16 जिब तीसरा दिन आया फेर सबेरै होन्दे बाद्दळ गरजण अर बिजळी चमकण लाग्गी, अर पहाड़ पै काळी घटा छागी, फेर नरसिंगे का शब्द बड़ा भारी होया, अर छावणी म्ह जितने माणस थे सारे काँम्बण लाग्गे। 17 फेर मूसा माणसां नै परमेसवर तै मुलाकात कराण कै खात्तर छावणी तै लिकाड़ लेग्या; अर वे पहाड़ कै तळै खड़े होए। 18 अर यहोवा जो आग म्ह होकै सीनै पहाड़ पै उतरया था, इस कारण पूरा पहाड़ धुम्मा तै भरग्या; अर उसका धुम्मा भट्ठे के जिसा उठ रह्या था, अर पूरा पहाड़ घणा काँम्बण लाग रह्या था।
Publicidade