सुलैमान का हृदय परमेसवर की और तै हट जाणा
1 पर राजा सुलैमान फिरौन की बेट्टी, अर भोत सी गैर जात की बिरबानियाँ तै, जो मोआबी, अम्मोनी, एदोमी, सीदोनी, अर हित्ती थी, प्यार करण लाग्या। 2 वे उन जात्तां की थी, जिनकै बारै म्ह यहोवा नै इस्राएलियाँ तै कह्या था, "थम उनकै बिचाळै म्ह ना जाईयो, अर ना वे थारे बीच म्ह आण पावैं, वे थारा मन अपणे देवत्यां की और जरुर मोड़ैगी;" उनकै प्यार म्ह सुलैमान डूब ग्या। 3 उसकै सात सौ राणी, अर तीन सौ रखैल11:3 रखैल या सारी जनान्नी युद्ध जीत लेण कै बाद गुलाम बणा के ल्याई गई थी अर अपणे माल्लिक कै गैल शारीरिक संबन्ध बणाण खात्तर वोए उनका घरआळा होवै था होगी थी अर उसकी इन बिरबानियाँ नै उसका मन बहका दिया। 4 आखर जिब सुलैमान बूढ़ा होया, तब उसकी बिरबानियाँ नै उसका मन पराए देवता की और बहका दिया, अर उसका मन अपणे पिता दाऊद की तरियां अपणे परमेसवर यहोवा पै पूरी तरियां तै लाग्या न्ही रह्या।