1 राजाओं 21

नाबोत की हत्या और परमेसवर का छो

1 इसके बाद नाबोत नाम के एक यिज्रेली की एक दाख की बारी सामरिया के राजा अहाब के राजभवन कै धोरै यिज्रेल म्ह थी। 2 इन बात्तां कै बाद कुछ दिनां कै बाद अहाब नै नाबोत तै कह्या, "तेरी दाख की बारी मेरे घर कै धोरै सै, तू उसनै मन्‍नै दे के मै उस म्ह साग-पात की बारी लगाऊँ; अर मै उसके बदलै म्ह तन्‍नै उसतै आच्छी एक वाटिका दियुँगा, न्ही तो तेरी इच्छा हो तो मै तन्‍नै उसकी कीमत दे दियुँगा।" 3 नाबोत नै अहाब तै कह्या, "यहोवा ना करै के मै अपणे पुरखां का निज हिस्सा तन्‍नै दियुँ!" 4 यिज्रेल नाबोत के इस वचन कै कारण "मै तन्‍नै अपणे पुरखां का निज हिस्सा न्ही दियुँगा," अहाब उदास अर नाराज होकै अपणे घर गया, अर बिछोणे पै लेट ग्या अर मुँह फेर लिया, अर किमे न्ही खाया।

5 फेर उसकी पत्नी ईजेबेल नै उसकै धोरै आकै पूच्छया, "तेरा मन क्यूँ इसा उदास सै के तू कुछ खान्दा न्ही?" 6 उसनै कह्या, "कारण यो सै, के मन्‍नै यिज्रेली नाबोत तै कह्या ‘रुपया लेकै मन्‍नै अपणी दाख की बारी दे, न्ही तो जै तू चावै तो मै उसकै बदलै दुसरी दाख की बारी दियुँगा’; अर उसनै कह्या, ‘मै अपणी दाख की बारी तन्‍नै न्ही दियुँगा।’" 7 उसकी पत्नी ईजेबेल नै उसतै कह्या, "तू इस्राएल पै राज करै सै के न्ही? उठकै खाणा खा; अर तेरा मन आनन्दित हो; यिज्रेली नाबोत की दाख की बारी मै तन्‍नै दीवा दियुँगी।"

8 फेर उसनै अहाब कै नाम तै चिट्ठी लिखकै उसकी अंगूठी की छाप लगाकै, उन पुरनियां अर रईसां कै धोरै भेज दी जो उसे नगर म्ह नाबोत के पड़ोस म्ह रहवैं थे। 9 उस चिट्ठी म्ह उसनै यो लिख्या, "लोगां नै कठ्ठा करो, अर नाबोत नै माणसां कै स्याम्ही ऊँच्‍ची जगहां पै बिठाणा। 10 फेर दो नीच माणसां नै उसकै स्याम्ही बिठाणा जो साक्षी देकै उसतै कहवै, ‘तन्‍नै परमेसवर अर राजा दोन्‍नु की निन्‍दा करी।’ फेर थम उसनै बाहर ले जाकै उसपै पथराव करियो, के वो मर जावै।" 11 ईजेबेल की चिट्ठी म्ह के हुकम कै मुताबिक नगर म्ह रहणआळे पुरनियां अर रईसां नै उपवास का प्रचार करया, 12 अर नाबोत ताहीं माणसां कै स्याम्ही उपवास खात्तर ऊँच्‍ची जगहां पै बिठाया। 13 फेर दो नीच माणस आकै उसकै स्याम्ही बैठगे; अर उन नीच माणसां नै माणसां कै स्याम्ही नाबोत कै खिलाफ या गवाई दी, "नाबोत नै परमेसवर अर राजा दोन्‍नु की निन्‍दा करी।" इसपै उननै उस ताहीं नगर*21:13 यिज्रेल का शहर तै बाहर ले जाकै उसपै पथराव करया, अर वो मर ग्या। 14 फेर उननै ईजेबेल कै धोरै यो सन्देसा भेज्या के नाबोत पथराव करकै मारया गया सै।

15 यो सुणदे के नाबोत पथराव करकै मार गेरया गया सै, ईजेबेल नै अहाब तै कह्या, "उठकै यिज्रेली नाबोत की दाख की बारी नै जिसतै उसनै तेरे ताहीं रुपया लेकै देण तै भी इन्कार करया था अपणे हक म्ह ले, क्यूँके नाबोत जिन्दा न्ही पर वो मर ग्या सै।" 16 यिज्रेली नाबोत की मौत की खबर पान्दे अहाब उसकी दाख की बारी अपणे हक म्ह लेण खात्तर ओड़ै जाण नै उठ खड्या होया।

17 फेर यहोवा का यो वचन तिशबी कै नगर एलिय्याह कै धोरै पोहच्या, 18 "चाल, सामरिया म्ह रहणआळे इस्राएल के राजा अहाब तै मिलण नै जा; वो तो नाबोत की दाख की बारी म्ह सै, उसनै अपणे हक म्ह लेण नै वो ओड़ै गया सै। 19 अर उसनै न्यू कहिये, के यहोवा न्यू कहवै सै, ‘के तन्‍नै घात करया, अर अधिकारी भी बण बैठ्या?’ फेर तू उसतै न्यू भी कहिये, के यहोवा न्यू कहवै सै, ‘जिस जगहां पै कुत्याँ नै नाबोत का लहू चाट्या, उसे जगहां पै कुत्ते तेरा भी लहू चाटैंगे।’"

20 एलिय्याह तै देखकै अहाब नै कह्या, "हे मेरे दुश्मन! के तन्‍नै मेरा बेरा लगाया सै?" उसनै कह्या, "हाँ, लाग्या तो सै; अर इसका कारण यो सै, के जो यहोवा की नजर म्ह बुरा सै, उसनै करण कै खात्तर तन्‍नै अपणे ताहीं बेच दिया सै। 21 इस खात्तर मै तेरे पै इसी विपत्ति गेरुगां, के तन्‍नै पूरी तरियां तै मिटा दियुँगा; अर तेरे घर के एक-एक छोरे नै अर के कैदी, के आजाद इस्राएल म्ह हर एक रहणआळे नै भी नाश कर दियुँगा। 22 अर मै तेरा घरान्‍नां नबात के बेट्टे यारोबाम, अर अहिय्याह के बेट्टे बाशा का जिसा कर दियुँगा; ज्यांतै के तन्‍नै मेरै ताहीं क्रोधित करया सै, अर इस्राएल पै तै पाप करवाया सै। 23 अर ईजेबेल कै बारै म्ह यहोवा न्यू कहवै सै, ‘यिज्रेल के किले कै धोरै कुत्ते ईजेबेल नै खा लेगें।’ 24 अहाब का जो कोए नगर म्ह मर ज्यागा उसनै कुत्ते खा लेगें; अर जो कोए मैदान म्ह मर ज्यागा उसनै अकास के पंछी खा जावैंगे।"

25 सचमुच अहाब की तरियां और कोए ना था जिसनै अपणी पत्नी ईजेबेल के उकसाण पै वो काम करण ताहीं जो यहोवा की नजर म्ह बुरा सै, अपणे ताहीं बेच दिया था। 26 वो तो उन एमोरियां की तरियां जिन ताहीं यहोवा नै इस्राएलियाँ कै स्याम्ही देश तै लिकाड्या था घणे घिनोणे काम करै था, यानिके मूरतां की उपासना करण लाग्या था।

27 एलिय्याह के ये वचन सुणकै अहाब नै अपणे कपड़े पाड़े, अर अपणी देह पै टाट लपेटकै उपवास करण अर टाट ओढ़े पड्या रहण लाग्या, अर दबे पाँयां चालण लाग्या। 28 अर यहोवा का यो वचन तिशबी एलिय्याह कै धोरै पोहच्या, 29 "के तन्‍नै देख्या सै अहाब मेरै स्याम्ही नम्र बणग्या सै? इस कारण के वो मेरै स्याम्ही नम्र बणग्या सै मै वा विपत्ति उसके जिन्दे जी उसपै न्ही गेरुगां पर उसके बेट्टे के दिनां म्ह मै उसके घरान्‍ने पै वा विपत्ति भेज्जूँगा।"