1 इब पलिश्तियाँ नै युद्ध के खात्तर अपणी सेना ताहीं कठ्ठा करया; अर यहूदा देश के सोको म्ह एक साथ होकै सोको*17:1 सोको सोको अर अजेका यरुशलेम तै तकरीबन तीस किलोमीटर (तकरीबन अठारह मील) दक्षिण-पश्चिमी म्ह मौजूद थे। अर अजेका*17:1 अजेका : अजेका यहूदा के निचले इलाके म्ह एक अर नगर, सोको तै तकरीबन पाँच किलोमीटर (तीन मील) उत्तर म्ह। के बीच एपेसदम्मीम म्ह डेरे डाले। 2 शाऊल अर इस्राएली आदमियाँ नै भी कठ्ठे होकै एला नाम की तराई म्ह डेरे डाले, अर युद्ध के खात्तर पलिश्तियाँ के बिरुध्द पाँति बाँधी। 3 पलिश्ती तो एक और के पहाड़ पै अर इस्राएली दुसरी और के पहाड़ पै खड़े रहे; अर दोनुवां के बीच तराई थी। 4 फेर पलिश्तियाँ की छावणी म्ह तै गोलियत नाम का एक वीर लिकड़या, जो गत नगर का था, अर उसकी लम्बाई छः हाथ एक बित्ता थी। 5 उसके सिर पै पीतळ का टोप था; अर वो एक पत्तर का झिलम पहरे होए था, जिसका तौल पाँच हजार शेकेल*17:5 शेकेल लगभग 57 किलोग्राम पीतळ का था। 6 उसकी टांगाँ पै पीतळ के कवच थे, अर उसके कंध्यां के बीच बरछी बंधी थी। 7 उसके भाले की छड़ जुलाहे के डोंगी के बराबर थी, अर उस भाले का फळ छः सौ शेकेल*17:7 छः सौ शेकेल भाले का सिरा 7 किलोग्राम लोहे का था, अर बड़ी ढाल लिए होए एक जन उसके आगै-आगै चालै था 8 वो खड्या होकै इस्राएली पाँतियां ताहीं ललकार के कह्या, "थमनै उरै आकै लड़ाई के खात्तर क्यूँ पाँति बाँधी सै? के मै पलिश्ती न्ही सूं, अर थम शाऊल के अधीन न्ही सो? अपणे म्ह तै एक माणस चुणो, के वो मेरे गैल उतर आवै। 9 जै वो मेरे तै लड़कै मन्‍नै मार सकै, तब तो हम थारे अधीन हो जावांगे; पर जै मै उसपै प्रबल होकै मारूँ, तो थारै ताहीं म्हारे अधीन होकै म्हारी सेवा करणी पड़ैगी।" 10 फेर वो पलिश्ती बोल्या, "मै आज कै दिन इस्राएली सेना ताहीं ललकारुँ सूं, किसे माणस नै मेरै धोरै भेज्जो, के हम एक दुसरे तै लड़ां।" 11 उस पलिश्ती की इन बात्तां नै सुणकै शाऊल अर सारे इस्राएलियाँ का मन कच्‍चा होग्या, अर वे घणाए डरगे। 12 दाऊद यहूदा के बैतलहम के उस एप्राती माणस का बेट्टा था, जिसका नाम यिशै था, अर उसके आठ बेट्टे थे अर वो माणस शाऊल के दिनां म्ह बूढ़ा अर कमजोर होग्या था। 13 यिशै के तीन बड़े बेट्टे शाऊल के पाच्छै होकै लड़ण ताहीं गए थे; अर उसके तीन बेट्यां के नाम जो लड़ण नै गए थे, ये थे, यानिके जेठ्ठे का नाम एलीआब, दुसरे का अबीनादाब, अर तीसरे का शम्मा था। 14 सबतै छोट्टा दाऊद था; अर तीन्‍नु बड़े बेट्टे शाऊल की सेना कै पाच्छै होकै गए थे, 15 अर दाऊद बैतलहम म्ह अपणे पिता की भेड़-बकरियाँ चराण ताहीं शाऊल के धोरै तै आया-जाया करै था।

16 वो पलिश्ती तो चाळीस दिन ताहीं सुबेरै अर शाम नै धोरै जाकै खड्या होया करै था।

17 यिशै नै अपणे बेट्टे दाऊद तै कह्या, "यो एपा भर*17:17 10 किलोग्राम भून्या होया नाज, अर ये दस रोट्टियाँ लेकै छावणी म्ह अपणे भाईयाँ के धोरै चल्या जा; 18 अर पनीर की ये दस टिकियाँ उनके सहस्त्रपति के खात्तर ले जा। अर अपणे भाईयाँ का हाल-चाल देखकै उनकी कोए निशान्‍नी ले आणा। 19 शाऊल, अर तेरे भाई, अर सारे इस्राएली माणस एला नामकी तराई म्ह पलिश्तियाँ तै लड़ रहे सै।"

20 आखर दाऊद सुबेरै उठ, भेड़-बकरियाँ ताहीं किसे रखवाळे के हाथ म्ह सौंपकै, यिशै के हुकम कै मुताबिक उन चिज्जां नै लेकै चल्या; अर जिब सेना रणभूमि म्ह जा रह्यी, अर संग्राम के खात्तर ललकार रह्यी थी, उसे बखत वो गाड़ियाँ के पड़ाव पै पोहच्या। 21 फेर इस्राएलियाँ अर पलिश्तियाँ नै अपणी-अपणी सेना आम्ही-स्याम्ही करकै पाँति बाँधी। 22 दाऊद अपणी सामग्री सामान के रखवाळे के हाथ म्ह छोड़कै रणभूमि ताहीं दौड़या, अर अपणे भाईयाँ के धोरै जाकै उनका हाल-चाल पूच्छया। 23 वो उनकै गैल बात कर ए रह्या था, के पलिश्तियाँ की पाँतियां म्ह तै वो वीर, यानिके गतवासी गोलियत नाम का वो पलिश्ती योद्धा चढ़ आया, अर पैहले की सी बात कहण लाग्या। अर दाऊद नै उस ताहीं सुण्या।

24 उस माणस ताहीं देखकै सारे इस्राएली घणाए भय खाकै उसके स्याम्ही तै भाज्जे। 25 फेर इस्राएली माणस कहण लाग्गे, "के थमनै उस माणस ताहीं देख्या सै जो चढ़या आ रह्या सै? पक्‍का वो इस्राएलियाँ ताहीं ललकारण ताहीं चढ़या आवै सै; अर जो कोए उसनै मार देवैगा उसनै राजा घणाए धन देवैगा, अर अपणी बेट्टी का ब्याह उसतै कर देवैगा, अर उसके पिता के कुण्बे नै इस्राएल म्ह कर तै मुक्त कर देवैगा।" 26 फेर दाऊद नै उन सैनिकां तै जो उसके आस्सै-पास्सै खड़े थे पूच्छया, "जो उस पलिश्ती नै मारकै इस्राएलियाँ की बदनाम्मी नै दूर करैगा उसके खात्तर के करया जावैगा? वो खतनारहित पलिश्ती के सै के वो जिन्दा परमेसवर की सेना नै ललकारै?" 27 फेर सैनिकां नै दाऊद तै वोए बात कही, यानिके, जो कोए गोलियत नै मारैगा उसतै इसा-इसा करया जावैगा।

28 जिब दाऊद उन माणसां तै बात कर रह्या था, फेर उसका बड़ा भाई एलीआब सुण रह्या था; अर एलीआब दाऊद तै घणा छो म्ह होकै कहण लाग्या, "तू उरै क्यूँ आया सै? अर जंगळ म्ह उन थोड़ी सी भेड़-बकरियाँ नै तू किसकै धोरै छोड़ आया सै? तेरा अभिमान अर तेरे मन की बुराई मन्‍नै बेरा सै; तू तो लड़ाई देखण के खात्तर उरै आया सै।" 29 दाऊद नै कह्या, "इब मन्‍नै के करया सै? के मै बात भी न्ही कर सकदा।" 30 फेर उसनै उसके धोरै तै मुँह फेरकै दुसरे के स्याम्ही होकै उसीए बात कही; अर माणसां नै उसनै पैहले की तरियां जवाब दिया।

31 जिब दाऊद की बात्तां की चर्चा होई, फेर शाऊल नै भी सुणाई गई; अर उसनै उस ताहीं बुलवा भेज्या। 32 फेर दाऊद नै शाऊल तै कह्या, "किसे माणस का मन उसके कारण कच्‍चा ना हो; तेरा दास जाकै उस पलिश्ती तै लड़ैगा।" 33 शाऊल नै दाऊद तै कह्या, "तू जाकै उस पलिश्ती के बिरुध्द युद्ध न्ही कर सकदा; क्यूँके तू तो बाळक ए सै, अर वो बचपन ए तै योद्धा सै।" 34 दाऊद नै शाऊल तै कह्या, "तेरा दास अपणे पिता की भेड़-बकरियाँ चरावै था; अर जिब कोए शेर या भालू झुण्ड म्ह तै मेम्‍ना उठा ले जान्दा, 35 फेर मै उसका पिच्छा करकै उस ताहीं मारदा, अर मेम्‍ने ताहीं उसके मुँह तै छुड़ा लेन्दा; अर जिब वो मेरे पै हमला करदा, तब मै उसके बाळ ताहीं पकड़कै उसनै मार देन्दा। 36 तेरे दास नै शेर अर भालू दोन्‍नु ताहीं मारया सै। अर वो खतनारहित पलिश्ती उनके बराबर हो जावैगा, क्यूँके उसनै जिन्दा परमेसवर की सेना ताहीं ललकारया सै।" 37 फेर दाऊद नै कह्या, "यहोवा जिसनै मेरे ताहीं शेर अर भालू दोनुवां के पंजे तै बचाया सै, वो मन्‍नै उस पलिश्ती के हाथ तै भी बचावैगा।" शाऊल नै दाऊद तै कह्या, "जा, यहोवा तेरे गैल रहवै।" 38 फेर शाऊल नै अपणे सेना के कपड़े दाऊद ताहीं पिहराए, अर पीतळ का टोप उसके सिर पै धर दिया, अर झिलम उस ताहीं पिहराया। 39 फेर दाऊद नै उसकी तलवार कपड़ा के उप्पर कसी, अर चालण की कोशिश करी; उसनै तो उन ताहीं ना परख्या था। ज्यांतै दाऊद नै शाऊल तै कह्या, "इननै पैहरकै मेरे पै चल्या न्ही जान्दा, क्यूँके मन्‍नै इन ताहीं न्ही परख्या सै।" अर दाऊद नै उन ताहीं तार दिया। 40 फेर उसनै अपणी लाठ्ठी हाथ म्ह ली अर नदी म्ह तै पाँच चिकणे पत्थर छाँटकै अपणी चरवाही की थैल्‍ली, यानिके अपणे झोळे म्ह धरे; अर अपणा गोफन हाथ म्ह लेकै पलिश्ती के धोरै गया।

41 अर पलिश्ती चाल्दे-चाल्दे दाऊद के धोरै पोहचण लाग्या, अर जो माणस उसकी बड़ी ढाल लिए था वो उसके आग्गै-आग्गै चाल्या। 42 जिब पलिश्ती नै नजर करकै दाऊद ताहीं देख्या, फेर उसनै तुच्छ जाण्या; क्यूँके वो बाळक ए था, अर उसके मुँह पै लाल्‍ली झलकै थी, अर वो सुथरा था। 43 फेर पलिश्ती नै दाऊद तै कह्या, "के मै कुत्ता सूं, के तू लाठ्ठी लेकै मेरे धोरै आवै सै?" फेर पलिश्ती अपणे देवत्यां के नाम लेकै दाऊद नै कोस्सण लाग्या। 44 फेर पलिश्ती नै दाऊद तै कह्या, "मेरे धोरै आ, मै तेरा माँस अकास के पंछियाँ अर बनपशुआं ताहीं दे दियुँगा।" 45 दाऊद नै पलिश्ती तै कह्या, "तू तो तलवार अर भाला अर सांग लिए होए मेरे धोरै आवै सै; पर मै सेनाओं के यहोवा के नाम तै तेरे धोरै आऊँ सूं, जो इस्राएली सेना का परमेसवर सै, अर उसे ताहीं तन्‍नै ललकारया सै। 46 आज कै दिन यहोवा तन्‍नै मेरे हाथ म्ह कर देवैगा, अर मै तन्‍नै मारूँगा, अर तेरा सिर तेरे धड़ तै न्यारा करुँगा; अर मै आज कै दिन पलिश्ती सेना के शव अकास के पंछियाँ ताहीं दे दियुँगा; फेर सारे पृथ्वी के माणस जाण लेवैगें के इस्राएल म्ह एक सामर्थी परमेसवर सै। 47 अर या सारे मण्डळी जाण लेवैगी के यहोवा तलवार या भाले के जरिये जयवन्त न्ही करदा, ज्यांतै के लड़ाई तो यहोवा की सै, अर वोए तन्‍नै म्हारे हाथ म्ह कर देवैगा।"

48 जिब पलिश्ती उठकै दाऊद का सामना करण के खात्तर धोरै आया, फेर दाऊद सेना की और पलिश्ती का सामना करण के खात्तर फुर्ती तै दौड़या। 49 फेर दाऊद नै अपणी थैल्‍ली म्ह हाथ डालकै उस म्ह तै एक पत्थर लिकाड्या, अर उसनै गोफन म्ह रखकै पलिश्ती के माथे पै इसा मारया के पत्थर उसके माथ्थै के भित्तर घुस ग्या, अर वो धरती पै मुँह के बल गिर पड्या। 50 आखर दाऊद नै पलिश्ती पै गोफन अर एक ए पत्थर के जरिये प्रबल होकै उसनै मार गेरया; पर दाऊद के हाथ म्ह तलवार ना थी। 51 फेर दाऊद भाजकै पलिश्ती के उप्पर खड्या होग्या, अर उसकी तलवार पकड़कै म्यान तै खींची, अर उस ताहीं मार दिया, अर उसका सिर उसे तलवार तै काट दिया। या देखकै के म्हारा वीर मर ग्या पलिश्ती भाजगे। 52 इसपै इस्राएली अर यहूदी माणस ललकार उठे, अर गत अर एक्रोन तै फाटकां ताहीं पलिश्तियाँ का पिच्छा करदे गए, अर घायल पलिश्ती शारैंम के रास्ता म्ह अर गत अर एक्रोन ताहीं गिरदे गए। 53 फेर इस्राएली पलिश्तियाँ का पिच्छा छोड़कै लौट आए, अर उनके डेरां ताहीं लूट लिया। 54 अर दाऊद पलिश्ती का सिर यरुशलेम म्ह लेग्या; अर उसके हथियार अपणे डेरे म्ह राख लिए। 55 जिब शाऊल नै दाऊद ताहीं उस पलिश्ती का सामना करण के खात्तर जान्दे देख्या, फेर उसनै अपणे सेनापति अब्नेर तै पूच्छया, "हे अब्नेर, वो जवान किसका बेट्टा सै?" अब्नेर नै कह्या, "हे राजा, तेरे जीवन की कसम, मै न्ही जाण्दा।" 56 राजा नै कह्या, "तू पूछ ले के वो जवान किसका बेट्टा सै।" 57 जिब दाऊद पलिश्ती ताहीं मारकै बोहड़या, फेर अब्नेर नै उस ताहीं पलिश्ती का सिर हाथ म्ह लिए होए शाऊल के स्याम्ही पोहचाया। 58 शाऊल नै उसतै पूछ्या, "हे जवान, तू किसका बेट्टा सै?" दाऊद नै कह्या, "मै तो तेरे दास बैतलहमवासी यिशै का बेट्टा सूं।"