2 राजाओं 14

अमस्याह का राज

1 इस्राएल के राजा यहोआहाज के बेट्टे यहोआश के राज के दुसरे साल म्ह यहूदा के राजा योआश का बेट्टा अमस्याह राजा होया। 2 जिब अमस्याह राज करण लाग्या तब वो पच्‍चीस साल का था, अर यरुशलेम म्ह उणतीस साल राज्य करदा रहया। उसकी माँ का नाम यहोअद्दान था, जो यरुशलेम की थी। 3 उसनै वो करया जो यहोवा की नजर म्ह ठीक था फेर भी अपणे मूलपुरुष दाऊद कै बराबर ना करया; उसनै ठीक अपणे पिता योआश के जिसे काम करे।*14:3 अपणे पिता योआश के जिसे काम करे। योआश अर अमस्याह म्ह एक विचित्र समानता थी। अपणे राज्यकाल के शरुआत म्ह दोन्‍नु म्ह यहोवा के लिए जोश था पर बाद के भाग म्ह वे चूक गए। 4 उसके दिनां म्ह ऊँच्‍ची जगहां गिराई ना गई; माणस फेर भी उनपै बलि चढ़ान्दे, अर धूप जळान्दे रहे। 5 जिब राज उसके हाथ म्ह स्थिर होग्या, फेर उसनै अपणे उन कर्मचारियाँ तै मौत की सजा दी, जिननै उसके पिता राजा ताहीं मार गेरया था। 6 पर उन खूनियाँ के बच्‍चयां ताहीं उसनै ना मार गेरया, क्यूँके यहोवा का यो हुकम मूसा की व्यवस्था की किताब म्ह लिख्या सै: "बेट्टा कै कारण पिता ना मार गेरया जावै, अर पिता के कारण बेट्टा ना मार गेरया जावै; जिसनै पाप करया हो, वोए उस पाप कै कारण मार गेरया जावै।"*14:6 व्यवस्थाविवरण 24.16 7 उसे अमस्याह नै नमक की तराई म्ह दस हजार एदोमी माणस मार गेरे, अर सेला नगर तै युद्ध करकै उस ताहीं ले लिया, अर उसका नाम योक्तेल धरया, अर वो नाम आज तक चाल्‍लै सै।

8 फेर अमस्याह नै इस्राएल के राजा यहोआश कै धोरै जो येहू का पोत्ता अर यहोआहाज का बेट्टा था दूत्तां तै कुह्वा भेज्जा, "आ हम एक दुसरे का सामना करां।" 9 इस्राएल के राजा यहोआश नै यहूदा के राजा अमस्याह कै धोरै यो सन्देस भेज्या, "लबानोन पै की एक झड़बेरी नै लबानोन के एक देवदार कै धोरै सन्देसा भेज्या, ‘अपणी बेट्टी का मेरे बेट्टे तै ब्याह कर दे’ इतणे म्ह लबानोन म्ह का एक बण पशु धोरै तै चल्या गया अर उस झड़बेरी ताहीं रौंद गेरया। 10 तन्‍नै एदोमियां ताहीं जीत्या तो सै ज्यांतै तू फूल उठ्या सै। उसे पै बड़ाई मारदा होया घर रह जा; तू अपणे नुकसान कै खात्तर उरै क्यूँ हाथ ठावै सै, जिसतै तू के बलके यहूदा भी नीच्‍चा देक्खैगा?"

11 पर अमस्याह नै ना मान्या। फेर इस्राएल के राजा यहोआश नै चढ़ाई करी, अर उसनै अर यहूदा के राजा अमस्याह नै यहूदा देश के बेतशेमेश म्ह एक दुसरे का सामना करया। 12 अर यहूदा इस्राएल तै हार ग्या, अर एक-एक अपणे-अपणे डेरे नै भाज्या। 13 फेर इस्राएल के राजा यहोआश नै यहूदा के राजा अमस्याह ताहीं जो अहज्याह का पोत्ता, अर योआश का बेट्टा था, बेतशेमेश म्ह पकड़ लिया, अर यरुशलेम नै गया, अर एप्रैमी फाटक तै कोणे आळे फाटक ताहीं, च्यार सौ हाथ यरुशलेम की शहरपनाह गिरा दी। 14 अर जितना सोन्‍ना, चाँदी अर जितने बरतन यहोवा के भवन म्ह अर राजभवन के भण्डारां म्ह मिले, उन सब नै और बन्धक माणसां नै भी लेकै वो सामरिया नै बोहड़ ग्या।

15 यहोआश के और काम जो उसनै करे, अर उसकी वीरता अर उसनै किस तरियां तै यहूदा के राजा अमस्याह तै युद्ध करया, यो सबके इस्राएल के राजयां कै इतिहास की किताब म्ह न्ही लिख्या सै? 16 अन्त म्ह यहोआश मरकै अपणे पुरखां कै गैल जा मिल्या अर उसतै इस्राएल के राजयां कै बीच सामरिया म्ह माट्टी दी गई; अर उसका बेट्टा यारोबाम उसके जगहां पै राज करण लाग्या। 17 यहोआहाज के बेट्टे इस्राएल के राजा यहोआश के मरण कै बाद योआश का बेट्टा यहूदा का राजा अमस्याह पन्द्रह साल जीवित रहया। 18 अमस्याह के और काम के यहूदा के राजयां कै इतिहास की किताब म्ह न्ही लिक्खे सैं? 19 जिब यरुशलेम म्ह उसकै खिलाफ राजद्रोह की योजना करी गई, फेर वो लाकीश कै शहर म्ह भाज ग्या। आखर म्ह उननै लाकीश ताहीं उसका पिच्छा करकै उस ताहीं ओड़ै मार गेरया। 20 फेर वो घोड़यां पै धरकै यरुशलेम म्ह पोहचाया गया, अर ओड़ै उसके पुरखां कै बीच उस ताहीं दाऊदपुर म्ह माट्टी दी गई। 21 फेर सारी यहूदी प्रजा नै अजर्याह ताहीं लेकै, जो सोळाह साल का था, उसके पिता अमस्याह की जगहां पै राजा बणा दिया। 22 राजा अमस्याह मरकै अपणे पुरखां कै गैल जा मिल्या, फेर उसकै बाद अजर्याह नै एलत कै शहर ताहीं मजबूत करकै यहूदा के वश म्ह फेर कर लिया।

दुसरे यारोबाम का राज

23 यहूदा के राजा योआश के बेट्टे अमस्याह के राज्य के पन्द्रहवें साल म्ह इस्राएल के राजा यहोआश का बेट्टा यारोबाम सामरिया म्ह राज करण लाग्या, अर इकताळीस साल तक राज करदा रहया। 24 उसनै वो करया, जो यहोवा की नजर म्ह बुरा था; यानिके नबात के बेट्टे यारोबाम जिसनै इस्राएल तै पाप कराया था, उसके पापां कै मुताबिक वो करदा रहया, अर उनतै वो न्यारा ना होया। 25 उसनै इस्राएल की सीमा हमात की घाटी तै ले अराबा के ताल ताहीं ज्यों की त्यों कर दी*14:25 अराबा के ताल ताहीं ज्यों की त्यों कर दी अपणे लम्बे बखत राज्यकाल म्ह यारोबाम नै पवित्र देश की पुराणी सीमाओं को, उत्तर, पूर्व अर दक्षिण-पूर्व म्ह दोबारा स्थापित कर दिया था।, जिसा के इस्राएल के परमेसवर यहोवा नै अमित्तै के बेट्टे अपणे दास गथेपेरवासी योना भविष्यवक्ता के जरिये कह्या था। 26 क्यूँके यहोवा नै इस्राएल का दुःख देख्या के घणाए मुश्किल सै, बलके, के बन्दी के आजाद कोए भी बच्या ना रहया, अर ना इस्राएल कै खात्तर कोए मददगार था। 27 यहोवा नै न्ही कह्या था, के मै इस्राएल का नाम धरती पै तै मिटा दियुँगा। आखर उसनै यहोआश के बेट्टे यारोबाम के जरिये उन ताहीं छुटकारा दिया।

28 यारोबाम के और सारे काम जो उसनै करे, अर किसे पराक्रम कै गैल उसनै युद्ध करया, अर दमिश्क अर हमात ताहीं जो पैहले यहूदा के राज म्ह थे इस्राएल के वश म्ह फेर मिला लिया, यो सबके इस्राएल के राजयां के इतिहास की किताब म्ह न्ही लिख्या सै? 29 अन्त म्ह यारोबाम मरकै अपणे पुरखां कै गैल जो इस्राएल के राजा थे जा मिल्या, अर उसका बेट्टा जकर्याह उसकी जगहां पै राज करण लाग्या।