Êxodo 1

मिस्र म्ह इस्राएलियाँ की दुर्दशा

1 इस्राएल के बेट्याँ के नाम, जो अपणे-अपणे कुण्बे नै लेकै याकूब कै गेल्या मिस्र देश म्ह आए, वे ये सैं: 2 रूबेन, शिमोन, लेवी, यहूदा, 3 इस्साकार, जबूलून, बिन्‍यामीन, 4 दान, नप्ताली, गाद अर आशेर। 5 अर यूसुफ तो मिस्र देश म्ह पैहल्याए आ लिया था। याकूब की खुद की पीढ़ी म्ह जो पैदा होए वे सारे सत्तर लोग थे। 6 यूसुफ, अर उसके सारे भाई, अर उस पीढ़ी के सारे माणस मरगे थे। 7 पर इस्राएल की सन्तान फूल्‍लण फळण लाग्गी; अर वे घणे ताकतवर बणदे चले गए; अर इतणे घणे बढ़गे के सारे देश भर म्ह फैलगे।

8 भोत साल्‍लां कै बाद मिस्र देश म्ह एक नया राजा गद्दी पै*1:8 राज करण नै बैठ्या जो यूसुफ नै न्ही जाणै था। 9 अर राजा नै अपणी प्रजा तै कह्या, "देक्खो, इस्राएली म्हारै तै गिणती अर ताकत म्ह घणे बढ़गे सैं। 10 इस करकै आओ, हम उनकी गैल होशियारी तै बरताव करां, कदे इसा ना हो के जिब वे घणे बढ़ जावै, अर जै युद्ध का बखत आण पड़ै, तो म्हारै बैरियाँ तै मिलकै म्हारे तै लड़ै अर इस देश तै लिकड़ जावैं।" 11 इस करकै मिस्रियाँ नै उनपै बे-फजूल म्ह राज करण खात्तर अधिकारियां*1:11 अधिकारियां काम करवाण आळा ताहीं नियुक्त करया ताके वे उनपै बोझ गेर-गेरकै उननै दुख दे; इस तरियां उननै फिरौन कै खात्तर पितोम अर रामसेस नाम के भण्डार आळे नगर बणाये। 12 पर जितना मिस्र के लोग इस्राएल के माणसां नै दुख देन्दे गये उसे तरियां वे बढ़दे अर फैलदे चले गए; ज्यांतै वे इस्राएल के माणसां तै घणे डरण लाग्गे थे। 13 फेर भी वे इस्राएली माणसां तै कठोरता तै सेवा करवाण लाग्गे; 14 अर उनके जीवन ताहीं गार, ईट अर खेत्ती के कई ढाळ के काम्मां की ओक्खी सेवा तै दुःखी कर दिया; जिस किसे काम म्ह वे उनतै सेवा करवाया करदे, उस म्ह वे कठोरता का बरताव करया करदे।

15 शिप्रा अर पूआ नाम की दो इब्री दाइयाँ तै मिस्र देश कै राजा नै हुकम दिया, 16 "जिब थम इब्री बिरबानियाँ नै बच्‍चा पैदा होण कै बखत जाप्पै के पत्थरां पै बैठ्ठी देक्खो, फेर जै बेट्टा हो, तो उसनै मार दियो; अर बेट्टी हो, तो जिन्दा रहण दियो।" 17 पर वे दाई परमेसवर का भय मान्या करदी, इस करकै मिस्र देश कै राजा के हुकम ताहीं ना मानकै छोरयां नै भी जिन्दा छोड़ देवै थी। 18 फेर मिस्र देश कै राजा नै उन ताहीं बुलवाकै पूच्छया, "थम छोरयां नै क्यांतै जिन्दा छोड़ द्यो सो, थम इसा क्यूँ करो सो?" 19 दाइयाँ नै फिरौन ताहीं जवाब दिया, "इब्री बिरबान्‍नी मिस्री बिरबानियाँ के जिसी कोनी; वे इसी फुर्तीली सैं के दाइयाँ कै पोहोचण तै पैहल्याए उनकै बाळक पैदा हो ज्या सै।" 20 इस करकै परमेसवर नै दाइयाँ की गैल भलाई करी; इस तरियां तै इस्राएली माणस बढ़कै और भी घणे ताकतवर होगे। 21 इस करकै के दाई परमेसवर का भय मान्या करदी इस करकै परमेसवर नै दाइयाँ के घर बसाए। 22 फेर फिरौन नै अपणी सारी प्रजा के माणसां ताहीं हुकम दिया, "इब्रियाँ के जितने बेट्टे पैदा हों उन सारया नै थम नील नदी म्ह गेर दियो, अर सारी बेट्टियाँ नै जिन्दा छोड़ दियो।"