दाऊद का गत की और भाजणा
10 फेर दाऊद चल्या, अर उसे दिन शाऊल के डर के मारे भाजकै गत21:10 गत पलिश्त क्षेत्र म्ह एक शहर के राजा आकीश के धोरै गया। 11 अर आकीश के कर्मचारियाँ नै आकीश तै कह्या, "के वो उस देश का राजा दाऊद कोनी? के इस्राएली जनानियाँ नै उसके बारै नाचदे-नाचदे एक दुसरे के गैल यो गाणा ना गाया था,
‘शाऊल नै हजारां ताहीं,
अर दाऊद नै लाक्खां ताहीं मारया सै?’"
12 दाऊद नै ये बात अपणे मन म्ह राक्खी, अर गत के राजा आकीश तै घणाए डर ग्या। 13 फेर उसनै उनके स्याम्ही दुसरी चाल चाल्ली, अर उनके हाथ म्ह पड़कै पागल सा, बणग्या; अर फाटक के किवाड़ां पै लकीर खींचण, अर अपणी लाळ अपणी दाढ़ी पै बहाण लाग्या। 14 फेर आकीश नै अपणे कर्मचारियाँ तै कह्या, "देक्खो, वो जन तो पागल सै; थम उसनै मेरे धोरै क्यूँ ल्याए सों? 15 के मेरे धोरै पागलां की किमे कमी सै, के थम उसनै मेरै स्याम्ही पागलपण करण खात्तर लाए सो? के इसा जन मेरे भवन म्ह आण लायक सै?"