21 फेर मूसा नै इस्राएल के सारे बुजुर्गां ताहीं बुलाकै कह्या, "थम अपणे-अपणे कुल कै मुताबिक एक-एक करकै मेम्‍ना न्यारा कर ल्यो, अर फसह का पशु बलि करियो। 22 अर उसका लहू जो तासळे म्ह होवैगा उस म्ह जूफा का एक गुच्छा डुबोकै उस्से तासळे म्ह कै लहू तै दरबाजे के चौखट कै सिरे अर दोन्‍नु ओड़ पै कुछ लगाईयो; अर सबेरै तक थारे म्ह तै कोए घर तै बाहर ना लिकड़ै। 23 क्यूँके यहोवा देश कै बिचाळै होकै मिस्रियाँ नै मारदा जावैगा; इस करकै जित-जित वो चौखट कै सिरे, अर दोन्‍नु ओड़ पै उस लहू नै देक्खैगा, ओड़ै-ओड़ै वो उस दरबाजे नै छोड़ जावैगा, अर नाश करण आळे नै थारै घर म्ह मारण कै खात्तर न्ही जाण देवैगा।