2 राजाओं 13

यहोआहाज का राज

1 अहज्याह के बेट्टे यहूदा के राजा योआश के राज के तेईसवें साल म्ह येहू का बेट्टा यहोआहाज सामरिया म्ह इस्राएल पै राज करण लाग्या, अर सत्तरा साल तक राज करदा रहया। 2 अर उसनै वो करया, जो यहोवा की नजर म्ह बुरा था यानिके नबात के बेट्टे यारोबाम जिसनै इस्राएल तै पाप कराया था, उसके पापां कै मुताबिक वो करदा रहया, अर उन ताहीं ना छोड्या। 3 ज्यांतै यहोवा का छो इस्राएलियाँ के खिलाफ भड़क उठ्या, अर उसनै उन ताहीं अराम के राजा हजाएल, अर उसके बेट्टे बेन्हदद कै अधीन कर दिया। 4 फेर यहोआहाज यहोवा कै स्याम्ही गिड़गिड़ाया अर यहोवा नै उसकी सुण ली; क्यूँके उसनै इस्राएल पै अंधेर देख्या के अराम का राजा उनपै किसा अंधेर करै था। 5 ज्यांतै यहोवा नै इस्राएल ताहीं एक छुड़ाण आळा दिया*13:5 यहोवा नै इस्राएल ताहीं एक छुड़ाण आळा दिया यहोआहाज के मन फिरान्दे तो न्ही पर उसके मरण के बाद। (2 राजा. 13:25) अर वे अराम के बस तै छूट गे; अर इस्राएली पिछले दिनां कै बराबर फेर अपणे-अपणे डेरयां म्ह रहण लाग्गे। 6 फेर भी वे इसे पापां तै ना मुड़ै, जिसा यारोबाम के घरान्‍ने नै करया, अर जिनके मुताबिक उसनै इस्राएल तै पाप कराए थे: पर उन म्ह चाल्दे रहे, अर सामरिया म्ह अशेरा भी खड़ी रही। 7 अराम के राजा नै यहोआहाज की सेना म्ह तै सिर्फ पचास सवार, दस रथ, अर दस हजार प्यादे छोड़ दिए थे; क्यूँके हजाएल नै उन ताहीं नाश करया, अर रौंद-रौंदकै धूळ म्ह मिल्या दिया था। 8 यहोआहाज के और सारे काम जो उसनै करे, अर उसकी वीरता, ये सारे के इस्राएल के राजयां कै इतिहास की किताब म्ह न्ही लिख्या सै? 9 आखर म्ह यहोआहाज मरकै अपणे पुरखां कै गैल जा मिल्या अर सामरिया म्ह उस ताहीं माट्टी दी गई; अर उसका बेट्टा यहोआश उसकी जगहां पै राज करण लाग्या।

यहोआश का राज्य अर एलीशा की मौत

10 यहूदा के राजा योआश के राज के सैंतीसवें साल म्ह यहोआहाज का बेट्टा यहोआश सामरिया म्ह इस्राएल पै राज करण लाग्या, अर सोळाह साल ताहीं राज करदा रहया। 11 अर योआश नै वो करया जो यहोवा की नजर म्ह बुरा था, यानिके नबात का बेट्टा यारोबाम जिसनै इस्राएल तै पाप कराया था, उसके पापां कै मुताबिक वो करदा रहया, अर उनतै न्यारा ना होया। 12 यहोआश के और सारे काम जो उसनै करे, अर जिस वीरता तै वो यहूदा के राजा अमस्याह तै लड़या, यो सारा के इस्राएल के राजयां कै इतिहास की किताब म्ह न्ही लिख्या सै? 13 अन्त म्ह यहोआश मरकै अपणे पुरखां कै गैल जा मिल्या अर यारोबाम उसकी गद्दी पै विराजमान होया; अर यहोआश ताहीं सामरिया म्ह इस्राएल के राजयां कै बीच माट्टी दी गई। 14 एलीशा नै वो रोग लागग्या जिसतै उसकी मौत होण पै थी, फेर इस्राएल का राजा यहोआश उसकै धोरै गया, अर उसकै उप्पर रो कै कहण लाग्या, "हाय मेरे पिता! हाय मेरे पिता! हाय इस्राएल के रथ अर सवारों!" 15 एलीशा नै उसतै हुक्म दिया, "धनुष अर तीर ले आ।" वो एलीशा कै धोरै धनुष अर तीर ले आया। 16 फेर उसनै इस्राएल के राजा तै कह्या, "धनुष पै अपणा हाथ लगा।" जिब उसनै अपणा हाथ लगाया, फेर एलीशा नै अपणे हाथ राजा के हाथां पै धर दिए। 17 फेर उसनै कह्या, "पूर्व की खिड़की खोल।" जिब उसनै उस ताहीं खोल दिया, फेर एलीशा नै कह्या, "तीर छोड़ दे;" उसनै तीर छोड्या। अर एलीशा नै कह्या, "यो तीर यहोवा की और तै छुटकारै यानिके अराम तै छुटकारै का निशान सै, ज्यांतै तू अपेक शहर म्ह अराम नै उरै तक मार लेवैगा के उनका अन्त कर देगा।" 18 फेर उसनै कह्या, "तीरां नै ले;" अर जिब उसनै उन ताहीं लिया, फेर उसनै इस्राएल के राजा तै कह्या, "धरती पै मार;" फेर वो तीन बार मारकै ठहर ग्या। 19 अर परमेसवर के भगत नै उसपै छो म्ह होकै कह्या*13:19 परमेसवर के भगत नै उसपै छो म्ह होकै कह्या परमेसवर इस्राएल नै सीरिया पर पूर्ण विजय देणा चाहवै था पर योआश नै परमेसवर की प्रतिज्ञा ताहीं पूरी तरियां तै कबूल ना करकै परमेसवर की दया पर रोक लगाई जिसका नतिज्जा यो होया के वो मूल प्रतिज्ञा पूरी न्ही हो पाई।, "तन्‍नै तो पाँच छः बार मारणा चाहिये था। इसा करण तै तो तू अराम नै उरै तक मारदा के उनका अन्त कर देन्दा, पर इब तू उननै तीन ए बार मारैगा।"

20 फेर एलीशा मर ग्या, अर उस ताहीं माट्टी दी गई। हर साल वसन्त ऋतु म्ह मोआब के दल, देश पै आक्रमण करैं थे। 21 लोग किसे माणस नै माट्टी दे रहे थे, के एक दल उननै दिखाई पड़या, फेर उननै उस शव ताहीं एलीशा की कब्र म्ह गेर दिया, अर एलीशा की हड्डियाँ नै छुन्दे वो जी उठ्या*13:21 वो जी उठ्या एलीशा के मरण के बाद का यो चमत्कार उसके जिन्दा रहण के बखत करे गए चमत्कारां तै घणा विसमयकारी था। यहूदी इसनै उसकी सबतै बड़ी महिमा मानण लाग्गे।, अर अपणे पैरां कै बळ खड़या होग्या। 22 यहोआहाज के जीवन भर अराम का राजा हजाएल इस्राएल पै अंधेर ए करदा रहया। 23 पर यहोवा नै उनपै अनुग्रह करया, अर उनपै दया करकै अपणे उस करार के कारण जो उसनै अब्राहम, इसहाक अर याकूब तै करया था, उनपै कृपादृष्टि करी, अर ना तो उनतै नाश करया, अर ना अपणे स्याम्ही तै लिकाड़ दिया।

24 फेर अराम का राजा हजाएल मर ग्या, अर उसका बेट्टा बेन्हदद उसकी जगहां पै राजा बणग्या। 25 फेर यहोआहाज के बेट्टे योआश नै हजाएल के बेट्टे बेन्हदद कै हाथ तै वे नगर फेर ले लिए, जिन ताहीं उसनै युद्ध करकै उसके पिता यहोआहाज कै हाथ तै खोस लिया था। यहोआश नै उस ताहीं तीन बार जीत कै इस्राएल के नगर फेर ले लिए।