1 एला के बेट्टे इस्राएल के राजा होशे के राज के तीसरे साल म्ह यहूदा के राजा आहाज का बेट्टा हिजकिय्याह राजा होया। 2 जिब वो राज करण लाग्या तब वो पच्‍चीस साल का था, अर उणतीस साल ताहीं यरुशलेम म्ह राज करदा रहया। उसकी माँ का नाम अबी था, जो जकर्याह की बेट्टी थी। 3 जिसा उसके मूलपुरुष दाऊद नै करया था जो यहोवा की नजर म्ह ठीक सै उसाए उसनै भी करया। 4 हिजकिय्याह नै ऊँच्‍ची जगहां गिरा दी, लाठां ताहीं तोड़ दिया, अशेरा ताहीं काट गेरया। पीतळ का जो साँप मूसा नै बणाया था, उस ताहीं उसनै इस कारण चूर-चूर कर दिया, के उन दिनां ताहीं इस्राएली उसकै खात्तर धूप जळावै थे; अर उसनै उसका नाम नहुशतान* धरया।* 5 वो इस्राएल के परमेसवर यहोवा पै भरोस्सा करया करै था, अर उसकै बाद यहूदा के सारे राजयां म्ह कोए उसकै बराबर ना होया, अर ना उसतै पैहल्या भी इसा कोए होया था। 6 अर वो यहोवा तै लिपट्या रहया* अर उसकै पाच्छै चालणा ना छोड्या; अर जो हुकम यहोवा नै मूसा ताहीं दिए थे, उनका वो पालन करदा रहया। 7 ज्यांतै यहोवा उसकै गैल रहया; अर जित्त किते वो जावै था, ओड़ै उसका काम सफल होवै था। अर उसनै अश्शूर के राजा तै बलवा करकै, उसकी अधीनता छोड़ दी। 8 उसनै पलिश्तियाँ ताहीं गाज़ा शहर अर उसकी सीमा ताहीं, रुखाळयां के गुम्मट अर गढ़आळे नगर ताहीं मारया।

9 राजा हिजकिय्याह के राज के चौथे साल म्ह जो एला के बेट्टे इस्राएल के राजा होशे के राज्य का सातवाँ साल था, अश्शूर के राजा शल्मनेसेर नै सामरिया पै चढ़ाई करकै उस ताहीं घेर लिया। 10 अर तीन साल के बीतण पै उन ताहीं उसनै ले लिया। इस तरियां हिजकिय्याह के राज के छठवें साल म्ह जो इस्राएल के राजा होशे के राज्य का नौवां साल था, सामरिया ले लिया गया। 11 फेर अश्शूर का राजा इस्राएलियाँ नै बन्दी बणाकै अश्शूर म्ह लेग्या, अर हलह म्ह अर गोजान की नदी हाबोर के धोरै अर मादियाँ के नगरां म्ह उन ताहीं बसा दिया। 12 इसका कारण यो था, के उननै अपणे परमेसवर यहोवा की बात ना मान्‍नी, बलके उसके करार ताहीं ताेड़या, अर जितने हुकम यहोवा के दास मूसा नै दिये थे, उन ताहीं टाळ दिया अर ना उन ताहीं सुण्या अर ना उनकै मुताबिक करया।

13 हिजकिय्याह राजा के राज के चौदहवें साल म्ह अश्शूर के राजा सन्हेरीब नै यहूदा के सारे गढ़आळे नगरां पै चढ़ाई करकै उन ताहीं ले लिया। 14 फेर यहूदा के राजा हिजकिय्याह नै अश्शूर के राजा कै धोरै लाकीश नै सन्देस भेज्या, "मेरे तै अपराध होया, मेरै धोरै तै चल्या जा; अर जो भार तू मेरै पै गेरैगा उसनै मै ठाऊँगा।" तो अश्शूर के राजा नै यहूदा के राजा हिजकिय्याह कै खात्तर तीन सौ किक्‍कार चाँदी* अर तीस किक्‍कार सोन्‍ना* ठहरा दिया। 15 फेर जितनी चाँदी यहोवा के भवन अर राजभवन के भण्डारां म्ह मिली, उस सारी ताहीं हिजकिय्याह नै उसतै दे दी। 16 उस दिनां म्ह हिजकिय्याह नै यहोवा के मन्दर के दरवाज्यां पै तै अर उन खम्भ्यां पै तै भी जिनपै यहूदा के राजा हिजकिय्याह नै सोन्‍ना मढ़वाया था, सोन्‍ने ताहीं छील कै अश्शूर के राजा तै दे दिया। 17 फेर भी अश्शूर के राजा नै तर्त्तान, रबसारीस अर रबशाके ताहीं बड़ी सेना देकै, लाकीश नगर तै यरुशलेम कै धोरै हिजकिय्याह राजा के खिलाफ भेज दिया। आखर वे यरुशलेम नै गए अर ओड़ै पोहचकै उप्पर के जलकुण्ड की नाळी कै धोरै धोबियां के खेत की सड़क पै जा खड़े होए। 18 जिब उननै राजा ताहीं पुकारया, फेर हिल्किय्याह का बेट्टा एलयाकीम जो राजघरान्‍ने के काम पै था, अर शेबना जो मंत्री था अर आसाप का बेट्टा योआह जो इतिहास का लिखण आळा था, ये तीन्‍नु उनकै धोरै बाहर लिकड़गे।

19 रबशाके नै उनतै कह्या, "हिजकिय्याह तै कहो, के महाराजाधिराज यानिके अश्शूर का राजा न्यू कहवै सै, ‘तू किसपै भरोस्सा करै सै? 20 तू जो कहवै सै, के मेरे उरै युद्ध कै खात्तर युक्ति अर पराक्रम सै, वो तो सिर्फ बात ए बात सै।* तू किसपै भरोस्सा राक्खै सै के तन्‍नै मेरे तै बलवा करया सै? 21 सुण, तू तो उस कुचले होए नरकट यानिके मिस्र पै भरोस्सा राक्खै सै, उसपै जै कोए टेक लगावै, तो वो उसके हाथ म्ह चुभकै छेदैगा। मिस्र का राजा फिरौन अपणे सारे भरोस्सा करण आळयां कै खात्तर इसाए सै। 22 फेर जै थम मेरे ताहीं कहो, के म्हारा भरोस्सा अपणे परमेसवर यहोवा पै सै, तो के यो वो न्ही सै जिसकी ऊँच्‍ची जगहां अर वेदियाँ ताहीं हिजकिय्याह नै दूर करकै यहूदा अर यरुशलेम तै कह्या, के थम इसे वेदी कै स्याम्ही जो यरुशलेम म्ह सै दण्डवत करणा?’ 23 तो इब मेरे स्वामी अश्शूर के राजा कै धोरै किमे बन्धक धर, फेर मै तन्‍नै दो हजार घोड़े दियुँगा, के तू उनपै घुड़सवार चढ़ा सकैगा के न्ही? 24 फेर तू मेरे स्वामी के छोट्टे तै छोट्टे कर्मचारी का भी कह्या ना मानकै क्यूँ रथां अर सवारां कै खात्तर मिस्र पै भरोस्सा राक्खै सै? 25 के मन्‍नै यहोवा के बिना कहे, इस जगहां ताहीं उजाड़ण खात्तर चढ़ाई करी सै? यहोवा नै मेरै तै कह्या सै, के उस देश पै चढ़ाई करकै उसनै उजाड़ दे।" 26 फेर हिल्किय्याह के बेट्टे एलयाकीम अर शेबना योआह नै रबशाके तै कह्या, "अपणे दास्सां तै अरामी भाषा म्ह बात कर, क्यूँके हम उसे नै समझा सां; अर म्हारे तै यहूदी भाषा म्ह शहरपनाह पै बैठ्ठे होए माणसां के सुणदे* बात ना करै।" 27 रबशाके नै उनतै कह्या, "के मेरे स्वामी नै मेरे ताहीं थारे स्वामी तै ए, या थारै ए धोरै यो बात कहण नै भेज्या सै? के उसनै मेरे ताहीं उन माणसां कै धोरै न्ही भेज्या, जो शहरपनाह पै बैठ्ठे सैं, ताके थारै गैल उननै भी अपणा मल खाणा अर अपणा पेशाब पीणा पड़ै?"

28 फेर रबशाके नै खड़े हो, यहूदी भाषा म्ह ऊँच्‍चे शब्द तै कह्या, "महाराजाधिराज यानिके अश्शूर के राजा की बात सुणो। 29 राजा न्यू कहवै सै, ‘हिजकिय्याह थमनै धोखा देण ना पावै, क्यूँके वो थमनै मेरै हाथ तै बचा न्ही सकैगा। 30 अर हिजकिय्याह थारै तै न्यू कहकै यहोवा पै भरोस्सा कराण ना पावै, के यहोवा पक्‍का हमनै बचावैगा अर यो नगर अश्शूर के राजा के बस म्ह न्ही पड़ैगा। 31 हिजकिय्याह की ना सुणो। अश्शूर का राजा कहवै सै के भेंट भेजकै मन्‍नै खुश करो अर मेरै गैल लिकड़ आओ, अर हरेक अपणी-अपणी दाखलता अर अंजीर के दरखत के फळ खान्दा अर अपणे-अपणे कुण्ड का पाणी पीन्दा रहवै। 32 फेर मै आकै थमनै इसे देश म्ह ले जाऊँगा, जो थारे देश कै बराबर नाज अर नये दाखमधु का देश, रोट्टी अर दाख की बारियां का देश, जैतून अर शहद का देश सै, ओड़ै थम मरोगे न्ही, जिन्दे रहोगे; तो जिब हिजकिय्याह न्यू कहकै थमनै बहकावै, के यहोवा हमनै बचावैगा, फेर उसकी न्ही सुणणा। 33 के और जात्तां के देवत्यां नै अपणे-अपणे देश ताहीं अश्शूर के राजा कै हाथ तै कदे बचाया सै? 34 हमात अर अर्पाद के देवता कड़ै रहे? सपर्वैम, हेना अर इव्वा के देवता कड़ै रहे? के उननै सामरिया ताहीं मेरै हाथ तै बचाया सै, 35 देश-देश के सारे देवत्यां म्ह तै इसा कौण सै, जिसनै अपणे देश ताहीं मेरै हाथ तै बचाया हो? फेर के यहोवा यरुशलेम नै मेरै हाथ तै बचावैगा।’"

36 पर सारे माणस चुप रहे अर उसके उत्तर म्ह एक बात भी न्ही कही, क्यूँके राजा का इसाए हुकम था, के उसतै जवाब न्ही देणा। 37 फेर हिल्किय्याह का बेट्टा एलयाकीम जो राजघरान्‍ने के काम पै था, अर शेबना जो मंत्री था, अर आसाप का बेट्टा योआह जो इतिहास का लिखण आळा था, अपणे कपड़े पाड़े होए, हिजकिय्याह कै धोरै जाकै रबशाके की बात कह सुणाई।