पीतळ की हौदी
17 अर यहोवा नै मूसा तै कह्या, 18 "धोण कै खात्तर पीत्तळ की एक हौदी अर उसके पाये भी पीत्तळ के बणवाईये उसनै मिलापआळे तम्बू अर वेदी कै बीच म्ह धरकै उस म्ह पाणी भर दिये; 19 अर उस म्ह हारुन अर उसके बेट्टे अपणे-अपणे हाथ-पैर धोया करै। 20 जिब-जिब वे मिलापआळे तम्बू म्ह दाखल होवै तब-तब वे हाथ-पैर पाणी तै धोवै, न्ही तो वे मर जावैंगे; अर जिब-जिब वे वेदी कै धोरै सेवा-पाणी करण, यानिके यहोवा कै खात्तर हव्य जळाण नै आवैं तब-तब वे हाथ-पैर धोवै, इसा ना हो के मर जावैं। 21 या हारुन अर उसके पीढ़ी-पीढ़ी के वंश कै खात्तर सदा की विधि ठहरै।"