1 राजाओं 4

सुलैमान का राजप्रबन्ध अर महानता

1 राजा सुलैमान तो सारे इस्राएल कै उप्पर राजा नियुक्त होया था। 2 अर उसके हाकिम ये थे, यानिके सादोक का बेट्टा अजर्याह याजक, 3 अर शीशा के बेट्टे एलीहोरोप अर अहिय्याह राजसी आधिकारिक थे। अहीलूद का बेट्टा यहोशापात, इतिहास का लेखक था। 4 फेर यहोयादा का बेट्टा बनायाह प्रधान सेनापति था, अर सादोक अर एब्यातार याजक थे! 5 नातान का बेट्टा अजर्याह भण्डारीयाँ कै उप्पर था, अर नातान का बेट्टा जाबूद याजक, अर राजा का दोस्त भी था। 6 अहीशार राज घरान्‍ने कै उप्पर था, अर अब्दा का बेट्टा अदोनीराम बेगारां कै उप्पर मुखिया था।

7 अर सुलैमान के बारहा भण्डारी थे, जो सारे इस्राएलियाँ के अधिकारी होकै राजा अर उसके घरान्‍ने कै खात्तर भोजन का बन्दोबस्त करैं थे। एक-एक माणस हर साल अपणे-अपणे नियुक्त महिन्‍ने म्ह बन्दोबस्त करै था। 8 उनके नाम ये थे, यानिके एप्रैम के पहाड़ी देश म्ह बेन्हूर। 9 अर माकस, शाल्बीम, बेतशेमेश अर एलोन-बेतानान म्ह बेन्देकेर था। 10 अरुब्बोत म्ह बेन्हेसेद जिसके हक म्ह सोको अर हेपेर का सारा देश था। 11 दोर के सारे ऊँच्‍चे देश म्ह बेन-अबीनादब जिसकी जनान्‍नी सुलैमान की बेट्टी तापत थी। 12 अहीलूद का बेट्टा बाना जिसके हक म्ह तानाक, मगिद्दो अर बेतशान का वो सारा देश था, जो सारतान कै धोरै अर यिज्रेल कै तळै अर बेतशान तै आबेल-महोला ताहीं यानिके योकमाम की परली और तक सै। 13 अर गिलाद शहर के रामोत म्ह बेनगेबेर था, जिसके हक म्ह मनश्शेई याईर के गिलाद के गाम थे, यानिके इस्से कै हक म्ह बाशान के अर्गोब का देश था, जिस म्ह शहरपनाह अर पीतळ के बेंड़े आळे साठ बड़े-बड़े नगर थे। 14 इद्दो के बेट्टे अहीनादाब के हाथ म्ह महनैम था। 15 नप्ताली म्ह अहीमास था, जिसनै सुलैमान की बासमत नाम की बेट्टी ताहीं ब्याह लिया था। 16 आशेर अर आलोत म्ह हूशै का बेट्टा बाना, 17 इस्साकार म्ह पारुह का बेट्टा यहोशापात, 18 अर बिन्‍यामीन म्ह एला का बेट्टा शिमी था। 19 ऊरी का बेट्टा गेबेर गिलाद म्ह यानिके एमोरियां के राजा सीहोन अर बाशान के राजा ओग कै देश म्ह था, इस सारे देश म्ह वोए अधिकारी था। 20 यहूदा अर इस्राएल के माणस घणे थे, वे समुन्दर तट पै के रेत के कणां की तरियां घणे थे, अर खान्दे-पीन्दे अर आनन्द करदे रहे।

21 सुलैमान तो महानद तै लेकै पलिश्तियाँ के देश, अर मिस्र की सीमा ताहीं के सारे राज्याँ कै उप्पर राज करै था अर उनके माणस सुलैमान के जीवन भर भेंट ल्यान्दे, अर उसके अधीन रहवैं थे।

22 सुलैमान की रसोई म्ह एक दिन म्ह इतणा बणै था, यानिके तीस कोर*4:22 तीस कोर 15,000 किलोग्राम मैद्दा, साठ कोर*4:22 साठ कोर 30,000 किलोग्राम आटा, 23 दस त्यार करे होए बळध अर चराईयाँ म्ह तै बीस बळध अर सौ भेड़-बकरी अर इननै छोड़ हिरण, चिकारे, यखमूर अर त्यार करे होए पक्षी। 24 क्यूँके फरात के इस पार के सारे देश पै यानिके तिप्सह तै लेकै गाज़ा ताहीं जितने राजा थे, उन सारया पै सुलैमान प्रभुता करै, अर अपणे च्यांरु और के सारे रहण आळयां तै मेल राक्खै था। 25 अर दान तै बेर्शेबा तक के सारे यहूदी अर इस्राएली अपणी-अपणी दाखलता अर अंजीर के दरखत तळै सुलैमान के जीवन भर निडर रहवैं थे। 26 फेर उसके रथ के घोड्या कै खात्तर सुलैमान के चाळीस हजार रथ थे, अर उसके बारहा हजार घुड़सवार थे। 27 अर वे भण्डारी अपणे-अपणे महिन्‍ने म्ह राजा सुलैमान कै खात्तर अर जितने उसकी मेज पै आवैं थे, उन सारया कै खात्तर खाणे का बन्दोबस्त करैं थे, किमे चीज की कमी होण न्ही पावै थी। 28 घोड्या अर तगाजै तै चाल्‍लण आळे घोड्या कै खात्तर जौ अर पुआळ जित्त जरूरत होवै थी ओड़ै हुकम कै मुताबिक एक-एक माणस पोहचाया करै था।

29 अर परमेसवर नै सुलैमान ताहीं बुद्धि दी, अर उसकी समझ घणीए बढ़ाई, अर उसके हृदय म्ह समुन्दर तट के रेत के कणां कै बराबर अनगिणत गुण दिए। 30 अर सुलैमान की बुद्धि पूर्व देश के सारे निवासियां अर मिस्रियाँ की भी बुद्धि तै बढ़कै बुद्धि थी। 31 वो तो और सारे माणसां तै यानिके एतान, एज्रेही अर हेमान, अर माहोल के बेट्टे कलकोल, अर दर्दा तै भी घणा बुद्धिमान था अर उसकी चर्चा च्यांरु और की सारी जात्तां म्ह फैलगी। 32 उसनै तीन हजार नीतिवचन कहे, अर उसके एक हजार पाँच गीत भी सैं। 33 फेर उसनै लबानोन के देवदारुआं तै लेकै दीवार म्ह तै उगदे होए जूफा ताहीं के सारे दरखतां की चर्चा अर पशु पक्षियां अर रेंगणआळे जन्तुआं अर मछलियाँ की चर्चा करी। 34 अर देश-देश के माणस धरती के सारे राजयां की और तै जिननै सुलैमान की बुद्धि की कीर्ति सुणी थी, उसकी बुद्धि की बात सुणण खात्तर आया करैं थे।