1 राजाओं 22

अहाब की मौत

1 तीन साल ताहीं अरामी अर इस्राएली बिना युद्ध के रहे। 2 तीसरे साल म्ह यहूदा का राजा यहोशापात इस्राएल के राजा कै धोरै गया। 3 फेर इस्राएल के राजा नै अपणे कर्मचारियाँ तै कह्या, "के थमनै बेरा सै, के गिलाद का रामोत म्हारा सै? फेर हम क्यूँ चुपचाप रहवां अर उसनै अराम के राजा कै हाथ तै क्यूँ न्ही खोस लेन्दे?" 4 अर उसनै यहोशापात तै पूच्छया, "के तू मेरै गैल गिलाद के रामोत तै लड़ण खात्तर जावैगा?" यहोशापात नै इस्राएल के राजा ताहीं जवाब दिया, "जिसा तू सै उसा मै भी सूं। जिसी तेरी प्रजा सै उसीए मेरी भी प्रजा सै, अर जिसे तेरे घोड़े सैं उसेए मेरे भी घोड़े सैं।"

5 फेर यहोशापात नै इस्राएल के राजा तै कह्या, "आज यहोवा की इच्छा पता कर ल्यां।" 6 फेर इस्राएल के राजा नै नबियाँ ताहीं जो कोए च्यार सौ माणस थे कठ्ठा करकै उनतै पूच्छया, "के मै गिलाद के रामोत तै युद्ध करण कै खात्तर चढ़ाई करुँ, या रुक्या रहूँ?" उननै जवाब दिया, "चढ़ाई कर: क्यूँके प्रभु उसनै राजा कै हाथ म्ह कर देगा।" 7 पर यहोशापात नै पूच्छया, "के उरै यहोवा का भी और कोए नबी न्ही सै जिसतै हम पूछ ल्यां?" 8 इस्राएल के राजा नै यहोशापात तै कह्या, "हाँ, यिम्ला का बेट्टा मीकायाह एक माणस और सै जिसके जरिये हम यहोवा तै पूछ सकां सां? पर मै उसतै नफरत करुँ सूं, क्यूँके वो मेरै बारै म्ह कल्याण की न्ही बलके नुकसान की ए भविष्यवाणी करै सै।" 9 यहोशापात नै कह्या, "राजा इसा ना कहवै।" फेर इस्राएल के राजा नै एक हाकिम ताहीं बुलवाकै कह्या, "यिम्ला के बेट्टे मीकायाह नै फुर्ती तै ले आ।" 10 इस्राएल का राजा अर यहूदा का राजा यहोशापात, अपणे-अपणे राजवस्त्र पहरे होए सामरिया के फाटक म्ह एक खुल्‍ली जगहां म्ह अपणे-अपणे सिंहासन पै बैठ्ठै थे अर सारे नबी उनकै स्याम्ही भविष्यवाणी करैं थे। 11 फेर कनाना के बेट्टे सिदकिय्याह नै लोहे के सींग बणाकै कह्या, "यहोवा न्यू कहवै सै, ‘इनतै तू अरामियां ताहीं मारदे-मारदे नाश कर देगा।’" 12 अर सारे नबियाँ नै इसे तरियां की भविष्यवाणी करकै कह्या, "गिलाद के रामोत पै चढ़ाई कर अर तू विजय हो; क्यूँके यहोवा उसनै राजा कै हाथ म्ह कर देगा।"

13 अर जो दूत मीकायाह ताहीं बुलाण गया था उसनै उसतै कह्या, "सुण, नबी एके मुँह तै राजा कै बारै म्ह शुभ वचन कहवैं सैं तो तेरी बात उन म्ह तै एक नबी की बात जिसी हों; तू भी शुभ वचन कहिये।" 14 मीकायाह नै कह्या, "यहोवा के जीवन की कसम जो कुछ यहोवा मेरै ताहीं कहवै, वोए मै कहूँगा।" 15 जिब वो राजा कै धोरै आया, फेर राजा नै उसतै पूछ्या, "हे मीकायाह! के हम गिलाद के रामोत तै युद्ध करण कै खात्तर चढ़ाई करां या रुके रहवां?" उसनै उस ताहीं जवाब दिया, "हाँ, चढ़ाई कर अर तू विजय हो; अर यहोवा उसनै राजा कै हाथ म्ह कर दे।" 16 राजा नै उसतै कह्या, "मन्‍नै कितनी बार तेरे ताहीं कसम धरा कै चिताणा होवैगा, के तू यहोवा नै याद करकै मेरै ताहीं सच कह।" 17 मीकायाह नै कह्या, "मन्‍नै सारा इस्राएल बिना पाळी की भेड़-बकरियाँ की तरियां पहाड़ां पै; तित्तर-बितर दिखाई पड्या, अर यहोवा का यो वचन आया, ‘उनका कोए पाळी न्ही सैं; आखर वे अपणे-अपणे घर सही-सलामत बोहड़ जावैं।*22:17 मत्ती 9:36, मरकुस 6:34’" 18 फेर इस्राएल के राजा नै यहोशापात तै कह्या, "के मन्‍नै तेरै ताहीं न्ही कह्या था, के वो मेरै बारै म्ह कल्याण की न्ही नुकसान की भविष्यवाणी करैगा।" 19 फेर मीकायाह नै कह्या, "इस कारण तू यहोवा का यो वचन सुण! मन्‍नै सिंहासन पै विराजमान यहोवा अर उसकै धोरै ओळी-सोळी खड़ी होई सुर्ग की सारी सेना दिखाई दी सै।*22:19 प्रकाशितवाक्य 4:2, 4:9-10, 5:1, 7:13, 6:16, 7:10, 7:15, 19:4, 21:5 20 फेर यहोवा नै पूच्छया, ‘अहाब नै कौण इसा बहकावैगा, के वो गिलाद के रामोत पै चढ़ाई करण आवै अर वो मारया जावै?’ फेर किसे नै कुछ, अर किसे नै कुछ कह्या। 21 आखर म्ह एक आत्मा धोरै आकै यहोवा कै स्याम्ही खड़ी होई, अर कहण लाग्गी, ‘मै उसनै बहकाऊँगी’ यहोवा नै पूच्छया, ‘किस तरियां तै?’ 22 उसनै उत्तर दिया, ‘मै जाकै उसके सारे नबियाँ म्ह समाकै उनतै झूठ बुलवाऊँगी।’ यहोवा नै कह्या, ‘तेरा उस ताहीं बहकाणा सफल होवैगा, जाकै इसाए कर।’ 23 तो इब सुण यहोवा नै तेरे इन सारे नबियाँ कै मुँह म्ह एक झूठ बोलण आळी आत्मा बिठाई सै, अर यहोवा नै तेरै बारै म्ह नुकसान की बात कही सै।"

24 फेर कनाना के बेट्टे सिदकिय्याह नै मीकायाह कै धोरै जा, उसकै गाल पै थप्पड़ मारकै पूच्छया, "यहोवा का आत्मा मन्‍नै छोड़कै तेरे तै बात करण नै कड़ै गया?" 25 मीकायाह नै कह्या, "जिस दिन तू छिपण कै खात्तर कोठड़ी तै कोठड़ी म्ह भाज्जैगा, फेर तन्‍नै बेरा पाट्टैगा।" 26 फेर इस्राएल के राजा नै कह्या, "मीकायाह नै नगर के हाकिम आमोन अर योआश राजकुमार कै धोरै ले जा; 27 अर उनतै कह, ‘राजा न्यू कहवै सै, के इसनै जेळ म्ह गेरो, अर जिब ताहीं मै सही-सलामत ना आऊँ, तब ताहीं इसनै दुख की रोट्टी अर पाणी दिया करो।’" 28 अर मीकायाह नै कह्या, "जै तू कदे सही-सलामत बोहड़ै, तो जाण लिए के यहोवा नै मेरे जरिये न्ही कह्या।" फेर उसनै कह्या, "हे माणसों थम सारे के सारे सुण ल्यो।" 29 फेर इस्राएल के राजा अर यहूदा के राजा यहोशापात दोनुआ नै गिलाद के रामोत पै चढ़ाई करी। 30 अर इस्राएल के राजा नै यहोशापात तै कह्या, "मै तो भेष बदलकै रणभूमि म्ह जाऊँगा, पर तू अपणे ए कपड़े पैहरे रहिये।" फेर इस्राएल का राजा भेष बदलकै युद्ध भूमि म्ह गया। 31 अराम के राजा नै तो अपणे रथां के बत्तीस प्रधानां ताहीं हुकम दिया था, "ना तो छोट्टे तै लड़ो अर ना बड़े तै, सिर्फ इस्राएल के राजा तै युद्ध करो।" 32 आखर जिब रथां के प्रधानां नै यहोशापात ताहीं देख्या, फेर कह्या, "जरुर इस्राएल का राजा वोए सै।" अर वे उस्से तै युद्ध करण नै मुड़े; फेर यहोशापात चिल्‍ला उठ्या। 33 यो देखकै के वो इस्राएल का राजा न्ही सै, रथां के प्रधान उसका पिच्छा छोड़कै बोहड़गे। 34 फेर किसे नै अटकळ तै एक तीर चलाया अर वो इस्राएल के राजा के झिलम अर निचले कपड़यां कै बीच म्ह धस ग्या; फेर उसनै अपणे सारथी तै कह्या, "मै घायल होग्या सूं ज्यांतै रथ मोड़कै मन्‍नै सेना म्ह तै बाहर लिकाड़ ले चाल।"

35 अर उस दिन युद्ध बढ़दा गया अर राजा अहाब अपणे रथ म्ह औरां कै भरोसै अरामियां कै स्याम्ही खड्या रह्या, अर साँझ तक मर ग्या; अर उसके घाव का लहू बहकै रथ के पायदान म्ह भरग्या। 36 सूरज डूबदे होए सेना म्ह या पुकार होई, "हर एक अपणे नगर अर अपणे देश नै बोहड़ जावैं।" 37 जिब राजा मर ग्या, फेर सामरिया ताहीं पोहचाया गया अर सामरिया म्ह उस ताहीं माट्टी दी गई। 38 अर यहोवा के वचन कै मुताबिक जिब उसका रथ सामरिया के जलकुण्ड म्ह धोया गया, फेर कुत्याँ नै उसका लहू चाट लिया, अर वेश्या उरैए स्नान करैं थी। 39 अहाब के और सारे काम जो उसनै करे, अर हाथी दाँत का जो भवन उसनै बणाया, अर जो-जो नगर उसनै बसाए थे, यो सारा इस्राएली राजयां कै इतिहास की किताब म्ह लिख्या सै। 40 आखर अहाब मरकै अपणे पुरखां कै गैल जा मिल्या अर उसका बेट्टा अहज्याह उसकी जगहां पै राज करण लाग्या।

यहोशापात का राज

41 इस्राएल के राजा अहाब के राज्य के चौथे साल म्ह आसा का बेट्टा यहोशापात यहूदा पै राज करण लाग्या। 42 जिब यहोशापात राज करण लाग्या, तब वो पैंतीस साल का था अर पच्‍चीस साल ताहीं यरुशलेम म्ह राज करदा रह्या। अर उसकी माँ का नाम अजूबा था, जो शिल्ही की बेट्टी थी। 43 अर उसकी चाल सारी तरियां तै उसके पिता आसा की जिसी थी, यानिके जो यहोवा की नजर म्ह ठीक सै वोए वो करदा रह्या, अर उसतै बिलकुल ना मुड़या। फेर भी ऊँच्‍ची जगहां गिराई न्ही गई, तोभी प्रजा के माणस ऊँच्‍ची जगहां पै उस बखत भी बलि करया करैं थे अर धूप भी जळाया करैं थे। 44 यहोशापात नै इस्राएल के राजा तै मेल करया। 45 यहोशापात के काम अर जो वीरता उसनै दिखाई, अर उसनै जो-जो लड़ाई करी, या सारी यहूदा के राजयां कै इतिहास की किताब म्ह लिखी सै। 46 पुरुषगामियां म्ह तै जो उसके पिता आसा के दिनां म्ह रहगे थे, उन ताहीं उसनै देश म्ह तै नाश करया।

47 उस बखत एदोम म्ह कोए राजा ना था; एक नायब राजकाज का काम करै था। 48 फेर यहोशापात नै तर्शीश के जहाज सोन्‍ना ल्याण कै खात्तर ओपीर के देश ताहीं जाण खात्तर बणवा लिए, पर वे एस्योनगेबेर*22:48 बंदरगाह वाला शहर म्ह टूटगे, ज्यांतै ओड़ै ना जा सके। 49 फेर अहाब के बेट्टे अहज्याह नै यहोशापात तै कह्या, "मेरे जहाजियां नै अपणे जहाजियां कै गैल, जहाजां म्ह जाण दे;" पर यहोशापात नै इन्कार करया। 50 यहोशापात मरकै अपणे पुरखां कै गैल जा मिल्या अर उसनै उसके पुरखां कै गैल उसके मूलपुरुष दाऊद के नगर म्ह माट्टी दी गई। अर उसका बेट्टा यहोराम उसकी जगहां पै राज करण लाग्या।

अहज्याह का राज

51 यहूदा के राजा यहोशापात के राज्य के सत्रहवें साल म्ह अहाब का बेट्टा अहज्याह सामरिया म्ह इस्राएल पै राज करण लाग्या अर दो साल ताहीं इस्राएल पै राज करदा रह्या। 52 अर उसनै वो करया, जो यहोवा की नजर म्ह बुरा था। अर उसकी चाल उसके माँ-बाप, अर नबात के बेट्टे यारोबाम की जिसी थी जिसनै इस्राएल पै तै पाप करवाया था। 53 जिस तरियां उसका पिता बाल की उपासना अर उसनै दण्डवत करण तै इस्राएल के परमेसवर यहोवा ताहीं क्रोधित करदा रह्या उसे तरियां ए अहज्याह भी करदा रह्या।