येहू का अभिषेक अर राज
1 फेर एक दिन एलीशा नबी नै नबियाँ के दल म्ह तै एक ताहीं बुलाकै उसतै कह्या, "कमर बाँध, अर हाथ म्ह तेल की या कुप्पी लेकै गिलाद के रामोत नै जा।9:1 लूका 12:35 2 अर ओड़ै पोहचकै येहू नै जो यहोशापात का बेट्टा अर निमशी का पोत्ता सै, टोह लेणा; फेर भित्तर जा, उसनै खड़या करा कै उसके भाईयाँ तै न्यारा भित्तर एक कोठड़ी म्ह ले जाणा। 3 फेर तेल की या कुप्पी लेकै तेल ताहीं उसके सिर पै न्यू कहकै गेरणा, ‘यहोवा न्यू कहवै सै, के मै इस्राएल का राजा होण कै खात्तर तेरा अभिषेक करुँ सूं।’ फेर किवाड़ खोलकै एकदम भाजणा, देर न्ही करिये9:3 फेर किवाड़ खोलकै एकदम भाजणा, देर न्ही करिये इन निर्देशां का सम्भावित मकसद था के प्रश्न पूछण तै बच्या जाए अर पूरा घटना को अर घणा ध्यानाकर्षक बणाया जाए। ।"
4 आखर वो जवान नबी गिलाद के रामोत नै गया। 5 ओड़ै पोहचकै उसनै के देख्या, के सेनापति बैठ्ठे होए सैं; फेर उसनै कह्या, "हे सेनापति, मन्नै तेरे तै किमे कहणा सै।" येहू नै पूच्छया, "हम सारया म्ह किसतै?" उसनै कह्या, "हे सेनापति, तेरे तै!" 6 फेर वो उठकै घर म्ह गया; अर उसनै न्यू कहकै उसके सिर पै तेल गेरया, "इस्राएल का परमेसवर यहोवा न्यू कहवै सै, मै अपणी प्रजा इस्राएल पै राजा होण कै खात्तर तेरा अभिषेक करुँ सूं। 7 तो तू अपणे स्वामी अहाब के घरान्ने नै मार गेरणा, जिसतै मन्नै अपणे दास नबियाँ के बलके अपणे सारे दास्सां के खून का जो ईजेबेल नै बहाया, बदला मिलै।9:7 प्रकाशितवाक्य 6:10, 19:2 8 क्यूँके अहाब का सारा घरान्नां नाश हो जावैगा, अर मै अहाब के वंश के हर एक छोरे नै अर इस्राएल म्ह के गुलाम, के आजाद, हर एक का नाश कर दियुँगा। 9 अर मै अहाब का घरान्नां नबात के बेट्टे यारोबाम का जिसा, अर अहिय्याह के बेट्टे बाशा का जिसा कर दियुँगा। 10 अर ईजेबेल नै यिज्रेल की धरती म्ह कुत्ते खावैंगे, अर उसनै माट्टी देणआळा कोए ना होवैगा।" फेर वो द्वार खोलकै भाज ग्या।
11 फेर येहू अपणे स्वामी के कर्मचारियाँ कै धोरै लिकड़ आया, अर एक नै उसतै पूछ्या, "के सही-सलामत सै, वो बावळा क्यूँ तेरै धोरै आया था?" उसनै उनतै कह्या, "थमनै बेरा होवैगा के वो कौण सै अर उसतै के बातचीत होई।" 12 उननै कह्या, "झूठ सै, हमनै बता दे।" उसनै के कह्या, "उसनै मेरे तै कह्या तो घणाए, पर मतलब यो सै ‘यहोवा न्यू कहवै सै के मै इस्राएल का राजा होण कै खात्तर तेरा अभिषेक कर देऊँ हूँ।’" 13 फेर उननै झट अपणा-अपणा कपड़ा उतारकै उसकै नीच्चै सीढ़ी पै बिछाया, अर नरसिंगे फूँक कै कहण लाग्गे, "येहू राजा सै।"9:13 लूका 19:36 14 यो येहू जो निमशी का पोत्ता अर यहोशापात का बेट्टा था, उसनै राजा योराम तै राजद्रोह की योजना करी। (योराम तो सारे इस्राएल समेत अराम के राजा हजाएल के कारण गिलाद के रामोत की हिफाजत कर रहया था; 15 पर राजा योराम आप अपणे घाव का जो अराम के राजा हजाएल तै युद्ध करण कै बखत उस ताहीं अरामियां तै लाग्गे थे, उनका ईलाज कराण कै खात्तर यिज्रेल नै बोहड़ ग्या था।) फेर येहू नै कह्या, "जै थारा इसा मन हो, तो इस नगर म्ह तै कोए लिकड़कै यिज्रेल म्ह सुणाण नै ना जाण पावै।" 16 फेर येहू रथ पै चढ़कै, यिज्रेल नै चल्या जित्त योराम पड़या होया था; अर यहूदा का राजा अहज्याह योराम नै देखण ताहीं ओड़ै आया था।
17 यिज्रेल के गुम्मट पै, जो रखवाळा खड़या था, उसनै येहू कै गैल आन्दे होए दल ताहीं देखकै कह्या, "मन्नै एक दल दिक्खै सै;" योराम नै कह्या, "एक घुड़सवार नै बुलाकै उन माणसां तै मिलण नै भेज अर वो उनतै पूच्छै, ‘के सब किमे सही-सलामत सै?’" 18 फेर एक सवार उसतै मिलण नै गया, अर उसतै कह्या, "राजा पूच्छै सै, ‘के ठीक-ठाक सै?’" येहू नै कह्या, "ठीक-ठाक तै तेरा के काम? हटकै मेरै पाच्छै चाल।" फेर रखवाळे नै कह्या, "वो दूत उनकै धोरै पोहच्या तो था, पर बोहड़कै न्ही आया।" 19 फेर उसनै दूसरा सवार भेज्या, अर उसनै उनकै धोरै पोहचकै कह्या, "राजा पूच्छै सै, ‘के ठीक-ठाक सै?’" येहू नै कह्या, "ठीक तै तेरा के काम? हटकै मेरै पाच्छै चाल।" 20 फेर रखवाळे नै कह्या, "वो भी उनकै धोरै पोहच्या तो था, पर बोहड़कै न्ही आया। हाँकणा तो निमशी के पोत्ते येहू का जिसा सै; वो तो पागलां कै बराबर हाँकै सै।"
21 योराम नै कह्या, "मेरा रथ जुतवा।" जिब उसका रथ जुत्त ग्या, फेर इस्राएल का राजा योराम अर यहूदा का राजा अहज्याह, दोन्नु अपणे-अपणे रथ पै चढ़कै लिकड़गे, अर येहू तै मिलण नै बाहर जाकै यिज्रेल नाबोत की धरती म्ह उसतै भेंट करी। 22 येहू ताहीं देखदे योराम नै पूच्छया, "हे येहू के ठीक-ठाक सै," येहू नै जवाब दिया, "जद तक तेरी माँ ईजेबेल ओछापण अर टोणा करदी रहवै, तब ताहीं ठीक कित्त सै?"9:22 प्रकाशितवाक्य 2:20, 9:21 23 फेर योराम रास फेरकै, अर अहज्याह तै न्यू कहकै भाज्या, "हे अहज्याह धोक्खा सै, भाज चाल।" 24 फेर येहू नै धनुष ताहीं कान तक खींचकै योराम के कंध्यां कै बीच इसा तीर मारया, के वो उसका हृदय चीर कै लिकड़ ग्या, अर वो अपणे रथ म्ह झुककै गिर पड़या। 25 फेर येहू नै बिदकर नाम के अपणे एक अगुवें तै कह्या, "उसनै ठाकै यिज्रेली नाबोत की धरती म्ह फेंक दे; याद तो कर, के जिब मै अर तू, हम दोन्नु एक गैल सवार होकै उसके पिता अहाब कै पाच्छै-पाच्छै चाल रहे थे फेर यहोवा नै उसतै यो भारी वचन कुह्वाया था, 26 ‘यहोवा की या वाणी सै, के नाबोत अर उसके बेट्यां का जो खून होया, उस ताहीं मन्नै देख्या सै, अर यहोवा की या वाणी सै, के मै उस्से धरती म्ह तन्नै बदला दियुँगा।’ तो इब यहोवा के उस वचन कै मुताबिक इसनै ठाकै उसे धरती म्ह फेंक दे।" 27 यो देखकै यहूदा का राजा अहज्याह बाग के भवन के राह तै भाज चाल्या। अर येहू नै उसका पिच्छा करकै कह्या, "उसनै भी रथे पै मारो;" तो वो भी यिबलाम कै धोरै की गूर की चढ़ाई पै मारया गया, अर मगिद्दो ताहीं भाजकै मर ग्या। 28 फेर उसके कर्मचारियाँ नै उस ताहीं रथ पै यरुशलेम नै पोंहचाकै दाऊदपुर म्ह उसके पुरखां कै बिचाळै माट्टी दी।
29 अहज्याह तो अहाब के बेट्टे योराम के राज के ग्यारहवें साल म्ह यहूदा पै राज करण लाग्या था। 30 जिब येहू यिज्रेल नै आया, फेर ईजेबेल न्यू सुण अपणी आँखां म्ह सुरमा लगाकै, अपणा सिर बाकै, खिड़की म्ह तै झाँकण लाग्गी। 31 जिब येहू फाटक म्ह होकै आ रहया था फेर उसनै कह्या, "हे अपणे स्वामी नै घात करण आळे जिम्री, के ठीक-ठाक सै?" 32 फेर येहू नै खिड़की की और मुँह ठाकै पूच्छया, "मेरी और कौण सै? कौण?" इसपै दो तीन खोज्यां नै उसकी और झाँक्या। 33 फेर उसनै कह्या, "उसनै नीच्चै गेर द्यो।" आखर म्ह उननै उस ताहीं नीच्चै गेर दिया, अर उसके लहू के किमे छींटे दीवार पै अर किमे घोड़यां पै पड़े, अर उननै उस ताहीं पैरां तै रगड़ दिया। 34 फेर वो भित्तर जाकै खाण-पीण लाग्या; अर कह्या, "जाओ उस श्रापित जनान्नी नै देख ल्यो, अर उसनै माट्टी द्यो; वो तो राजा की बेट्टी सै9:34 राजा की बेट्टी सै अहाब की बिधवा अर यहोराम की माता। येहू नै ईजेबेल को दफन के योग्य न्ही समझा था। पर वो एतबाल सीदोन के राजा की बेट्टी थी आखर राजकुमारी थी।।" 35 जिब वे माणस उसनै माट्टी देण गए, फेर उसकी खोपड़ी पैरां अर हथेळियां नै छोड़कै उसका और किमे ना पाया। 36 आखर म्ह उननै बोहड़कै उसतै कह दिया; फेर उसनै कह्या, "यो यहोवा का वो वचन सै, जो उसनै अपणे दास तिशबी एलिय्याह तै कुह्वाया था, के ईजेबेल का माँस यिज्रेल की धरती म्ह कुत्ते खावैंगे। 37 अर ईजेबेल का शव यिज्रेल की धरती पै खाद की तरियां पड़या रहवैगा, उरै तक के कोए न्ही कहवैगा, ‘या ईजेबेल सै।’"