निर्गमन 28

याजकां के पवित्र कपड़े

1 "फेर परमेसवर यहोवा नै मूसा तै यो हुकम दिया के तू इस्राएलियाँ म्ह तै अपणे भाई हारुन, अर नादाब, अबीहू, एलीआजर अर ईतामार नाम के उसके बेट्याँ नै अपणे धोरै ले आईये ताके वे मेरै खात्तर याजक का काम करैं। 2 अर तू अपणे भाई हारुन खात्तर वैभव अर शोभा के खात्तर पवित्र पोशाक बणवाईये। 3 अर जितन्या तै मन्‍नै बुद्धि की आत्मा तै भरपूर करया सै, उननै तू हारुन की पोशाक बणाण का हुकम दे ताके वो मेरे याजक का काम करण कै खात्तर पवित्र अर अलग तै दिखाई दे। 4 अर जो पोशाक उननै बणाणी होवैगी वे ये सैं, यानिके सीनाबन्ध; अर एपोद, अर बागा, चारखान्‍ने का अंगरखा, पुरोहित का टोप, अर कमरबन्द; येए पवित्र पोशाक तेरे भाई हारुन अर उसके बेट्याँ कै खात्तर बणवाईये ताके वे मेरै खात्तर याजक का काम कर सकै। 5 अर वे सोन्‍ने अर नीले अर बैंगणी अर लाल रंग का अर सूक्ष्म सणी का कपड़ा लेवै।"

एपोद अर पटका

6 "वे एपोद नै सोन्‍ने, अर नीले, बैंगणी अर लाल रंग के कपड़े का अर बटी होई सूक्ष्म सणी के कपड़े का बणावै, जो के कढ़ाई के काम करण आळे माहिर हो। 7 अर वो इस तरियां तै जोड़या जावै के उसके दोन्‍नु कंध्यां के सिरे आप्पस म्ह मिले रहवैं। 8 अर एपोद पै जो काढ्या होया पटका होवैगा उसकी बणावट उस्से की ढाळ हों, अर वे दोन्‍नु बिना जोड़कै हों, अर सोन्‍ने अर नीले, बैंगणी अर लाल रंग आळे अर बटी होई सूक्ष्म सणी आळे कपड़े के हों। 9 फेर दो सुलैमानी मणि लेकै उनपै इस्राएल के बेट्याँ के नाम खुदवाईये, 10 उनके नाम्मां म्ह तै छः तो एक मणि पै, अर बाकी छः नाम दुसरी मणि पै, इस्राएल के बेट्याँ की पैदाईस कै मुताबिक खुदवाईये। 11 एक सुनार की तरियां जो मणि कै उप्पर नक्‍काशी करै सै, उस्से तरियां ए उन दोन्‍नु मणियाँ पै इस्राएल के बेट्याँ के नाम खुदवाईये; अर उननै सोन्‍ने के खान्‍नयां म्ह जड़वा दिये। 12 अर दोन्‍नु मणियाँ नै एपोद के कंध्यां पै लगवाईये, वे इस्राएलियाँ कै बारै म्ह याद दिवाण आळी मणि ठहरैगी; यानिके हारुन उनकै नाम यहोवा कै आग्गै अपणे दोन्‍नु कंध्यां पै यादगार कै तौर पै लगाये रहवै।"

13 "फेर सोन्‍ने के खांचे बणवाईये, 14 अर रस्सियाँ की ढाळ गूँथी होई दो जंजीर शुद्ध सोन्‍ने की बणवाईये; अर गूँथी होई जंजीरां नै उन खांच्यां म्ह जड़वाईये।"

सीनाबन्ध या चपरास

15 "फेर न्याय की चपरास नै भी कढ़ाई के काम का बणवाईये; एपोद की ढाळ सोन्‍ने, अर नीले, बैंगणी अर लाल रंग के अर बटी होई सूक्ष्म सणी के कपड़े की उस ताहीं बणवाईये। 16 वा चकोर अर दोहरी हो, अर उसकी लम्बाई अर चौड़ाई एक-एक बिल्यांत की हो। 17 अर उस म्ह च्यार कतार म्ह मणि जड़वाईये। पैहली कतार म्ह तो माणिक्य, पदमराग अर लालड़ी हों; 18 दुसरी कतार म्ह मरकत, नीलमणि अर हीरा; 19 तीसरी कतार म्ह लशम, सुलैमानी पत्थर अर नीलम; 20 अर चौथी कतार म्ह फीरोजा, सुलैमानी मणि अर यशब हों; ये सारे सोन्‍ने के खांच्यां म्ह जड़े जावैं। 21 अर इस्राएल कै बेट्याँ के जितने नाम सैं उतणी मणि हों, यानिके उनकै बारहा नाम्मां की गिणती कै मुताबिक मणि पै एक छाप्पा जिसा उनपै नाम खोद्या जावै सै। 22 फेर चपरास पै रस्सियाँ की ढाळ गूँथी होई शुद्ध सोन्‍ने की जंजीर लगवाईये; 23 अर चपरास म्ह सोन्‍ने की दो कड़ी लगवाईये, अर दोन्‍नु कड़ियाँ नै चपरास के दोन्‍नु सिरयां पै लगवाईये। 24 अर सोन्‍ने की दोन्‍नु गूँथी जंजीरां नै उन दोन्‍नु कड़ियाँ म्ह जो चपरास कै सिरयां पै हो लगवाईये; 25 अर गूँथी होई दोन्‍नु जंजीरां के दोन्‍नु बाकी सिरयां नै दोन्‍नु खांच्यां म्ह जड़वा कै एपोद के दोन्‍नु कंध्यां के बन्धनां पै उसकै स्याम्ही लगवाईये। 26 फेर सोन्‍ने की दो और कड़ी बणवाईये ताके चपरास के दोन्‍नु सिरयां पै, उसकी उस कोर पै जो एपोद कै भित्तर की ओड़ होगी लगवाईये। 27 फेर उनकै सिवा सोन्‍ने की दो और कड़ी बणवाईये जो एपोद के दोन्‍नु कंध्यां के बन्धनां पै, तळै तै उनकै स्याम्ही अर उसके जोड़कै धोरै एपोद के काढ़े होए पटके कै उप्पर लगवाईये। 28 अर चपरास अपणी कड़ियाँ कै जरिये एपोद की कड़ियाँ म्ह नीले फित्ते तै बाँध्धी जावै, इस तरियां वा एपोद के काढ़े होए पटके पै बणी रहवै, अर चपरास एपोद पै तै न्यारे ना होण पावै। 29 अर जिब-जिब हारुन पवित्र स्‍थान म्ह दाखल होवै, तब-तब वो न्याय की चपरास पै अपणे हृदय कै उप्पर इस्राएली गोत्रां के नाम्मां नै लगाये रहवै, जिसतै यहोवा कै स्याम्ही उनकी याद सदा बणी रहवै। 30 अर तू न्याय की चपरास म्ह ऊरीम अर तुम्मीम*28:30 ऊरीम अर तुम्मीम ऊरीम अर तुम्मीम परमेसवर की इच्छा जाणण खात्तर था। नै राखिये, अर जिब-जिब हारुन यहोवा कै स्याम्ही दाखल होवै, तब-तब वे उसके हृदय कै उप्पर हों; इस तरियां हारुन इस्राएलियाँ कै खात्तर यहोवा के न्याय नै अपणे हृदय कै उप्पर यहोवा कै स्याम्ही सदा लगाये रहवै।"

दुसरे याजकीय कपड़े

31 "फेर एपोद के बागे नै पूरा नीले रंग का बणवाईये। 32 उसकी बणावट इसी हो के उसकै बिचाळै सिर पाण कै खात्तर छेद हो, अर उस छेद के चौगरदे बख्तर के छेद की तरियां एक बुणी होई कोर हो के वा पाट्टण ना पावै। 33 अर उसकै नीच्‍चै आळे घेरे म्ह चौगरदे नीले, बैंगणी अर लाल रंग के कपड़े के अनार बणवाईये, अर उनकै बिचाळै चौगरदे सोन्‍ने की घंटी लगवाईये, 34 यानिके एक सोन्‍ने की घंटी अर एक अनार, फेर एक सोन्‍ने की घंटी अर एक अनार, इस्से तरियां बागे के नीच्‍चै आळे घेरे म्ह चौगरदे इसाए हो। 35 अर हारुन उस बागे नै सेवा-पाणी करण कै बखत पैहरैगा, ताके जिब-जिब वो पवित्र स्‍थान कै भित्तर यहोवा कै स्याम्ही जावै, या बाहर लिकड़ै, तब-तब उसका शब्द सुणाई दे, न्ही तो वो मर जावैगा।"

36 "फेर शुद्ध सोन्‍ने का एक टीक्‍का बणवाईये, अर जिस तरियां छाप्पे म्ह उस्से तरियां ए उस म्ह ये अक्षर खोद्दे जावैं, यानिके ‘यहोवा कै खात्तर पवित्र।’ 37 अर उस ताहीं नीले फित्ते तै बाँधिये; अर वा पगड़ी कै स्याम्ही के हिस्से पै रहवै। 38 अर वा हारुन कै माथ्थै पै रहवै, ज्यांतै के इस्राएली जो कुछ पवित्र ठहरावै, यानिके जितनी पवित्र चिज्जां भेंट म्ह चढ़ावैं उन पवित्र चिज्जां का दोष हारुन ठाए रहवै, अर वा सदा उसकै माथ्थै पै रहवै, जिसतै यहोवा उनतै खुश रहवै।"

39 "अंगरखे नै सूक्ष्म सणी के कपड़े का चारखान्‍ना बुणवाईये, अर एक पगड़ी भी सूक्ष्म सणी के कपड़े की बणवाईये, अर बेलबूट्टे की कढ़ाई का काम करया होया एक कमरबन्द भी बणवाईये। 40 फेर हारुन कै बेट्याँ कै खात्तर भी अंगरखे अर कमरबन्द अर टोप्पी बणवाईये; ताके इन पोशाकां म्ह भी उनकी शानों-शोकत अर शोभा बणी रहवै। 41 अपणे भाई हारुन अर उसके बेट्याँ नै याए पोशाक पिराह कै उनका अभिषेक अर संस्कार करिये, अर उननै पवित्र करिये ताके वे मेरै खात्तर याजक का काम करै। 42 अर उनकै खात्तर सणी के कपड़े के जाँघिया बणवाईये जिनतै उनका तन ढक्या रहवै; वे कमर तै जाँघ तक की हों; 43 अर जिब-जिब हारुन या उसके बेट्टे मिलापआळे तम्बू म्ह दाखल होवै, या पवित्र स्‍थान म्ह सेवा-पाणी करण खात्तर वेदी कै धोरै जावै तो वे उन जाँघियां नै पैहरे रहवै, इसा ना हो के वे पापी ठहरै अर मर जावै। या हारुन कै खात्तर अर उसकै बाद उसके वंश कै खात्तर भी सदा की विधि ठहरै।"