1 राजाओं 17

एलिय्याह के काम की शरुआत

1 तिशबी*17:1 तिशबी नगर एलिय्याह नबी जो गिलाद*17:1 गिलाद क्षेत्र का रहण आळा था उसनै अहाब तै कह्या, "इस्राएल का परमेसवर यहोवा जिसकै स्याम्ही मै हाजिर रहूँ सूं, उसके जीवन की कसम इन साल्‍लां म्ह मेरे बिना कहे, ना तो मिह बरसैगा, अर ना ओस पड़ैगी।"*17:1 लूका 4:25, याकूब 5:17, प्रकाशितवाक्य 11:6 2 फेर यहोवा का यो वचन उसकै धोरै पोहच्या, 3 "उरै तै चालकै पूरब की और जा अर करीत नाम की नदी म्ह जो यरदन नदी के पूर्व म्ह सै छिप जा। 4 उसे नदी का पाणी तू पिया कर, अर मन्‍नै काग्याँ ताहीं हुकम दिया सै के वे तन्‍नै ओड़ै खुवावैं।" 5 यहोवा का यो वचन मानकै वो यरदन के पूर्व म्ह करीत नाम की नदी म्ह जाकै छुप्या रह्या। 6 अर सबेरै अर साँझ नै काग उसकै धोरै रोट्टी अर माँस ल्याया करैं थे अर वो नदी का पाणी पिया करै था। 7 कुछ दिनां कै बाद उस देश म्ह बारिस ना होण कै कारण नदी सूखगी। 8 फेर यहोवा का यो वचन उसकै धोरै पोहच्या, 9 "चालकै सीदोन के सारफत नगर म्ह जाकै ओड़ैए रह। सुण, मन्‍नै ओड़ै की एक बिधवा तै तेरे ताहीं खुवाण का हुकम दिया सै।"*17:9 लूका 4:26 10 आखर म्ह वो ओड़ै तै चाल पड्या, अर सारफत नगर म्ह गया; नगर के फाटक कै धोरै पोहचकै उसनै के देख्या के, एक बिधवा लाकड़ी चुगण लागरी सै, उसनै बुलाकै उसतै कह्या, "किसे बरतन म्ह मेरै पीण खात्तर थोड़ा पाणी ले आ।" 11 जिब वा लेण जावै थी, तो उसनै उसतै रुक्‍का मारकै कह्या, "अपणे हाथ म्ह एक टुकड़ा रोट्टी भी मेरै खात्तर ले आ।" 12 उसनै कह्या, "तेरे परमेसवर यहोवा के जीवन की कसम मेरै धोरै एक भी रोट्टी न्ही सै सिर्फ घड़े म्ह मुट्ठी भर मैदा अर कुप्पी म्ह थोड़ा-सा तेल सै, अर मै एक-दो लाकड़ी चुगण खात्तर जाऊँ सूं के अपणे अर अपणे बेट्टे कै खात्तर उसनै पकाऊँ, अर हम उसनै खावां, फेर मर ज्यां।" 13 एलिय्याह नै उसतै कह्या, "मत डर; जाकै अपणी बात कै मुताबिक कर, पर पैहले मेरै खात्तर एक छोट्टी सी रोट्टी बणाकै मेरै धोरै ले आ, फेर इसकै बाद अपणे अर अपणे बेट्टे कै खात्तर बणाईये। 14 क्यूँके इस्राएल का परमेसवर यहोवा न्यू कहवै सै, के जिब तक यहोवा धरती पै मिह ना बरसावैगा जिब ताहीं ना तो उस घड़े का मैद्दा खतम होवैगा, अर ना उस कुप्पी का तेल घटैगा।" 15 फेर वा चली गई, अर एलिय्याह के वचन कै मुताबिक करया, जिब तै वो अर वा बिरबान्‍नी अर उसका घरान्‍नां घणे दिनां ताहीं खान्दे रहे। 16 यहोवा के उस वचन कै मुताबिक जो उसनै एलिय्याह के जरिये कह्या था, ना तो उस घड़े का मैद्दा खतम होया, अर ना उस कुप्पी का तेल घट्या।

17 कुछ बखत कै बाद उस जनान्‍नी का बेट्टा जो घर की मालकिन थी, रोगी होया, अर उसका रोग उरै ताहीं बढ़ ग्या के उसका साँस लेणा बन्द होग्या। 18 फेर वा एलिय्याह तै कहण लाग्गी, "हे परमेसवर के जन मन्‍नै तेरा के अपराध करया? के तू ज्यांतै मेरै उरै आया सै के मेरे बेट्टे की मौत का कारण हो अर मेरे पाप की याद दिलावै?" 19 उसनै उसतै कह्या, "अपणा बेट्टा मन्‍नै दे;" फेर वो उसनै उसकी गोद म्ह तै लेकै उस अटारी पै लेग्या जित्त वो खुद रहवै था, अर अपणी खाट पै लिटा दिया। 20 फेर उसनै यहोवा ताहीं पुकारकै कह्या, "हे मेरे परमेसवर यहोवा! के तू इस बिधवा का बेट्टा मारकै जिसकै उरै मै टिक्या सूं, इसपै भी मुसीबत ले आया सै?" 21 फेर वो बाळक पै तीन बार पसर ग्या अर यहोवा ताहीं पुकारकै कह्या, "हे मेरे परमेसवर यहोवा! इस बाळक का जी इस म्ह फेर डाल दे।" 22 एलिय्याह की या बात यहोवा नै सुण ली, अर बाळक का जी उस म्ह फेर आ ग्या अर वो जी उठ्या। 23 फेर एलिय्याह बाळक नै अटारी पै तै तळै घर म्ह लेग्या, अर एलिय्याह नै यो कहकै उसकी माँ कै हाथ म्ह सौंप दिया, "देख तेरा बेट्टा जिन्दा सै।" 24 जनान्‍नी नै एलिय्याह तै कह्या, "इब मै पक्‍का जाण गई सूं के तू परमेसवर का जन सै, अर यहोवा का जो वचन तेरे मुँह तै लिकड़ै सै, वो सच्‍ची होवै सै।"