1 इस्राएल के अहाब राजा के मरण कै बाद मोआब इस्राएल कै खिलाफ बलवा करण लाग्या। 2 एक दिन अहज्याह एक जाळीदार खिड़की म्ह तै, जो सामरिया म्ह उसकी अटारी म्ह थी, गिर पड़या, अर बीमार होग्या। फेर उसनै कुछ दूत्तां ताहीं न्यू कहकै भेज्या, "थम जाकै एक्रोन* के बाल-जबूब नाम के देवता तै न्यू पूछ आओ, के मै इस बीमारी तै बचूँगा के न्ही?" 3 फेर यहोवा के दूत नै तिशबी एलिय्याह तै कह्या, "उठकै सामरिया के राजा के दूत्तां तै मिलण नै जा, अर उनतै कह, ‘के इस्राएल म्ह कोए परमेसवर न्ही सै जो थम एक्रोन के बाल-जबूब देवता तै पूछण जाओ सो?’ 4 इस करकै इब यहोवा राजा तै न्यू कहवै सै, ‘जिस पलंग पै तू पड़या सै, उसपै तै कदे भी न्ही उठैगा, पर मरे जावैगा।’" फेर एलिय्याह चल्या गया।

5 जिब अहज्याह के दूत राजा कै धोरै बोहड़ आए, फेर उसनै उनतै पूच्छया, "थम क्यूँ बोहड़ आए सो?" 6 उननै उसतै कह्या, "एक माणस म्हारे तै मिलण नै आया, अर कह्या के, ‘जिस राजा नै थारे ताहीं भेज्या उसकै धोरै जाकै कह्यो, यहोवा न्यू कहवै सै, के इस्राएल म्ह कोए परमेसवर न्ही सै जो तू एक्रोन के बाल-जबूब देवता तै पूछण नै भेज्जै सै? इस करकै जिस पलंग पै तू पड़या सै, उसपै तै कदे भी न्ही उठैगा, पर मरे जावैगा।’" 7 उसनै उनतै पूच्छया, "जो माणस थारै तै मिलण नै आया, अर थारै तै ये बात कही, उसका किसा रंग-रूप था?" 8 उननै उसतै जवाब दिया, "वो तो रुगंदार माणस था अर अपणी कमर म्ह चमड़े का पटका बाँधे होए था।" उसनै कह्या, "वो तिशबी एलिय्याह होवैगा।"*

9 फेर उसनै उसकै धोरै पचास सिपाहियाँ के एक प्रधान ताहीं उसके पचास सिपाहियाँ समेत भेज्या। प्रधान नै एलिय्याह कै धोरै जाकै के देख्या के वो पहाड़ की चोट्टी कै उप्पर बैठ्या सै। उसनै उसतै कह्या, "हे परमेसवर के भगत, राजा नै कह्या सै, ‘तू उतर आ।’" 10 एलिय्याह नै उस पचास सिपाहियाँ के प्रधान तै कह्या, "जै मै परमेसवर का भगत सूं तो अकास तै आग गिरकै तन्‍नै तेरे पचासों समेत भस्म कर गेरै।" फेर अकास तै आग उतरी अर उस ताहीं उसके पचासों सुधा भस्म कर दिया।*

11 फेर राजा नै उसकै धोरै पचास सिपाहियाँ के एक और प्रधान ताहीं, पचास सिपाहियाँ समेत भेज दिया। प्रधान नै उसतै कह्या, "हे परमेसवर के भगत, राजा नै कह्या सै, ‘फुर्ती तै उतर आ।’" 12 एलिय्याह नै जवाब देकै उनतै कह्या, "जै मै परमेसवर का भगत सूं तो अकास तै आग गिरकै तन्‍नै अर तेरे पचासों समेत भस्म कर गेरै।" फेर अकास तै परमेसवर की आग उतरी अर उस ताहीं अर उसके पचासों समेत भस्म कर दिया।

13 फेर राजा नै तीसरी बार पचास सिपाहियाँ के एक और प्रधान ताहीं, पचास सिपाहियाँ समेत भेज दिया, अर पचास का वो तीसरा प्रधान पहाड़ पै चढ़कै, एलिय्याह कै स्याम्ही घुटन्या के बळ गिरया, अर गिड़गिड़ाकै उसतै बिनती करी, "हे परमेसवर के भगत मेरा प्राण अर तेरे इन पचास दास्सां के प्राण तेरी दृष्टि म्ह अनमोल ठैहरै। 14 पचास-पचास सिपाहियाँ के जो दो प्रधान अपणे-अपणे पचासों सुधा पैहल्या आए थे, उन ताहीं तो आग नै अकास तै गिरकै भस्म कर गेरया, पर इब मेरा प्राण तेरी दृष्टि म्ह अनमोल ठैहरै।" 15 फेर यहोवा के दूत नै एलिय्याह तै कह्या, "उसकै गैल नीच्‍चै जा, उसतै मत डर।" फेर एलिय्याह उठकै उसकै गैल राजा कै धोरै नीच्‍चै गया, 16 अर उसतै कह्या, "यहोवा न्यू कहवै सै, ‘तन्‍नै तो एक्रोन के बाल-जबूब देवता तै पूछण नै दूत भेज्जे थे तो के इस्राएल म्ह कोए परमेसवर न्ही के जिसतै तू पूछ सकै? इस कारण तू जिस पलंग पै पड़या सै, उसपै तै कदे भी ना उठैगा, पर मरे जावैगा।’"

17 यहोवा के इस वचन कै मुताबिक जो एलिय्याह नै कह्या था, राजा अहज्याह मर ग्या। अर उसकी औलाद ना होण कै कारण उसका भाई यहोराम उसकी जगहां पै यहूदा के राजा यहोशापात के बेट्टे यहोराम के राज कै दुसरे साल म्ह राज करण लाग्या। 18 अहज्याह के और काम जो उसनै करे के वो इस्राएल के राजयां के इतिहास की किताब म्ह न्ही लिक्खे सैं?