, जहाज बणाए। 27 अर जहाजां म्ह हीराम नै अपणे अधिकार के मल्‍लाहां ताहीं, जो समुन्दर की जानकारी राक्खै थे, सुलैमान के सेवकां कै गैल भेज दिया। 28 उननै ओपीर*9:28 ओपीर या जगहां सोन्‍ना खात्तर जाणी जावै थी (अय्यूब 28:16; भजन संहिता 45:9; यशायाह 13:12) ताहीं जाकै ओड़ै तै च्यार सौ बीस किक्‍कार सोन्‍ना*9:28 14 टन सोन्‍ने तै ज्यादा, राजा सुलैमान ताहीं ल्याकै दिया।