1 फेर मूसा अर इस्राएलियाँ नै यहोवा कै खात्तर यो गीत गाया। उननै कह्या,

"मै यहोवा का गीत गाऊँगा, क्यूँके वो महाप्रतापी ठहरया सै;

घोड़यां समेत सवारां ताहीं उसनै समुन्दर म्ह गेर दिया सै।

2 यहोवा मेरा जोर अर भजन का कारण सै,

अर वोए मेरा उद्धार भी ठहरया सै;

मेरा परमेसवर वोए सै, मै उसे की स्तुति करुँगा,

(मै उसकी खात्तर निवास-स्थान बणाऊँगा), मेरे पूर्वजां का परमेसवर वोए सै,

मै उस ताहीं सराहूँगा।

3 यहोवा योद्धा सै;

उसका नाम यहोवा सै।

4 फिरौन कै रथां अर सेना ताहीं उसनै समुन्दर म्ह गेर दिया;

अर उसके बढ़िया तै बढ़िया महारथी लाल समुन्दर म्ह डूबगे

5 गहरे पाणी नै उन ताहीं ढक लिया;

वे पत्थर की तरियां ढुंघी जगहां म्ह डूबगे

6 हे यहोवा, तेरा सोळा हाथ शक्ति म्ह महाप्रतापी होया हे यहोवा,

तेरा सोळा हाथ दुश्मन ताहीं चकणाचूर कर देवै सै।

7 तू अपणे बिरोधियाँ नै अपणे महाप्रताप तै गिरा देवै सै;

तू अपणा छो भड़कावै, अर वे घास की तरियां भस्म हो ज्या सैं।

8 तेरे नाक की साँस तै पाणी कठ्ठा होग्या,

धाराएँ ढेर की तरियां थमगी;

समुन्दर कै बीच म्ह ढुंघा पाणी जम ग्या।

9 बैरी नै कह्या था,

मै पिच्छा करुँगा, मै जा पकड़ूँगा,

मै लूट के माळ नै बाँट ल्यूँगा,

उनतै मेरा जी भर ज्यागा।

मै अपणी तलवार खीचदे ए अपणे हाथ तै उन ताहीं नाश कर दियुँगा।

10 तन्‍नै अपणी साँस तै हवा चलाई,

फेर समुन्दर नै उन ताहीं ढक लिया;

वे समुन्दर म्ह सीसे की तरियां डूबगे

11 हे यहोवा, देवत्यां म्ह तेरे बराबर कौण सै?

तू तो पवित्रता कै कारण महाप्रतापी,

अर अपणी स्तुति करण आळयां के भय कै लायक,

अर अचम्भे कै काम का करण आळा सै।

12 तन्‍नै अपणा सोळा हाथ बढ़ाया,

अर धरती नै उन ताहीं निगळ लिया सै।

13 अपणी करुणा तै तन्‍नै अपणी छुड़ाई होई प्रजा की अगुवाई करी सै,

अपणी ताकत तै उसनै अपणे पवित्र निवास-स्थान म्ह ले चाल्या सै।

14 देश-देश के माणस सुणकै काँप उठैगें;

पलिश्तियाँ की जान के लाल्‍ले पड़ ज्यागें।

15 एदोम कै अधिकारी परेशान होवैगें;

मोआब के पहलवान थरथरा उठैगें;

सारे कनान म्ह रहण आळयां के मन पिंघळ ज्यागें।

16 उन म्ह डर अर घबराहट समा जावैगी;

तेरी बाजूआं की ताकत तै वे पत्थर की तरियां अणबोल हो ज्यागें,

जिब ताहीं, हे यहोवा, तेरी प्रजा के माणस लिकड़ ना जावै,

जिब ताहीं तेरी प्रजा के माणस जिन ताहीं तन्‍नै मोल लिया सै पार ना लिकड़ जावै।

17 तू उननै पहुँचाकै अपणे खुद के पहाड़ पै बसावैगा,

योए वा जगहां सै,

हे यहोवा जिस ताहीं तन्‍नै अपणे निवास के खात्तर बणाया,

अर वोए पवित्र स्‍थान सै जिस ताहीं,

हे प्रभु, तन्‍नै आप ए मजबूत करया सै।

18 यहोवा सदा सर्वदा राज्य करदा रहवैगा।"

19 यो गीत गाण का कारण या सै, के फिरौन कै घोड़े रथ अर सवारां सुधा समुन्दर कै बिचाळै चले गए, अर यहोवा उनकै उप्पर समुन्दर का पाणी बोहड़ा ले आया; पर इस्राएली समुन्दर कै बिचाळै सूक्खी जमीन पै होकै चाल्‍ले।

20 फेर हारुन की भाण मरियम नाम की नबिया नै हाथ म्ह डफ लिया; अर सारी बिरबान्‍नी डफ लिये नाचदी होई उसकै पाच्छै हो ली। 21 अर मरियम उनकै गेल्या या टेक गान्दी गई के:

"यहोवा का गीत गाओ, क्यूँके वो महाप्रतापी ठहरया सै;

घोड़यां समेत सवारां ताहीं उसनै समुन्दर म्ह गेर दिया सै।"

22 फेर मूसा इस्राएल के माणसां ताहीं लाल समुन्दर तै आग्गै लेग्या, अर वे शूर नाम के जंगळ-बियाबान म्ह आए; अर जंगळ-बियाबान म्ह जान्दे होए तीन दिन तक पाणी का सोत्ता ना मिल्या। 23 फेर मारा नाम की एक जगहां पै पोहचे, ओड़ै का पाणी खारा था, उस ताहीं वे न्ही पी सके; इस कारण उस जगहां का नाम मारा* पड्या। 24 फेर वे न्यू कहकै मूसा कै खिलाफ बड़बड़ाण लाग्गे, "हम के पीवां?" 25 फेर मूसा नै यहोवा के नाम की दुहाई दी, अर यहोवा नै उस ताहीं एक पौधा बता दिया, जिस ताहीं जिब उसनै पाणी म्ह गेरया, फेर वो पाणी मिठ्ठा होग्या। ओड़ैए यहोवा नै उनकै खात्तर एक विधि अर नियम बणाया, अर ओड़ैए उसनै न्यू कहकै उनकी परीक्षा करी, 26 "जै तू अपणे परमेसवर यहोवा का वचन तन-मन तै सुणै, अर जो उसकी निगांह म्ह सही सै वोए करै, अर उसके हुकमां पै कान लगावै अर उसकी सारी विधियाँ नै मान्‍नै, तो जितने रोग मन्‍नै मिस्रियाँ पै भेज्जे सैं, उन म्ह तै एक भी तेरे पै न्ही भेज्जूँगा; क्यूँके मै थारा ठीक करण आळा यहोवा सूं।"

27 फेर वे एलीम नाम की जगहां म्ह आए, जड़ै पाणी के बारहा सोत्ते अर सत्तर खजूर कै पेड़ थे; अर ओड़ै उननै पाणी कै धोरै डेरे खड़े करे।