1 राजाओं 2

दाऊद की मौत अर सुलैमान के राज की शरुआत

1 जिब दाऊद के मरण का बखत धोरै आया, फेर उसनै अपणे बेट्टे सुलैमान तै कह्या, 2 "मै संसार नै छोड़कै जाण आळा सूं ज्यांतै तू हियाव बाँधकै पुरुषार्थ दिख्या। 3 अर जो कुछ तेरे परमेसवर यहोवा नै तेरे तै सौंप्या सै, उसकी हिफाजत करकै उसके राह पै चाल्या करिये अर जिसा मूसा के नियम-कायदा म्ह लिख्या सै, उस्से तरियां उसकी विधियाँ अर हुकमां, अर नियमां, अर चितौनियाँ का पालन करदा रहिये; जिसतै जो किमे तू करै अर जित्त किते तू जावै, उस म्ह तू सफल होवै; 4 अर यहोवा अपणा वो वचन पूरा करै जो उसनै मेरै बारै म्ह कह्या था, ‘जै तेरी औलाद अपणी चाल कै बारै म्ह इस्से तरियां सावधान रहवै, के अपणे पूरे दिल अर पूरे प्राण तै सच्‍चाई कै गैल रोज मेरै स्याम्ही चाल्दे रहवैं फेर तो इस्राएल की राजगद्दी पै विराजण आळे की, तेरे कुल तेरे परिवार म्ह घटी कदे भी न्ही होवैगी।’"

5 "फेर तू खुद जाणै सै, के सरूयाह के बेट्टे योआब नै मेरै गैल के-के करया! यानिके उसनै नेर के बेट्टे अब्नेर, अर येतेर के बेट्टे अमासा, इस्राएल के इन दो सेनापतियाँ तै के-के करया। उसनै उन दोनुआं ताहीं घात करया, अर मेल कै बखत युद्ध का लहू बहाकै उसनै अपणी कमर का कमरबन्द अर अपणे पैरां की जूत्ती भिगो ली। 6 ज्यांतै तू अपणी बुद्धि तै काम लिये अर उस पक्‍के बाळ आळे नै अधोलोक म्ह शान्ति तै उतरण ना दिये। 7 फेर गिलादी बर्जिल्‍लै के बेट्यां पै दया राखिये, अर वे तेरी मेज पै खाण आळयां म्ह रहवैं, क्यूँके जिब मै तेरे भाई अबशालोम कै स्याम्ही तै भाज्या जाऊँ था, जिब उननै मेरै गैल आकै उसाए करया था*2:7 2 शमूएल 17:27। 8 फेर सुण, तेरै धोरै बिन्‍यामीनी गेरा का बेट्टा बहूरीमी शिमी रहवै सै, जिस दिन मै महनैम नगर जाऊँ था उस दिन उसनै मेरे ताहीं कड़ाई तै श्राप*2:8 श्राप 2 राजाओं 2:24 दिया था पर जिब वो मेरे तै मिलण*2:8 तै मिलण 2 राजाओं 19:23 कै खात्तर यरदन नदी पै आया, फेर मन्‍नै उसतै यहोवा की या कसम खाई, के मै तन्‍नै तलवार तै न्ही मारूँगा। 9 पर इब तू इसनै निर्दोष ना ठहराईये, तू तो बुद्धिमान माणस सै; तन्‍नै बेरा सै के उसकै गैल के करणा चाहिये, अर उस पक्‍के बाळ आळे का लहू बहाकै उसनै अधोलोक म्ह तार दिये।" 10 फेर दाऊद अपणे पुरखां कै गैल जा मिल्या अर दाऊदपुर म्ह उस ताहीं माट्टी दी गई।*2:10 प्रेरितों के काम 2:29, 13:36 11 दाऊद नै इस्राएल पै चाळीस साल ताहीं राज करया, सात साल तो उसनै हेब्रोन म्ह अर तैंतीस साल यरुशलेम म्ह राज करया था। 12 फेर सुलैमान अपणे पिता दाऊद की गद्दी पै विराजमान होया अर उसका राज्य भोत मजबूत होया। 13 फेर हग्गीत का बेट्टा अदोनिय्याह, सुलैमान की माँ बतशेबा कै धोरै आया, बतशेबा नै पूच्छया, "के तू मित्रभाव तै आवै सै?" 14 उसनै जवाब दिया, "हाँ, मित्रभाव तै!" फेर वो कहण लाग्या, "मन्‍नै तेरे तै एक बात कहणी सै।" उसनै कह्या, "कह!" 15 उसनै कह्या, "तन्‍नै तो बेरा सै के राज्य मेरे ताहीं मिलणा चाहिए था, अर सारे इस्राएलियाँ की आस मेरै पै थी, के मै राज्य करुँ; पर इब पास्सा पलट ग्या सै अर राज्य मेरे भाई का होग्या सै, क्यूँके वो यहोवा की और तै उसनै मिल्या सै। 16 इस करकै इब मै तेरे तै एक बात कहूँ सूं, मन्‍नै मना ना करिये।" उसनै कह्या, "कहे जा।" 17 उसनै कह्या, "राजा सुलैमान तन्‍नै इन्कार न्ही करैगा; इस करकै उसतै कह, के वो मन्‍नै शूनेमिन अबीशग तै ब्याह दे।" 18 बतशेबा नै कह्या, "आछ्या, मै तेरै खात्तर राजा तै कहूँगी।"

19 फेर बतशेबा अदोनिय्याह के खात्तर राजा सुलैमान तै बातचीत करण खात्तर उसके धोरै गई, अर राजा उसतै मिलण कै खात्तर उठ्या, अर उसनै दण्डवत करकै अपणे सिंहासन पै बैठ ग्या: फेर राजा नै अपणी माँ खात्तर एक सिंहासन धरवा दिया, अर वा उसकी दाहिनी और बैठगी। 20 फेर वा कहण लाग्गी, "मै तेरे तै एक छोट्टी सी बिनती करुँ सूं इस करकै मेरे ताहीं मना ना करिये," राजा नै कह्या, "हे माता माँग; मै तन्‍नै इन्कार न्ही करुँगा।" 21 उसनै कह्या, "वा शूनेमिन अबीशग तेरे भाई अदोनिय्याह तै ब्याह दी जावै।" 22 राजा सुलैमान नै अपणी माँ तै जवाब दिया, "तू अदोनिय्याह कै खात्तर शूनेमिन अबीशग ए क्यूँ माँग्गै सै? उसकै खात्तर राज्य भी माँग, क्यूँके वो तो मेरा बड़ा भाई सै, अर उसे कै खात्तर के! एब्यातार याजक अर सरूयाह के बेट्टे योआब कै खात्तर भी माँग।" 23 अर राजा सुलैमान नै यहोवा की कसम खाकै कह्या, "जै अदोनिय्याह नै या बात अपणे जान पै खेलकै ना कही हो तो परमेसवर मन्‍नै मरण ताहीं तक घात करै। 24 इब यहोवा जिसनै मेरे ताहीं मजबूत करया, अर मेरे पिता दाऊद की राजगद्दी पै बिठाया सै अर अपणे वचन कै मुताबिक मेरा घर बसाया सै, उसके जीवन की कसम आज ए अदोनिय्याह मारया जावैगा।" 25 आखर म्ह राजा सुलैमान नै यहोयादा के बेट्टे बनायाह ताहीं भेज दिया अर उसनै जाकै, उस ताहीं इसा मारया के वो मर ग्या। 26 फेर एब्यातार याजक तै राजा नै कह्या, "अनातोत म्ह अपणी धरती पै जा; क्यूँके तू भी मौत की सजा कै लायक सै। आज कै दिन तो मै तन्‍नै न्ही मारूँगा, क्यूँके तू मेरे पिता दाऊद कै स्याम्ही प्रभु यहोवा का सन्दूक ठाया करै था; अर उन सारे दुखां म्ह जो मेरे पिता पै पड़े थे तू भी दुखी था।" 27 अर सुलैमान नै एब्यातार तै यहोवा के याजक होण के पद पै तै तार दिया, ताके जो वचन यहोवा नै एली के वंश कै बारै म्ह शीलो म्ह कह्या था, वो पूरा हो जावै।*2:27 1 शमूएल 2:27-36 28 इसकी खबर योआब तक पोहची; योआब अबशालोम कै पाच्छै तो न्ही होया था, पर अदोनिय्याह कै पाच्छै हो लिया था। फेर योआब यहोवा के तम्बू म्ह भाज ग्या, अर वेदी के सींगां ताहीं पकड़ लिया। 29 जिब राजा सुलैमान नै या खबर मिली, "योआब यहोवा के तम्बू म्ह भाज ग्या सै, अर वो वेदी कै धोरै सै," फेर सुलैमान नै यहोयादा के बेट्टे बनायाह ताहीं यो कहकै भेज दिया, के तू जाकै उसनै मारदे। 30 फेर बनायाह नै यहोवा के तम्बू कै धोरै जाकै उसतै कह्या, "राजा का यो हुकम सै, के लिकड़ आ।" उसनै कह्या, "ना, मै उरैए मरुँगा।" फेर बनायाह नै लौट कै या खबर राजा ताहीं दी "योआब नै मेरै ताहीं यो जवाब दिया।" 31 राजा नै उसतै कह्या, "उसके कहण कै मुताबिक उसनै मारदे, अर उसनै माट्टी दे; इसा करकै बेकसूरां का जो खून योआब नै करया सै, उसका दोष तू मेरे अर मेरे पिता के कुण्बे पै तै दूर करैगा। 32 अर यहोवा उसके सिर वो खून बोहड़ा देगा क्यूँके उसनै मेरे पिता दाऊद के बिना जाणे अपणे तै घणे धर्मी अर भले दो माणसां पै, यानिके इस्राएल के प्रधान सेनापति नेर के बेट्टे अब्नेर अर यहूदा के प्रधान सेनापति येतेर के बेट्टे अमासा पै टूटकै उन ताहीं तलवार तै मारया था। 33 आखर योआब के सिर पै अर उसकी औलाद के सिर पै खून सदा तक रहवैगा, पर दाऊद अर उसके वंश अर उसके घरान्‍ने अर उसके राज्य पै यहोवा की और तै शान्ति सदा ताहीं रहवैगी।" 34 फेर यहोयादा के बेट्टे बनायाह नै जाकै योआब ताहीं मार गेरया; अर उसतै जंगळ म्ह उसे के घर म्ह माट्टी दी गई। 35 फेर राजा नै उसकी जगहां पै यहोयादा के बेट्टे बनायाह ताहीं प्रधान सेनापति ठैहराया; अर एब्यातार की जगहां पै सादोक याजक ताहीं ठैहराया। 36 फेर राजा नै शिमी ताहीं बुलावा भेज्या, अर उसतै कह्या, "तू यरुशलेम म्ह अपणा एक घर बणाकै ओड़ैए रहिये अर नगर तै बाहर किते ना जाईये। 37 तू पक्‍का जाण ले के जिस दिन तू लिकड़कै किद्रोन नाळे कै पार उतरै, उस्से दिन तू पक्‍का मार दिया जावैगा, अर तेरा लहू तेरे ए सिर पै पड़ैगा।" 38 शिमी नै राजा तै कह्या, "बात ठीक सै; जिसा मेरे प्रभु राजा नै कह्या सै, उसे तरियां ए तेरा दास करैगा।" फेर शिमी घणे दिन यरुशलेम म्ह रह्या। 39 पर तीन साल के बीत्तण पै शिमी के दो दास, गत नगर के राजा माका के बेट्टे आकीश कै धोरै भाजगे, अर शिमी नै या खबर मिली, "तेरे दास गत म्ह सैं।" 40 फेर शिमी उठकै अपणे गधे पै काठ्ठी कसकै, अपणे दास्सां नै ढूँढ़ण कै खात्तर गत म्ह आकीश के धोरै गया, अर अपणे दास्सां ताहीं गत तै ले आया। 41 जिब सुलैमान राजा नै इसकी खबर मिली, "शिमी यरुशलेम तै गत म्ह गया, अर फेर बोहड़ आया सै," 42 फेर उसनै शिमी ताहीं बुलावा भेज्या, अर उसतै कह्या, "के मन्‍नै तेरे ताहीं यहोवा की कसम न्ही खुवाई थी? अर तेरे तै चिताकै न्ही कह्या था, ‘यो पक्‍का जाण ले के जिस दिन तू लिकड़कै किते चल्या जावै, उस्से दिन तू जरुर मार दिया जावैगा?’ अर के तन्‍नै मेरे ताहीं न्ही कह्या था, ‘जो बात मन्‍नै सुणी, वो ठीक सै?’ 43 फेर तन्‍नै यहोवा की कसम अर मेरा दृढ़ हुकम क्यूँ न्ही मान्या?" 44 अर राजा नै शिमी तै कह्या, "तू आप ए अपणे मन म्ह उस सारी दुष्टता नै जाणै सै, जो तन्‍नै मेरे पिता दाऊद तै करी थी? इस करकै यहोवा तेरे सिर पै तेरी दुष्टता बोहड़ा देवैगा। 45 पर राजा सुलैमान धन्य रहवैगा, अर दाऊद का राज्य यहोवा कै स्याम्ही सदा मजबूत रहवैगा।" 46 फेर राजा नै यहोयादा के बेट्टे बनायाह ताहीं हुकम दिया, अर उसनै बाहर जाकै, उस ताहीं इसा मारया के शिमी भी मर ग्या। इस तरियां सुलैमान के हाथ म्ह राज्य मजबूत होग्या।