जाप्पै के शुद्धिकरण के नियम
1 फेर यहोवा नै मूसा तै कह्या, 2 "इस्राएलियाँ तै कह: जो औरत गर्भवती हो अर उसकै छोरा हो, तो वा सात दिन ताहीं अशुद्ध रहवैगी; जिस तरियां वा मासिक धर्म कै बखत अशुद्ध रहया करदी। 3 अर आठवें दिन छोरे का खतना करया जावै। 4 फेर वा औरत अपणे शुद्ध करण आळे रूधिर म्ह तैंतीस दिन रहवै; अर जिब ताहीं उसकै शुद्ध हो जाण के दिन पूरे ना हों जिब तक वा ना तो किसे पवित्र चीज नै छुवै, अर ना पवित्र स्थान म्ह दाखल होवै। 5 अर जै उसकै छोरी पैदा हो, तो उस ताहीं मासिक धर्म की जिसी अशुद्धता चौदहा दिन की लाग्गै; अर फेर छियासठ दिन ताहीं अपणे शुद्ध करण आळे रूधिर म्ह रहवै।"
6 "जिब उसकै शुद्ध हो जाण के दिन पूरे हों, फेर चाहे उसकै बेट्टा होया हो चाहे बेट्टी, वा होमबलि कै खात्तर एक साल का भेड़ का बच्चा, अर पापबलि कै खात्तर कबूतरी का एक बच्चा या पिंडुकी मिलापआळे तम्बू के दरबाजे पै याजक कै धोरै ल्यावै। 7 फेर याजक उसनै यहोवा कै स्याम्ही भेंट चढ़ाकै उसकै खात्तर प्रायश्चित करै; अर वा अपणे रूधिर कै बहण की अशुद्धता तै छूट कै शुद्ध ठहरैगी। जिस औरत कै छोरा या छोरी पैदा हो उसकै खात्तर योए नियम-कायदे सै। 8 अर जै उसकै धोरै भेड़ या बकरी देण की पूंजी ना हो, तो दो पिंडुकी या कबूतरी के दो बच्चे, एक तो होमबलि अर दूसरा पापबलि कै खात्तर दे; अर याजक उसकै खात्तर प्रायश्चित करै, फेर वो शुद्ध ठहरैगी।"