1 फेर यहोवा नै मूसा तै कह्या, 2 "इस्राएलियाँ तै न्यू कह के जिब कोए खास मन्‍नत मान्‍नै, तो मन्‍नत मानण आळा माणस तेरे ठहराण कै मुताबिक यहोवा के होवैगें; 3 इस करकै जै वो बीस साल या उसतै घणा अर साठ साल तै घाट उम्र का आदमी हो, तो उसकै खात्तर पवित्र स्‍थान कै शेकेल कै मुताबिक पचास शेकेल* की चाँदी ठहरै। 4 जै वो औरत हो, तो तीस शेकेल ठहरै। 5 फेर जै उसकी उम्र पाँच साल या उसतै घणी अर बीस साल तै घाट की हो, तो छोरे कै खात्तर तो बीस शेकेल, अर छोरी कै खात्तर दस शेकेल ठहरै। 6 जै उसकी उम्र एक महिन्‍ने, या उसतै घणी अर पाँच साल तै घाट की हो, तो छोरे कै खात्तर तो पाँच, अर छोरी कै खात्तर तीन शेकेल चाँदी ठहरै। 7 फेर जै उसकी उम्र साठ साल की या उसतै घणी हो, अर वो आदमी हो तो उसकै खात्तर पन्द्रह शेकेल, अर औरत हो तो दस शेकेल ठहरै। 8 पर जै कोए इतणा कंगाल हो के याजक का ठहराया होया दाम ना दे सकै, तो वो याजक कै स्याम्ही खड्या करया जावै, अर याजक उसकी पूंजी ठहरावै, यानिके जितनी मन्‍नत मानण आळे तै हो सकै, याजक उस्से कै मुताबिक ठहरावै।"

9 "फेर जिन डान्गरां म्ह तै माणस यहोवा नै चढ़ावा चढ़ावै सै, जै इस्यां म्ह तै कोए मन्‍नत मान्‍नी जावै, तो जो पशु कोए यहोवा नै देवै सै वो पवित्र ठहरैगा। 10 वो उसनै किसे ढाळ तै न्ही बदलै, ना तो वो बुरे कै बदलै आच्छा, अर ना आच्छे कै बदलै बुरा दे; अर जै वो उस पशु कै बदलै दूसरा पशु दे, तो वो अर उसका बदलै दोन्‍नु पवित्र ठहरैगें। 11 अर जिन अशुद्ध डान्गरां म्ह तै माणस यहोवा कै खात्तर चढ़ावा कोनी चढ़ान्दे इस्यां म्ह तै जै वो हो, तो वो उसनै याजक कै स्याम्ही खड्या करदे, 12 फेर याजक पशु कै गुण-अवगुण दोन्‍नु विचार कै उसका मोल ठहरावै; अर जितना याजक ठहरावै उसका मोल उतनाए ठहरै। 13 पर जै मन्‍नत मानण आळा उसनै किसे ढाळ तै छुड़ाणा चाहवै, तो जो मोल याजक नै ठहराया हो उस म्ह उसका पाँचवाँ हिस्सा और बढ़ाकै दे।"

14 "फेर जै कोए अपणा घर यहोवा कै खात्तर पवित्र ठहराकै इरादा करै, तो याजक उसकै गुण-अवगुण दोनुआं का विचार करकै उसका मोल ठहरावै; अर जितना याजक ठहरावै उसका मोल उतनाए ठहरै। 15 अर जै घर का पवित्र करण आळा उसनै छुड़ाणा चाहवै, तो जितने रपिये याजक नै उसका मोल ठहराया हो उस म्ह वो पाँचवाँ हिस्सा और बढ़ाकै दे, फेर वो घर उस्से का रहवैगा।"

16 "फेर जै कोए अपणी खुद धरती का कोए हिस्सा यहोवा कै खात्तर पवित्र ठहराणा चाहवै, तो उसका मोल इसकै मुताबिक ठहरै, के उस म्ह कितना बीज पड़ैगा; जितना धरती म्ह होमेर* भर जौ पड़ै उतणी का मोल पचास शेकेल* ठहरै। 17 जै वो अपणा खेत जुबली कै साल म्ह ए पवित्र ठहरावै, तो उसका दाम तेरै ठहराण कै मुताबिक ठहरै; 18 अर जै वो अपणा खेत जुबली कै साल कै बाद पवित्र ठहरावै, तो जितने साल दुसरी जुबली कै साल के बाकी रहवै उन्हे के मुताबिक याजक उसकै खात्तर रपिये का हिसाब करै, फेर जितना हिसाब म्ह आवै उतणा याजक कै ठहराण तै घाट हो। 19 अर जै खेत नै पवित्र बणावै उसनै छुड़ाणा चाहवै, तो जो दाम याजक नै ठहराया हो उस म्ह वो पाँचवाँ हिस्सा और बढ़ाकै दे, फेर खेत उस्से का रहवैगा। 20 अर जै वो खेत नै छुड़ाणा न्ही चाहवै, या उसनै उस ताहीं दुसरे कै हाथ बेच्या हो, तो खेत आग्गै तक कदे न्ही छुटाया जावै; 21 पर जिब वो खेत जुबली कै साल म्ह छूटै, फेर पूरी तरियां तै अर्पण करे होए खेत्तां की तरियां यहोवा कै खात्तर पवित्र ठहरै, यानिके वो याजक ए की अपणी धरती हो जावै। 22 फेर जै कोए अपणा मोल लिया होया खेत, जो उसकी खुद की धरती कै गैल खेत्तां म्ह का ना हो, यहोवा कै खात्तर पवित्र ठहरावै, 23 तो याजक जुबली कै साल तक का हिसाब करकै उस माणस कै खात्तर जितना ठहरावै उतनाए वो यहोवा कै खात्तर पवित्र जाणकै उस्से दिन दे-दे। 24 जुबली कै साल म्ह वो खेत उस्से कै अधिकार म्ह जिसतै वो मोल लिया गया सै फेर आ जावै, यानिके जिसकी वो खुद की धरती हो उस्से की फेर हो जावै। 25 जिस-जिस चीज का मोल याजक ठहरावै उसका मोल पवित्र स्‍थान कै शेकेल कै हिसाब तै ठहरै: शेकेल बीस गेरा* का ठहरै।"

26 "पर घरेलू पशुआं का जेठ्ठा, जो जेठ्ठा होण कै कारण यहोवा का ठहरया सै, उसनै कोए पवित्र न्ही ठहरावै; चाहे वो बाछड़ा हो, चाहे भेड़ या बकरी का बच्‍चा, वो यहोवा का ए सै। 27 पर जै वो अशुद्ध पशु का हो, तो उसका पवित्र बणाण आळा उसनै याजक कै ठहराए होए मोल कै मुताबिक उसका पाँचवाँ हिस्सा और बढ़ाकै छुड़ा सकै सै; अर जै वो ना छुटाया जावै, तो याजक कै ठहराए होए मोल पै बेच दिया जावै।"

28 "पर अपणी सारी चिज्जां म्ह तै जो कुछ यहोवा कै खात्तर अर्पण करै, चाहे माणस हो चाहे पशु, चाहे उसकी खुद की धरती का खेत हो, इसी कोए अर्पण करी होई चीज ना तो बेच्‍ची जावै अर ना छुड़ाई जावै; जो कुछ अर्पण करया जावै सै वो यहोवा कै खात्तर परमपवित्र ठहरै। 29 माणसां म्ह तै जो कोए मौत की सजा कै खात्तर अर्पण करया जावै, वो छुड़ाया न्ही जावै; वो जरुर मार दिया जावै।"

30 "फेर धरती की पैदावार का सारा दशमांश, चाहे वो धरती का बीज हो चाहे दरखत का फळ, वो यहोवा का ए सै; वो यहोवा कै खात्तर पवित्र ठहरै।

31 जै कोए अपणे दशमांश म्ह तै कुछ छुड़ाणा चाहवै, तो पाँचवाँ हिस्सा बढ़ाकै उस ताहीं छुड़ावै। 32 अर गां-बळध अर भेड़-बकरी, यानिके जो-जो पशु गिणन कै खात्तर लाठ्ठी कै तळै लिकड़ जाण आळे सैं उनका दशमांश, यानिके दस-दस कै पाच्छै एक-एक पशु यहोवा कै खात्तर पवित्र ठहरै। 33 कोए उसकै गुण-अवगुण ना बिचारे, अर ना उस ताहीं बदलै; अर जै कोए उसनै बदल भी ले, तो वो अर उसका बदल्या होया दोन्‍नु पवित्र ठहरै; अर वो कदे न्ही छुड़ाया जावै।"

34 जो हुकम यहोवा नै इस्राएलियाँ कै खात्तर सीनै पर्वत पै मूसा तै दिये थे, वे योए सैं।