3 यो देख एलिय्याह डरकै अपणा प्राण लेकै भाज्या, अर यहूदा के बेर्शेबा नगर ताहीं पोहचकै अपणे सेवक ताहीं ओड़ैए छोड़ दिया।
4 अर एलिय्याह आप बियाबान म्ह एक दिन के राह पै जाकै एक झाऊ के पेड़ कै तळै बैठ ग्या, ओड़ै उसनै न्यू बिनती करकै अपणी मौत माँगी, "हे यहोवा बस, इब मेरा प्राण ले ले, क्यूँके मै अपणे पुरखां तै आच्छा न्ही सूं।" 5 वो झाऊ के पेड़ तळै लेट कै सो ग्या अर देक्खो एक दूत नै उसतै छू कै कह्या, "उठकै खा।" 6 उसनै देखकै के देख्या के मेरै सिरहाणै पत्थरां पै पकी होई एक रोट्टी, अर एक सुराही पाणी धरया सै; फेर उसनै खाया अर पिया अर फेर लेट ग्या। 7 दुसरी बार यहोवा का दूत आया अर उसनै छू कै उसतै कह्या, "उठकै खा, क्यूँके तन्नै घणी लाम्बी यात्रा करणी सै।" 8 फेर उसनै उठकै खाया-पिया; अर उस्से खाणे तै बल पाकै चाळीस दिन-रात चाल्दे-चाल्दे परमेसवर के पर्वत होरेब पै पोहच्या।
9 ओड़ै वो एक गुफा म्ह जाकै टिक्या अर यहोवा का यो वचन उसकै धोरै पोहच्या, "हे एलिय्याह तेरा उरै के काम?" 10 उसनै जवाब दिया, "सेनाओं के परमेसवर यहोवा कै बारै म्ह मन्नै बड़ी जळण होई सै, क्यूँके इस्राएलियाँ नै तेरा करार टाळ दिया, तेरी वेदियाँ ताहीं गिरा दिया, अर तेरे नबियाँ ताहीं तलवार तै घात करया सै, अर मै ए एक्ला रहग्या सूं; अर वे मेरे भी प्राणां के खोजी सैं।" 15 यहोवा नै उसतै कह्या, "लौट कै दमिश्क के बियाबान म्ह जा, अर ओड़ै पोहचकै अराम का राजा होण कै खात्तर हजाएल का अभिषेक कर, 16 अर इस्राएल का राजा होण नै निमशी के पोत्ते येहू का, अर अपणी जगहां पै नबी होण कै खात्तर आबेल-महोला नगर के शापात के बेट्टे एलीशा का अभिषेक करिये। 18 फेर भी मै सात हजार इस्राएलियाँ नै बचाए राक्खूँगा। ये सारे तो वे सैं, जिननै ना तो बाल कै आग्गै घुटने टेक्के, अर ना मुँह तै उस ताहीं चुम्या सै अर न ही आराधना करी सै।"