निर्गमन 32

इस्राएली माणसां का मूर्तिपूजा म्ह फसण का जिक्र

1 जिब माणसां नै देख्या के मूसा नै पहाड़ तै उतरण म्ह देर हो रही सै, फेर वे हारुन कै धोरै कठ्ठे होकै कहण लाग्गे, "इब म्हारै खात्तर देवता बणा, जो म्हारै आग्गै-आग्गै चालै; क्यूँके उस माणस मूसा नै जो म्हारे ताहीं मिस्र देश तै लिकाड़ ले आया सै, हम कोनी जाणदे के उसकै के होया?" 2 हारुन नै उनतै कह्या, "थारी बिरबानियाँ अर बेट्टे बेटियां कै कान्‍नां म्ह सोन्‍ने की जो बाळी सैं उननै तोड़कै उतारो, अर मेरै धोरै ले आओ।" 3 फेर सारे माणसां नै उनकै कान्‍नां तै सोन्‍ने की बाळी तोड़कै उतारी, अर हारुन कै धोरै ले आए। 4 अर हारुन नै उन ताहीं उनकै हाथ तै लिया, अर एक बाछड़े की मूर्ति ढाळकै बणाई। फेर वे कहण लाग्गे, "हे इस्राएल तेरा परमेसवर जो तन्‍नै मिस्र देश तै छुड़ा ल्याया सै वो योए सै।" 5 या देखकै हारुन नै उसकै आग्गै एक वेदी बणवाई; अर यो प्रचार करया के, "कल यहोवा कै खात्तर त्यौहार मनाणा होगा।" 6 अर दुसरे दिन माणसां नै तड़कैए नै उठकै होमबलि चढ़ाए, अर मेलबलि ले आए; फेर बैठकै खाया-पिया, अर उठकै मौज-मस्ती करण लाग्गे।

7 फेर यहोवा नै मूसा तै कह्या, "तळै उतर जा, क्यूँके तेरी प्रजा के माणस, जिन नै तू मिस्र देश तै लिकाड़ ले आया सै, वे बिगड़गे सैं; 8 अर जिस राह पै चाल्‍लण के हुकम मन्‍नै उन ताहीं दिये थे उसनै छोड़कै उननै एक बाछड़े की मूर्ति ढाळकै बणा ली, फेर उस ताहीं दण्‍डवत करया, अर उसकै खात्तर बलिदान भी चढ़ाया, अर यो कह्या सै, ‘हे इस्राएलियों थारा परमेसवर जो थमनै मिस्र देश तै छुड़ा ल्याया सै वो योए सै।’" 9 फेर यहोवा नै मूसा तै कह्या, "मन्‍नै इन माणसां ताहीं देख्या, अर सुण, वे जिद्दी सैं। 10 इब मन्‍नै ना रोक्‍कै, मेरा छो उनपै भड़क उठ्या सै जिसतै मै उननै भस्म करुँ; पर तेरे तै एक बड्डी जात बणाऊँगा।"

11 फेर मूसा अपणे परमेसवर यहोवा नै यो कहकै मनाण लाग्या, "हे यहोवा, तेरा छो अपणी प्रजा पै क्यूँ भड़क्या सै, जिसनै तू बड़े सामर्थ अर बलवन्त हाथ कै जरिये मिस्र देश तै लिकाड़ ल्याया सै? 12 मिस्री माणस न्यू क्यूँ कहण पावै, ‘वो उननै बुरे मकसद तै, यानिके पहाड़ां म्ह घात करकै धरती पै तै भी मिटा देण की इच्छा तै लिकाड़ लेग्या?’ तू अपणे भड़के होए छो नै ठण्डा कर, अर अपणी प्रजा नै इसा नुकसान पोहोचाण तै मन बदल ले। 13 अपणे दास अब्राहम, इसहाक, अर याकूब नै याद करकै, जिनतै तन्‍नै अपणी ए कसम खाकै यो कह्या था, ‘मै थारे वंश नै अकास के तारयां की तरियां घणा करुँगा, अर यो सारा देश जिसका मन्‍नै जिक्र करया सै थारे वंश नै दियुँगा, के वो उसके हकदार सदा बणे रहवैं।’" 14 फेर यहोवा अपणी प्रजा का नुकसान करण तै जो उसनै कह्या था पछताया।

15 फेर मूसा पलटकै करार की दोन्‍नु तख्तियाँ नै हाथ म्ह लिये होए पहाड़ पै तै उतर ग्या, उन तख्तियाँ कै तो आस्सै-पास्सै दोन्‍नु ओड़ म्ह लिख्या होया था। 16 अर वे तख्तियाँ परमेसवर की बणाई होई थी, अर उनपै जो खोदकै लिख्या होया था वो खुद परमेसवर नै अपणे हाथ तै लिख्या होया था।

17 जिब यहोशू नै माणसां के रोळे का शब्द सुणाई दिया, फेर उसनै मूसा तै कह्या, "छावणी तै लड़ाई बरगी आवाज सुणाई देवै सै।" 18 मूसा नै कह्या, "वा जो आवाज सै ना तो जीत्तण आळयां की सै, अर ना हारण आळयां की, मन्‍नै तो गाणे का शब्द सुणाई पड़ै सै।" 19 छावणी कै धोरै आन्दे ए मूसा नै वा बाछड़े की मूर्ति अर नाच-गाणा दिखाई दिया, फेर मूसा का छो भड़क उठ्या, अर उसनै करार की तख्तियाँ ताहीं अपणे हाथ्थां तै पहाड़ कै तळै पटककै तोड़ दी। 20 फेर उसनै उनकै बणाए होए बाछड़े की मूर्ति लेकै आग म्ह गेर कै फूँक दी। अर पिस कै चूर-चूर कर दी, अर उस ताहीं पाणी कै उप्पर फेंक दिया, अर इस्राएली माणसां नै उस ताहीं प्या दिया।

21 फेर मूसा हारुन तै कहण लाग्या, "उन माणसां नै तेरे तै के करया के तन्‍नै उन ताहीं इतणे बड़े पाप म्ह फँसाया?" 22 हारुन नै जवाब दिया, "मेरे प्रभु का छो ना भड़कै; तू तो उन माणसां नै जाणै सै के वे बुराई करण म्ह मन लगाऐ रहवै सैं। 23 अर उननै मेरै तै कह्या, ‘म्हारै खात्तर देवता बणवा जो म्हारै आग्गै-आग्गै चालै; क्यूँके उस मूसा नै, जो हमनै मिस्र देश तै छुड़ा ल्याया सै, हम न्ही जाणदे के उसकै के होया?’ 24 फेर मन्‍नै उनतै कह्या, ‘जिस-जिसकै धोरै सोन्‍ने के गहणे हों, वे उननै तोड़कै उतार ल्यावैं;’ अर जिब उननै मेरै तै दिये, मन्‍नै उन ताहीं आग म्ह गेर दिया, फेर बाछड़े की मूर्ति लिकड़ आई।"

25 मूसा नै देख्या के हारुन नै उन माणसां ताहीं मनमान्‍नी करण दी थी अर वे अपणे-आप हद तै लिकड़गे सै ताके वे बिरोधियाँ कै बीच म्ह मजाक लायक बणगे, 26 फेर मूसा नै छावणी कै स्याम्ही खड़े होकै कह्या, "जो कोए यहोवा की ओड़ का सै, वो मेरै धोरै आवै;" फेर सारे लेवीय उसकै धोरै कठ्ठे होगे। 27 फेर उसनै उन माणसां तै कह्या, "इस्राएल का परमेसवर यहोवा यो कहवै सै, के अपणी-अपणी जाँघ पै तलवार लटकाकै छावणी के एक बारणै तै दुसरे बारणै तक घूम-घूमकै अपणे-अपणे भाईयाँ, संगियां, अर पड़ोसियाँ नै घात करो।" 28 मूसा के इस वचन कै मुताबिक लेवियाँ नै करया अर उस दिन तीन हजार कै करीब माणस मारे गये। 29 फेर मूसा नै कह्या, "आज कै दिन यहोवा कै खात्तर अपणा याजक पद की विधि करो, बल्के अपणे-अपणे बेट्टयाँ अर भाईयाँ कै भी खिलाफ होकै इसा करो जिसतै वो आज थमनै आशीष देवै।"

30 दुसरे दिन मूसा नै माणसां तै कह्या, "थमनै बड़ा ए पाप करया सै। इब मै यहोवा कै धोरै चढ़ ज्याऊँगा; हो सकै सै के मै थारे पाप का प्रायश्चित कर सकूँ।" 31 फेर मूसा यहोवा कै धोरै जाकै कहण लाग्या, "हाय, हाय, उन माणसां नै अपणे खात्तर सोन्‍ने का देवता बणवाकै बड़ा भयानक पाप करया सै। 32 फेर भी इब तू उनका पाप माफ कर न्ही तो अपणी लिक्खी होई किताब म्ह तै मेरा नाम नै भी काट दे।" 33 यहोवा नै मूसा तै कह्या, "जिसनै मेरै खिलाफ पाप करया सै उस्से का नाम मै अपणी किताब म्ह तै काट दियुँगा। 34 इब तो तू जाकै उन माणसां नै उस जगहां म्ह ले चाल जिसका जिक्र मन्‍नै तेरे तै करया था; देख मेरा दूत तेरै आग्गै-आग्गै चाल्‍लैगा। पर जिस दिन मै सजा देण लाग्गूँगा उस दिन उननै इस पाप की भी सजा दियुँगा।"

35 आखर म्ह यहोवा नै उन माणसां पै बिप्दा भेज्जी, क्यूँके हारुन के बणाए होए बाछड़े की मूर्ति ताहीं उननै ए बणवाया था।