1 "फेर मिलापआळे तम्बू कै खात्तर दस पड़दे बणवाईये; उननै बटी होई सणी आळे अर नीले, बैंगणी अर लाल रंग के कपड़े की कढ़ाई के काम करे होए करूबां कै गेल्या बणवाईये। 2 एक-एक पड़दे की लम्बाई अट्ठाईस हाथ अर चौड़ाई च्यार हाथ की हो; सारे पड़दे एक ए नाप के हों। 3 पाँच पड़दे एक-दुसरयां तै जुड़े होए हों; अर फेर जो पाँच पड़दे रहवैंगें वे भी एक-दुसरयां तै जुड़े होए हों। 4 अर जित्त ये दोन्‍नु पड़दे जोड़े जावै उड़ै के दोन्‍नु किनारयाँ पै नीले-नीले फंदे लगवाईये। 5 दोन्‍नु किनारयाँ म्ह पचास-पचास फंदे इसे लगवाईये के वे आम्ही-स्याम्ही हों। 6 अर सोन्‍ने के पचास कुण्डे* बणवाईये; अर पड़द्यां के छल्यां ताहीं कुण्ड्याँ कै जरिये एक-दुसरयां तै इसा जुड़वाईये के मिलापआळा तम्बू मिलकै एक ए हो जावै।"

7 "फेर निवास स्थान कै उप्पर तम्बू का काम देण कै खात्तर बकरी के बाळ के ग्यारह पड़दे बणवाईये। 8 एक-एक पड़दे की लम्बाई तीस हाथ अर चौड़ाई च्यार हाथ की हो; ग्यारहां पड़दे एक ए नाप के हों। 9 अर पाँच पड़दे एक साथ अर दुसरे छः पड़द्यां नै भी न्यारे जुड़वाईये, अर छट्टे पड़दे नै तम्बू कै स्याम्ही मोड़कै दोहरा कर दिये। 10 अर पचास कुण्डे उस पड़दे के सिरे म्ह जो बाहर तै मिलाया जावैगा अर पचास ए कुण्डे दुसरी ओड़ कै पड़दे के सिरे म्ह जो बाहर तै मिलाया जावैगा बणवाईये। 11 पीत्तळ के पचास कुण्डे बणावाईये, अर कुण्ड्याँ ताहीं फंद्या म्ह लगाकै तम्बू नै इसा जुड़वाईये के वो मिलकै एक ए हो जावै। 12 अर तम्बू कै पड़द्यां का नीच्‍चै लटक्या होया हिस्सा, यानिके जो आध्धा पट रहवैगा, वो मिलापआळे तम्बू कै पाच्छली ओड़ लटक्या रहवै। 13 अर तम्बू के पड़द्यां की लम्बाई म्ह तै एक हाथ जितनी उरै नै, अर एक हाथ जितनी परै नै मिलापआळे तम्बू नै ढकण कै खात्तर उसकी दोन्‍नु ओड़ पै लटक्या होया रहवै। 14 फेर तम्बू कै खात्तर लाल रंग तै रंगी होई मिंढयाँ की खाल का एक ओढ़णा अर उसकै उप्पर सुइसां की खाल का भी एक ओढ़णा बणवाईये।"

15 "फेर मिलापआळे तम्बू नै खड्या करण कै खात्तर किक्‍कर की लाकड़ी कै तख्तें बणवाईये। 16 एक-एक तख्तें की लम्बाई दस हाथ अर चौड़ाई डेढ़ हाथ की हो। 17 एक-एक तख्तें म्ह एक-दुसरयां तै जुड़ी होई दो-दो चूळें हों; निवास के सारे तखत्याँ नै इस्से ढाळ तै बणवाईये। 18 अर निवास के खात्तर जो तख्तें तू बणवावैगा उन म्ह तै बीस तख्तें तो दक्षिण की ओड़ कै खात्तर हों; 19 अर बीस तखत्याँ कै तळै चाँदी की चाळीस पत्ती बणवाईये, यानिके हरेक तख्तें कै तळै उसकै चूळां कै खात्तर दो पावे। 20 अर मिलापआळे तम्बू की दुसरी और, यानिके उत्तर की ओड़ बीस तख्तें बणवाईये। 21 अर उनकै खात्तर चाँदी के चाळीस पावे बणवाईये, यानिके एक-एक तख्तें कै तळै दो पावे हों। 22 अर मिलापआळे तम्बू की पाच्छली ओड़, यानिके पश्चिम ओड़ कै खात्तर छः तख्तें बणवाईये। 23 अर पाच्छले हिस्से म्ह मिलापआळे तम्बू के कुण्यां कै खात्तर दो तख्तें बणवाईये; 24 अर ये तळै तै अलग-अलग हों, पर उप्पर दोन्‍नु हिस्यां कै सिरे एक-एक कड़े म्ह मिलाये जावैं; दोन्‍नु तखत्याँ का योए रूप हो; ये तो दोन्‍नु कुण्यां कै खात्तर हों। 25 अर आठ तख्तें हों, अर उनकी चाँदी के सोलह पावे होंगे; क्यूँके एक तख्तें कै तळै दो पावे हों।"

26 "फेर किक्‍कर की लाकड़ी कै बेंड़े बणवाईये, यानिके तम्बू की एक ओड़ के तखत्याँ कै खात्तर पाँच, 27 अर तम्बू की दुसरी ओड़ कै तखत्याँ कै खात्तर पाँच बेंड़े, अर मिलापआळे तम्बू का जो हिस्सा पश्चिम की ओड़ पाच्छले हिस्से म्ह होवैगा, उसकै खात्तर पाँच बेंड़े बणवाईये। 28 बीच आळा बेंड़ा जो तखत्याँ कै बीच म्ह होवैगा वा तम्बू के एक सिरे तै दुसरे सिरे तक पोहचे। 29 फेर तखत्याँ नै सोन्‍ने तै मढ़वाईये, अर उनके कड़े जो बेंड़याँ कै घरां का काम देवैंगे उननै भी सोन्‍ने के बणवाईये; अर बेंड़याँ नै भी सोन्‍ने तै मढ़वाईये। 30 अर निवास नै इस तरियां खड़या करिये जिसा इस पहाड़ पै तेरे ताहीं दिखाया गया सै।"

31 "फेर नीले, बैंगणी अर लाल रंग के अर बटी होई सूक्ष्म सणी आळे कपड़े का एक बीच आळा पड़दा बणवाईये; वो कढ़ाई कै काम करे होए करूबां कै गैल बणे। 32 अर उसनै सोन्‍ने तै मढ़े होए किक्‍कर के च्यार खम्भ्यां पै लटकाईये, इनकी कुण्डी सोन्‍ने की हों, अर ये चाँदी के च्यार पायां पै खड़ी रहवै। 33 अर बीच आळे पड़दे नै कुण्डीयाँ कै तळै लटकाकै, उसकी आड़ म्ह साक्षीपत्र का सन्दूक भित्तर ले जाईये; इस करकै वो बीच आळा पड़दा थारे खात्तर पवित्र स्‍थान नै परमपवित्र स्‍थान तै न्यारा करे राक्खै। 34 फेर परमपवित्र स्‍थान म्ह साक्षीपत्र कै सन्दूक कै उप्पर प्रायश्चित कै ढक्‍कण नै धरिये। 35 अर उस पड़दे कै बाहर निवास के उत्तर दिशा की ओड़ मेज धरिये; अर उसकै दक्षिण दिशा की ओड़ मेज कै स्याम्ही दीवट धरिये।"

36 "फेर तम्बू के दरबाजे कै खात्तर नीले, बैंगणी अर लाल रंग के अर बटी होई सूक्ष्म सणी आळे कपड़े की कढ़ाई का काम करया होया एक पड़दा बणवाईये। 37 अर इस पड़दे कै खात्तर किक्‍कर कै पाँच खम्भे बणवाईये, अर उननै सोन्‍ने तै मढ़वाईये; उनकी कड़ी सोन्‍ने की हों, अर उनकै खात्तर पीत्तळ के पाँच पावे ढळवाकै बणवाईये।"