1 एक दिन नबियाँ के दल म्ह तै किसे नै एलीशा तै कह्या, "या जगहां जिस म्ह हम तेरै स्याम्ही रहवां सां, वो म्हारे खात्तर घणी छोट्टी सै। 2 ज्यांतै हम यरदन नै जावां, अर ओड़ै तै एक-एक बल्‍ली लेकै, उरै अपणे रहण कै खात्तर एक जगहां बणा ल्यां;" एलीशा नै उत्तर कह्या, "आच्छया जाओ।" 3 फेर उन म्ह तै किसे नै एलीशा तै कह्या, "अपणे दास्सां के गैल चाल;" उसनै कह्या, "चाल्‍लूँ सूं।" 4 आखर वो उनके गैल चल्या अर वे यरदन कै किनारे पोहचकै लाकड़ी काटण लाग्गे। 5 पर जिब एक जणा बल्‍ली काट रहया था, तो कुल्हाड़ी बिन्डे म्ह तै लिकड़कै पाणी म्ह गिरगी; ज्यांतै वो चिल्‍लाकै कहण लाग्या, "हाय! मेरे प्रभु, वा तो माँगी होई थी।" 6 परमेसवर के भगत नै पूच्छया, "वो कित्त गिरी?" जिब उसनै जगहां दिखाई, फेर उसनै एक लाकड़ी काटकै ओड़ै गेर दी, अर वो लोहा पाणी पै तैरण लाग्या। 7 एलीशा नै कह्या, "उसनै ठा ले।" फेर उसनै हाथ बढ़ाकै उस ताहीं ले लिया।

8 उन दिनां म्ह अराम का राजा इस्राएल तै युद्ध कर रहया था, अर समझोत्ता करकै अपणे कर्मचारियाँ तै सलाह करी, "अनजाण जगहां पै मेरी छावणी होगी।" 9 फेर परमेसवर के भगत नै इस्राएल के राजा कै धोरै सन्देसा भेज्या, "चौकसी कर अर अनजाण जगहां तै होकै न्ही जाणा क्यूँके ओड़ै अरामी चढ़ाई करण आळे सैं।" 10 फेर इस्राएल के राजा नै उस जगहां ताहीं, जिसकी चर्चा करकै परमेसवर के भगत नै उसतै चिताया था, दूत भेजकै, अपणी रक्षा करी; अर उस तरियां एक-दो बार न्ही बलके घणी बार होया।

11 इस कारण अराम के राजा का मन घणा घबराग्या; आखर उसनै अपणे कर्मचारियाँ तै बुलाकै उनतै कह्या, "के थम मन्‍नै न्ही बताओगे के म्हारे म्ह तै कौण इस्राएल के राजा की और का सै?" उसके एक कर्मचारी नै कह्या, "हे मेरे प्रभु! हे राजा! इसा न्ही, 12 एलीशा जो इस्राएल म्ह नबी सै, वो इस्राएल के राजा नै वे बात भी बताया करै सै, जो तू सोण आळी कोठड़ी म्ह बोल्‍लै सै।*" 13 राजा नै कह्या, "जाकै देक्खो के वो कित्त सै, फेर मै भेजकै उसनै पकड़वाकै बुलवाऊँगा।" उसनै यो समाचार मिल्या "वो दोतान नगर म्ह सै।" 14 फेर एक रात अराम के राजा नै ओड़ै घोड़यां अर रथां समेत एक भारी दल ताहीं भेज्या, अर उननै रात नै आकै नगर ताहीं घेर लिया।

15 भोर नै परमेसवर के भगत का सेवादार उठ्या अर लिकड़कै के देख्या के घोड़यां अर रथां समेत एक दल नगर नै घेरे होए पड़या सै। फेर उसके सेवक नै उसतै कह्या, "हाय! मेरे स्वामी, हम के करां?" 16 उसनै कह्या, "मत डर; क्यूँके जो म्हारी और सैं, वो उनतै घणे सैं, जो उनकी और सैं।*" 17 फेर एलीशा नै न्यू प्रार्थना करी, "हे यहोवा, इसकी आँख खोल दे* के यो देख सकै।" फेर यहोवा नै सेवक की आँख खोल दी अर जिब वो देख सक्या, फेर के देख्या, के एलीशा के च्यांरु और का पहाड़ अग्निमय घोड़यां अर रथां तै भरया होया सै। 18 जिब अरामी उसकै धोरै आए, फेर एलीशा नै यहोवा तै प्रार्थना करी के इस दल नै आन्धा कर दे। एलीशा के इस वचन कै मुताबिक परमेसवर नै उन ताहीं आन्धा कर दिया। 19 फेर एलीशा नै उनतै कह्या, "यो तो रास्ता न्ही सै, अर ना यो नगर सै, मेरै पाच्छै हो ल्यो; मै थमनै उस माणस कै धोरै जिसनै थम टोह रहे सो पोहचाऊँगा।" फेर उसनै उन ताहीं सामरिया म्ह पोंहचा दिया।

20 जिब वे सामरिया म्ह आगे, फेर एलीशा नै बिनती करी, "हे यहोवा, इन माणसां की आँख खोल के ये देख सकै।" फेर यहोवा नै उनकी आँख खोल्‍ली, अर जिब वे देखण लाग्गे फेर के देख्या के हम सामरिया कै बिचाळै सां। 21 इस्राएल के राजा नै अरामियां ताहीं देखकै एलीशा तै कह्या, "हे मेरे पिता, के मै इननै मार दियुँ? मै उननै मार दियुँ?" 22 उसनै जवाब दिया, "मत मार। के तू उननै मार दिया करै सै, जिननै तू तलवार अर धनुष तै बन्दी बणा लेवै सै? तू उननै अन्‍न जल दे, के खा-पी कै अपणे स्वामी कै धोरै चले जावैं।" 23 फेर उसनै उनकै खात्तर बड़ा भोज करया, अर जिब उननै खा-पी लिया, फेर उसनै उन ताहीं विदा करया, अर वे अपणे स्वामी कै धोरै चले गए। इसकै बाद अराम के दल इस्राएल के देश म्ह फेर न्ही आए।

24 इसकै बाद अराम के राजा बेन्हदद नै अपणी सारी सेना कठ्ठी करकै, सामरिया पै चढ़ाई कर दी अर उस ताहीं घेर लिया। 25 फेर सामरिया म्ह बड़ा अकाळ पड़या अर वो इसा घिरया रहया, के अन्त म्ह एक गधे का सिर चाँदी के अस्सी टुकड्या* म्ह अर कब की चौथाई भर कबूतर की बीठ पाँच टुकड़े चाँदी* म्ह बिकण लाग्गी। 26 एक दिन इस्राएल का राजा शहरपनाह पै घूम रहया था, के एक जनान्‍नी नै पुकारकै उसतै कह्या, "हे प्रभु, हे राजा, बचा।" 27 उसनै कह्या, "जै यहोवा तन्‍नै ना बचावै, तो मै कित्त तै तन्‍नै बचाऊँ? के खलिहाण म्ह तै, या दाखरस के कुण्ड म्ह तै?" 28 फेर राजा नै उसतै पूच्छया, "तेरै के होया?" उसनै जवाब दिया, "इस जनान्‍नी नै मेरै तै कह्या था, ‘मन्‍नै अपणा बेट्टा दे, के हम आज उसनै खा ल्यां, फेर कल मै अपणा बेट्टा दियुँगी, अर हम उसनै भी खावैंगी।’" 29 फेर मेरे बेट्टे ताहीं पका कै हमनै खा लिया, फेर दुसरे दिन जिब मन्‍नै इसतै कह्या "अपणा बेट्टा दे के हम उसनै खा ल्यां, फेर इसनै अपणे बेट्टे ताहीं लूका राख्या।" 30 उस जनान्‍नी की या बात सुणदे, राजा नै दुःख म्ह अपणे कपड़े पाड़े अर वो तो शहरपनाह पै घूम रहया था, जिब माणसां नै देख्या, फेर उन ताहीं यो दिखाई पड़या के वो भित्तर अपणी देह पै टाट पैहरे सै। 31 फेर उसनै अपणे आप तै कह्या, "जै मै शापात के बेट्टे एलीशा का सिर आज उसके धड़ पै रहण दियुँ, तो परमेसवर मेरै गैल इसाए बलके इसतै भी घणा करै।"

32 एलीशा अपणे घर म्ह बैठ्या होया था, अर पुरनिये भी उसकै गैल बैठ्ठे थे। सो जिब राजा नै अपणे धोरै तै एक जणा भेज्या, फेर उस दूत के पोहोचण तै पैहल्या उसनै पुरनियां तै कह्या, "देक्खो, इस खून्‍नी के बेट्टे नै किसे ताहीं मेरा सिर काटण नै भेज्या सै; ज्यांतै जिब वो दूत आवै, फेर किवाड़ बन्द करकै रोक्‍के रहणा। के उसके स्वामी के पैर की आहट उसकै पाच्छै न्ही सुणाई पड़दी?" 33 जिब एलीशा उनतै या बात करे रहया था के दूत उसकै धोरै आ पोहच्या। अर राजा कहण लाग्या, "या विपत्ति यहोवा की और तै सै, इब मै आग्गै ताहीं यहोवा की बाट क्यूँ देखदा रहूँ?"