पवित्रस्थान कै खात्तर भेंट
1 यहोवा नै मूसा तै कह्या, 2 "इस्राएल के माणसां तै न्यू कहिये के मेरै खात्तर भेंट ल्यावैं; जितने अपणी मर्जी तै देणा चावै उन सारया तै ए मेरी भेंट लिये। 3 अर जिन चिज्जां की भेंट उनतै लेणी सैं, वे ये सैं; यानिके सोन्ना, चाँदी, पीत्तळ, 4 नीले, बैंगणी अर लाल रंग का कपड़ा, सूक्ष्म सणी का कपड़ा, बकरी के बाळ, 5 लाल रंग तै रंगी होई मिंढयाँ की खाल, सुइसां की खाल25:5 सुइसां की खाल समुंदरी गाय की खाल अर इब्रानी म्ह इसका मलतब बदल सकै सै, किक्कर की लाकड़ी, 6 चाँदणे कै खात्तर तेल, अभिषेक कै तेल कै खात्तर अर खुशबुदार धूप कै खात्तर सुगन्ध-द्रव्य, 7 एपोद अर चपरास कै खात्तर सुलैमानी पत्थर, अर जड़ण कै खात्तर मणि25:7 मणि यो महायाजक की छात्ती पै 9 इंच (आयताकार) की चीज होया करदी, यो चीज प्रकाशन, रोशनी अर श्राप कै बारै म्ह थी। इसकै द्वारा महायाजक परमेसवर की इच्छा जाण्या करदे। इसका जिक्र 28:15-30 म्ह सै।। 8 अर वे मेरै खात्तर एक पवित्र स्थान बणावै, ताके मै उनकै बिचाळै रह्या करुँ। 9 जो कुछ मै तन्नै दिखाऊँ सूं, यानिके निवास-स्थान अर उसके सारे सामान का नमूना, उस्से कै मुताबिक उसनै बणाईये।"
साक्षीपत्र का सन्दूक
10 "किक्कर की लाकड़ी का एक सन्दूक बणाया जावै; उसकी लम्बाई ढाई हाथ, अर चौड़ाई अर ऊँचाई डेढ़-डेढ़ हाथ की हो। 11 अर उसनै शुद्ध सोन्ने तै भित्तर अर बाहर तै मढ़वाईये, अर सन्दूक कै उप्पर चौगरदे सोन्ने की बाड़ बणवाईये। 12 अर सोन्ने के च्यार कड़े ढाळ कै उसकै च्यांरु पायां पै, एक ओड़ दो कड़े अर दुसरी ओड़ भी दो कड़े लगवाईये। 13 फेर किक्कर की लाकड़ी के डंडे बणवाईये, अर उननै भी सोन्ने तै मढ़वाईये। 14 अर डंड्यां नै सन्दूक की दोन्नु ओड़ के कड़यां म्ह घालियो, जिसतै उनकै सहारै सन्दूक ठाया जावै। 15 वे डंडे सन्दूक कै कड़यां म्ह लाग्गे रहवै; अर उसतै न्यारे ना करे जावै। 16 अर जो साक्षीपत्र मै तन्नै दियुँगा उसनै उस्से सन्दूक म्ह धरिये।"
17 "फेर शुद्ध सोन्ने का एक प्रायश्चित का ढकणा बणवाईये; उसकी लम्बाई ढाई हाथ, अर चौड़ाई डेढ़ हाथ की हो। 18 अर सोन्ना ढाळ कै दो करूब बणवाकै प्रायश्चित कै ढक्कण के दोन्नु सिरयां पै लगवाईये। 19 एक करूब तो एक सिरे पै अर दूसरा करूब दुसरे सिरे पै लगवाईये; अर करूबां नै अर प्रायश्चित कै ढक्कण नै उसकै टुकड़े तै बणाकै उसके दोन्नु सिरयां पै लगवाईये। 20 अर उन करूबां कै पंख उप्पर तै इसे फैल्ले होए बणै के प्रायश्चित का ढकणा उनतै ढकया रहवै, अर उनके मुँह आम्ही-स्याम्ही अर प्रायश्चित कै ढक्कण की ओड़ रहवै। 21 अर प्रायश्चित कै ढक्कण नै सन्दूक कै उप्पर लगवाईये; अर जो साक्षीपत्र मै तन्नै दियुँगा उस ताहीं सन्दूक कै भित्तर धरिये। 22 अर मै उसकै उप्पर रहकै तन्नै मिल्या करुँगा; अर इस्राएलियाँ कै खात्तर जितने हुकम मन्नै तेरे ताहीं देणे होवैंगे, उन सारया कै बारै म्ह मै प्रायश्चित के ढक्कण कै उप्पर तै अर उन करूबां कै बिचाळै म्ह तै, जो साक्षीपत्र कै सन्दूक पै होवैंगे, तेरे तै बातचीत करया करुँगा।"
पवित्र मेज
23 "फेर किक्कर की लाकड़ी की एक मेज बणवाईये; उसकी लम्बाई दो हाथ, चौड़ाई एक हाथ, अर ऊँचाई डेढ़ हाथ की हो। 24 उसनै शुद्ध सोन्ने तै मढ़वाईये, अर उसकै चौगरदे नै सोन्ने की एक बाड़ बणवाईये। 25 अर उसकै चौगरदे नै च्यार आंगळ चौड़ी एक पटड़ी बणवाईये, अर इस पटड़ी कै चौगरदे नै सोन्ने की एक बाड़ बणवाईये। 26 अर सोन्ने के च्यार कड़े बणवाकै मेज कै उन च्यांरु कुणा म्ह लगवाईये जो उसकै च्यांरु पायां म्ह होवैंगे। 27 वे कड़े पटड़ी कै धोरै ए हों, अर डंड्यां कै घरां का काम देवै के मेज उन्हे के सहारै ठाई जावै। 28 अर डंड्यां ताहीं किक्कर की लाकड़ी के बणवाकै सोन्ने तै मढ़वाईये, अर मेज उन्हे तै ठाई जावै। 29 अर उसकै परात अर धूपदान, अर चमच्चे अर उडेलण के कटोरे, सारे शुद्ध सोन्ने के बणवाईये। 30 अर मेज पै मेरै आग्गै भेंट की रोट्टी रोज धरया करियो।"
सोन्ने की दीवट
31 "फेर शुद्ध सोन्ने की एक दीवट बणवाईये। सोन्ना ढाळ कै वो दीवट, पाये अर दीवट सुधा बणाई जावै; उसकै पुष्पकोष, गाँठ अर फूल, सारे एक ए टुकड़े के बणै; 32 अर उसकै किनारां तै छः डाळी लिकड़ै, तीन डाळी तो दीवट की एक ओड़ तै, अर तीन डाळी उसकी दुसरी ओड़ तै लिकड़ी होई हों; 33 एक-एक डाळी म्ह बदाम कै फूल की ढाळ तीन-तीन पुष्पकोष, एक-एक गाँठ, अर एक-एक फूल हों; दीवट तै लिकड़ी होई छहों डाळियाँ का योए आकार या रूप हो; 34 अर दीवट की डंडी म्ह बदाम के फूल की ढाळ च्यार पुष्पकोष अपणी-अपणी गाँठ अर फूल सुधा हों; 35 अर दीवट तै लिकड़ी होई छहों डाळियाँ म्ह तै दो-दो डाळियाँ कै तळै एक-एक गाँठ हो, वे दीवट सुधा एक ए टुकड़े के बणे होए हों। 36 उनकी गाँठें अर डालियाँ, सारे दीवट सुधा एक ए टुकड़े की हों, शुद्ध सोन्ना ढाळ कै पूरी दीवट एक ए टुकड़े की बणवाईये। 37 अर सात दीवे बणवाईये; अर दीवे जळाए जावै के वे दीवट कै स्याम्ही चाँदणा दें। 38 अर उसकै गुलतराश अर गुलदान सारे शुद्ध सोन्ने के हों। 39 वो सारे इस पूरे सामान समेत किक्कार25:39 किक्कार मूल भाषा कै मुताबिक एक तोड़ा सोन्ने का अर एक तोड़ा लगभग 35 किलोग्राम का था। भर शुद्ध सोन्ने का बणै। 40 अर चौक्कस रहकै इन सारी चिज्जां नै उस नमूने की ढाळ बणवाईये, जो तेरे ताहीं इस पहाड़ पै दिखाया गया सै।"