1 जिस जनान्‍नी के बेट्टे ताहीं एलीशा नै जिन्दा करया था, उसतै उसनै कह्या था के अपणे घरान्‍ने समेत उरै तै जाकै जित्त किते तू रह सकै ओड़ै रह; क्यूँके यहोवा की इच्छा सै के अकाळ पड़ै, अर वो इस देश म्ह सात साल ताहीं बण्या रहवैगा।* 2 परमेसवर के भगत के इस वचन कै मुताबिक वो जनान्‍नी अपणे घरान्‍ने समेत पलिश्तियाँ के देश म्ह जाकै सात साल रही। 3 सात साल के बीतण पै वो पलिश्तियाँ के देश तै बोहड़ आई, अर अपणे घर अर धरती कै खात्तर दुहाई देण नै राजा कै धोरै गई। 4 राजा उस बखत परमेसवर के भगत एलीशा के सेवक गेहजी तै बात कर रहया था, अर उसनै कह्या, "जो बड़े-बड़े काम एलीशा नै करे सैं उनका मेरे तै बखान कर।" 5 जिब वो राजा तै यो बखान करे रहया था के एलीशा नै एक मुर्दे ताहीं जिवाया, फेर जिस जनान्‍नी के बेट्टे ताहीं उसनै जिवाया था वाए आकै अपणे घर अर धरती कै खात्तर दुहाई देण लाग्गी। फेर गेहजी नै कह्या, "हे मेरे प्रभु! हे राजा! या वाए जनान्‍नी सै अर योए उसका बेट्टा सै जिस ताहीं एलीशा नै जिवाया था।" 6 जिब राजा नै जनान्‍नी तै पूच्छया, फेर उसनै उसतै सब किमे कह दिया। फेर राजा नै एक हाकिम तै न्यू कहकै उसके गैल कर दिया के जो कुछ इसका था बलके जद तै इसनै देश ताहीं छोड़ दिया जद तै इसके खेत की जितनी आमदणी इब तक होई हो सारी इसनै बोहड़ा दे।

7 एलीशा दमिश्क नै गया। अर जिब अराम के राजा बेन्हदद नै जो रोगी था यो समाचार मिल्या, "परमेसवर का भगत* उरै भी आया सै," 8 फेर उसनै हजाएल* तै कह्या, "भेंट लेकै परमेसवर के भगत तै मिलण नै जा, अर उसके जरिये यहोवा तै न्यू पूछ, ‘के बेन्हदद जो रोगी सै वो बचैगा के न्ही?’" 9 फेर हजाएल भेंट कै खात्तर दमिश्क की सारी उत्तम-उत्तम चिज्जां म्ह तै चाळीस ऊँट लदवा कै, उसतै मिलण नै चल्या, अर उसकै स्याम्ही खड़या होकै कहण लाग्या, "तेरे बेट्टे अराम के राजा बेन्हदद नै मन्‍नै तेरे तै यो पूछण नै भेज्या सै, ‘के मै जो रोगी सूं बचूँगा के न्ही?’"* 10 एलीशा नै उसतै कह्या, "जाकै कह, ‘तू पक्‍का बच सकै था,’ फेर भी यहोवा नै मेरे ताहीं प्रगट करया सै, के तू बेसक मर ज्यागा।" 11 अर एलीशा हजाएल की और टकटकी लगाकै देखदा रहया*, उरै तक के वो लज्जित होया। अर परमेसवर का भगत रोण लाग्या। 12 फेर हजाएल नै पूच्छया, "मेरा प्रभु क्यूँ रोवै सै?" उसनै जवाब दिया, "ज्यांतै के मन्‍नै बेरा सै के तू इस्राएलियाँ पै के-के उपद्रव करैगा; उनके गढ़आळे नगरां नै तू फूँक देगा; उनके जवानां नै तू तलवार तै घात करैगा, उनके बाल-बच्यां नै तू पटक देगा, अर उनकी गर्भवती जनानियाँ नै तू चीर देगा।" 13 हजाएल नै कह्या, "तेरा दास जो कुत्ता जिसा सै, वो के सै के इसा बड़ा काम करै?" एलीशा नै कह्या, "यहोवा नै मेरे ताहीं यो प्रगट करया सै के तू अराम का राजा हो जावैगा।" 14 फेर वो एलीशा तै विदा होकै अपणे माल्‍लिक कै धोरै गया, अर राजा बेन्हदद नै हजाएल तै पूछ्या, "एलीशा नै तेरे तै के कह्या?" उसनै जवाब दिया, "एलीशा नै मेरे तै कह्या के बेन्हदद जरुर बचैगा।" 15 दुसरे दिन उसनै रजाई ताहीं लेकै पाणी तै भिगो दिया, अर उस ताहीं उसके मुँह पै इसी उढ़ादी के वो मर ग्या। फेर हजाएल उसकी जगहां पै राज करण लाग्या।

16 इस्राएल के राजा अहाब के बेट्टे योराम के राज के पाँचवें साल म्ह, जिब यहूदा का राजा यहोशापात जिन्दा था, फेर यहोशापात का बेट्टा यहोराम यहूदा पै राज करण लाग्या। 17 जिब वो राजा होया, तब बत्तीस साल का था, अर आठ साल ताहीं यरुशलेम म्ह राज करदा रहया। 18 वो इस्राएल के राजयां की जिसी चाल चल्या, जिसा अहाब का घरान्‍नां चालदा रहया था, क्यूँके उसकी जनान्‍नी अहाब की बेट्टी थी; अर वो उस काम नै करै था जो यहोवा की नजर म्ह बुरा था।* 19 फेर भी यहोवा नै यहूदा ताहीं नाश करणा ना चाह्या, यो उसके दास दाऊद के कारण होया, क्यूँके उसनै उसतै वचन दिया था, के तेरे वंश कै बारै म्ह मै सदा तेरै खात्तर एक दीवा जळदा होया राक्खूँगा।

20 यहोराम के राज कै दिनां म्ह एदोम नै यहूदा की अधीनता छोड़कै अपणा एक राजा बणा लिया। 21 फेर योराम अपणे सारे रथ गैल लिये होए साईर नै गया, अर रात नै उठकै उन एदोमियां ताहीं जो उसनै घेरे होए थे, अर रथां के प्रधान्‍ना ताहीं भी मारया; अर माणस अपणे-अपणे डेरे नै भाजगे। 22 आखर एदोम यहूदा कै वश तै छूट ग्या, अर आज तक उसाए सै। उस बखत लिब्ना नगर नै भी यहूदा की अधीनता छोड़ दी। 23 योराम के और सारे काम अर जो कुछ उसनै करया, के वो यहूदा के राजयां के इतिहास की किताब म्ह न्ही लिख्या सै? 24 अन्त म्ह योराम मरकै अपणे पुरखां कै गैल जा मिल्या अर उनकै बीच दाऊदपुर* म्ह उस ताहीं माट्टी दी गई; अर उसका बेट्टा अहज्याह उसकी जगहां पै राज करण लाग्या।

25 अहाब के बेट्टे इस्राएल के राजा योराम के राज के बारहवें साल म्ह यहूदा के राजा यहोराम का बेट्टा अहज्याह राज करण लाग्या। 26 जिब अहज्याह राजा बण्या, फेर बाईस साल का था, अर यरुशलेम म्ह एके साल राज करया। अर उसकी माँ का नाम अतल्याह था, जो इस्राएल के राजा ओम्री की पोत्ती थी। 27 अहज्याह अहाब के घरान्‍ने की चाल चल्या, अर अहाब के घरान्‍ने कै बराबर वो काम करदा रहया था, जो यहोवा की नजर म्ह बुरा सै, क्यूँके वो अहाब के घरान्‍ने का जमाई था। 28 वो अहाब के बेट्टे योराम कै गैल गिलाद के रामोत म्ह अराम के राजा हजाएल तै लड़ण नै गया, अर अरामियां नै योराम ताहीं घायल करया। 29 राजा योराम ज्यांतै बोहड़ ग्या, के यिज्रेल के शहर म्ह उन जख्मां का ईलाज करावै, जो उस ताहीं अरामियां कै हाथ तै उस बखत लाग्गे, जिब वो हजाएल कै गैल लड़ रहया था। अर अहाब का बेट्टा योराम तो यिज्रेल म्ह रोगी था, इस कारण यहूदा के राजा यहोराम का बेट्टा अहज्याह उसनै देखण गया।