1 राजाओं 15

अबिय्याम का राज

1 नबात के बेट्टे यारोबाम के राज के अठारहवें साल म्ह अबिय्याम यहूदा पै राज करण लाग्या। 2 अर वो तीन साल तक यरुशलेम म्ह राज करदा रह्या। उसकी माँ का नाम माका था जो अबशालोम की बेट्टी थी: 3 वो उसे तरियां ए पापां की लीक पै चालदा रह्या जिस तरियां उसके पिता नै उसतै पैहला करे थे अर उसका मन अपणे परमेसवर यहोवा की और अपणे पड़दादा दाऊद की तरियां पूरी तरियां तै सिध्द ना था; 4 फेर भी दाऊद कै कारण उसके परमेसवर यहोवा नै यरुशलेम म्ह उसतै एक दीपक दिया यानिके उसके बेट्टे ताहीं उसकै बाद ठैहराया अर यरुशलेम ताहीं बणाए राख्या। 5 क्यूँके दाऊद वो करया करै था जो यहोवा की नजर म्ह ठीक था अर हित्ती ऊरिय्याह की बात कै अलावा और किसे बात म्ह यहोवा के किसे हुकम तै जीवन भर कदे भी ना मुड़या। 6 रहबाम के जीवन भर उसकै अर यारोबाम कै बीच म्ह लड़ाई होन्दी रह्यी। 7 अबिय्याम के और सारे काम जो उसनै करे, के वो यहूदा के राजयां के इतिहास की किताब म्ह न्ही लिक्खे सैं? अर अबिय्याम की यारोबाम कै गैल लड़ाई होन्दी रह्यी। 8 अबिय्याम मरकै अपणे पुरखां कै गैल जा मिल्या, अर उस ताहीं दाऊदपुर म्ह माट्टी दी गई, अर उसका बेट्टा आसा उसकी जगहां पै राज करण लाग्या।

आसा का राज

9 इस्राएल के राजा यारोबाम के राज्य के बीसवें साल म्ह आसा यहूदा पै राज करण लाग्या; 10 अर यरुशलेम म्ह इकताळीस साल ताहीं राज करदा रह्या, अर उसकी माँ अबशालोम की बेट्टी माका थी। 11 अर आसा नै अपणे मूलपुरुष दाऊद की तरियां वोए करया जो यहोवा की नजर म्ह ठीक था। 12 उसनै तो पुरुषगामियां ताहीं देश म्ह तै लिकाड़ दिया, अर जितनी मूर्ति उसके पुरखां नै बणाई थी उन सारया ताहीं उसनै दूर कर दिया। 13 बलके उसकी माँ माका जिसनै अशेरा कै खात्तर एक घिनोणी मूर्ति बणाई थी उस ताहीं उसनै राजमाता कै पद पै तै उतार दिया, अर आसा नै उसकी मूर्ति ताहीं काट गेरया अर किद्रोन के नाळे म्ह फूँक दिया। 14 पर ऊँच्‍ची जगहां तो ढाई न्ही गई; फेर भी आसा का मन जीवन भर यहोवा की और पूरी तरियां तै लाग्या रह्या। 15 अर जो सोन्‍ना-चाँदी अर बरतन उसके पिता नै अर्पण करे थे, अर जो उसनै खुद अर्पण करे थे, उन सारया ताहीं उसनै यहोवा के भवन म्ह पोंहचा दिया।

16 आसा अर इस्राएल के राजा बाशा कै बिचाळै उनके जीवन भर युद्ध होन्दा रह्या। 17 इस्राएल के राजा बाशा नै यहूदा पै चढ़ाई करी, अर रामाह के नगर ताहीं ज्यांतै दृढ़ करया के कोए यहूदा के राजा आसा कै धोरै आण-जाण ना पावै। 18 फेर आसा नै जितना सोन्‍ना-चाँदी यहोवा के भवन अर राजभवन के भण्डारां म्ह रहग्या था उस सारे ताहीं लिकाड़ अपणे कर्मचारियाँ कै हाथ सौंप कै, दमिश्कवासी अराम के राजा बेन्हदद कै धोरै जो हेज्योन का पोत्ता अर तब्रिम्मोन का बेट्टा था भेजकै यो कह्या, 19 "जिसा मेरे अर तेरे पिता कै बीच म्ह उसाए मेरै अर तेरै बीच म्ह भी करार करया जावै: देख, मै तेरै धोरै चाँदी-सोन्‍ने की भेंट भेज्जू सूं, ज्यांतै आ, इस्राएल के राजा बाशा कै गैल करे अपणे उस करार नै टाळ दे, ताके वो मेरै धोरै तै चल्या जावै।" 20 राजा आसा की या बात मानकै बेन्हदद नै अपणे दलां के प्रधानां तै इस्राएली नगरां पै चढ़ाई करवा कै इय्योन, दान, आबेल्वेत्माका अर सारे किन्‍नेरेत ताहीं अर नप्ताली के सारे देश ताहीं पूरा जीत लिया। 21 यो सुणकै बाशा नै रामाह ताहीं दृढ़ करणा छोड़ दिया, अर तिर्सा म्ह रहण लाग्या। 22 फेर राजा आसा नै सारे यहूदा म्ह प्रचार करवाया अर कोए अणसुण्या ना रह्या, फेर वे रामाह के पत्थरां अर लाकड़ी नै जिनतै बाशा उसनै दृढ़ करै था ठा लेगे, अर उनतै राजा आसा नै बिन्‍यामीन के गेबा अर मिस्पा ताहीं दृढ़ करया। 23 आसा के और काम अर उसकी वीरता अर जो किमे उसनै करया, अर जो नगर उसनै मजबूत करे, यो सारा के यहूदा के राजयां कै इतिहास की किताब म्ह न्ही लिख्या सै? पर उसके बुढ़ापे म्ह तो उसकै पैरां का रोग लागग्या। 24 आसा मरकै अपणे पुरखां कै गैल जा मिल्या, अर उसनै उसके मूलपुरुष दाऊद के नगर म्ह उन्हे कै धोरै माट्टी दी गई अर उसका बेट्टा यहोशापात उसकी जगहां पै राज करण लाग्या।

नादाब का राज।

25 यहूदा के राजा आसा के राज के दुसरे साल म्ह यारोबाम का बेट्टा नादाब इस्राएल पै राज करण लाग्या; अर दो साल ताहीं राज करदा रह्या। 26 उसनै वो काम करया जो यहोवा की नजर म्ह बुरा था अर अपणे पिता के राह पै वोए पाप करदा होया चालदा रह्या जो उसनै इस्राएल तै करवाया था।

27 नादाब सारे इस्राएल समेत पलिश्तियाँ के देश के गिब्बतोन नगर नै घेरे था। अर इस्साकार के गोत्र के अहिय्याह के बेट्टे बाशा नै उसकै खिलाफ राजद्रोह की साजिस करकै गिब्बतोन कै धोरै उस ताहीं मार गेरया। 28 अर यहूदा के राजा आसा के राज्य के तीसरे साल म्ह बाशा नै नादाब ताहीं मार गेरया, अर उसकी जगहां पै राजा बणग्या। 29 राजा बणदे बाशा नै यारोबाम के सारे घरान्‍ने ताहीं मार गेरया; उसनै यारोबाम के वंश ताहीं उरै तक नाश करया के एक भी जिन्दा ना रह्या। यो सारा यहोवा के उस वचन कै मुताबिक होया जो उसनै अपणे दास शीलोवासी अहिय्याह तै कुह्वाया था। 30 यो इस कारण होया के यारोबाम नै खुद पाप करे, अर इस्राएल तै भी करवाऐ थे, अर उसनै इस्राएल के परमेसवर यहोवा ताहीं छो दुवाया था।*15:30 2 शमूएल 11:1-27

31 नादाब के और सारे काम जो उसनै करे, के वो इस्राएल के राजयां कै इतिहास की किताब म्ह न्ही लिक्खे सैं? 32 आसा अर इस्राएल के राजा बाशा कै बीच म्ह तो उनके जीवन भर युद्ध होन्दा रह्या।

बाशा का राज

33 यहूदा के राजा आसा के राज के तीसरे साल म्ह अहिय्याह का बेट्टा बाशा, तिर्सा म्ह सारे इस्राएल पै राज करण लाग्या, अर चौबीस साल ताहीं राज करदा रह्या। 34 अर उसनै वो करया, जो यहोवा की नजर म्ह बुरा था, अर यारोबाम के राह पै वोए पाप करदा रह्या जो उसनै इस्राएल तै करवाया था।