1 "जिब कोए यहोवा कै खात्तर अन्‍नबलि का चढ़ावा चढ़ाणा चावै, तो वो मैद्दा चढ़ावै; अर उसपै तेल* गेर कै उसके उप्पर लोबान धरै; 2 अर वो उसनै हारुन के बेट्याँ कै धोरै जो याजक सै ल्यावै। अर अन्‍नबलि के तेल मिले होए मैदे म्ह तै इस ढाळ अपणी मुट्ठी भरकै काड्डै के सारा लोबान उस म्ह आ ज्या; अर याजक उननै याद दुआण आळे हिस्से कै खात्तर वेदी पै जळावै के यो यहोवा कै खात्तर सुखदायक खुशबुदार हवन ठहरै। 3 अर अन्‍नबलि म्ह तै जो बच्या रहवै सै वो हारुन अर उसके बेट्याँ का ठहरै; यो यहोवा कै हवनां म्ह तै परमपवित्र भाग होवैगा।"

4 "जिब तू अन्‍नबलि कै खात्तर तंदूर म्ह पकाया होया चढ़ावा चढ़ावै, तो वो तेल तै सणे होए अखमीरी मैदे कै फुलक्यां, या तेल तै चोपड़ी होई अखमीरी रोट्टी का हो। 5 अर जै तेरा चढ़ावा तवे पै पकाया होया अन्‍नबलि हो, तो वो तेल तै सणे होए अखमीरी मैदे का हो; 6 उसनै टुकड़े-टुकड़े करकै उसपै तेल गेरिये, फेर वो अन्‍नबलि हो ज्यागा। 7 अर जै तेरा चढ़ावा कढ़ाही म्ह तळ्या होया अन्‍नबलि हो, तो वो मैदे तै तेल म्ह बणाया जावै। 8 अर जो अन्‍नबलि इन चिज्जां म्ह तै किसे का बण्या हो उसनै यहोवा कै धोरै ले जाईयो; अर जिब वो याजक कै धोरै ल्याया जावै, तो याजक उसनै वेदी कै धोरै ले जावै। 9 अर याजक अन्‍नबलि म्ह तै याद दिलाण आळे हिस्से नै लिकाड़कै वेदी पै जळावै ताके वो यहोवा कै खात्तर सुखदायक सुगन्धआळा हवन ठहरै; 10 अर अन्‍नबलि म्ह तै जो बच्या रहवै सै वो हारुन अर उसकै बेट्याँ का ठहरै; वो यहोवा कै हवनां म्ह परमपवित्र हिस्सा होवैगा।"

11 "कोए अन्‍नबलि जिसनै थम यहोवा कै खात्तर चढ़ाओ खमीर मिलाकै बणाया ना जावै; थम कदे हवन म्ह यहोवा कै खात्तर खमीर अर शहद ना जळाईयो। 12 थम इननै पैहली पैदावार का चढ़ावा करकै यहोवा कै खात्तर चढ़ाईयों, पर वे सुखदायक सुगन्ध कै खात्तर वेदी पै चढ़ाए ना जावै। 13 फेर अपणे सारे अन्‍नबलियाँ नै नमकीन* बणाईयो; अर अपणा कोए अन्‍नबलि अपणे परमेसवर कै गैल करे होए करार* के नमक तै दूर न्ही होण देणा; अपणे सारे चढ़ावयां कै गेल्या नमक भी चढ़ाईयों।"

14 "जै तू यहोवा कै खात्तर पैहली पैदावार का अन्‍नबलि चढ़ावै, तो अपणी पैहली उपज के अन्‍नबलि कै खात्तर आग म्ह भुनी होई हरी-हरी बालें, यानिके हरी-हरी बाल्‍लां नै मशळ कै लिकाड़ लियो, फेर अन्‍न नै चढ़ाईयों। 15 अर उस म्ह तेल गेरियो, अर उसकै उप्पर लोबान धरियो; फेर वो अन्‍नबलि हो ज्यागा। 16 अर याजक मशळ कै लिकाड़े होए अन्‍न नै, अर तेल नै, अर सारे लोबान नै याद दिलाण आळा हिस्सा करकै जळा दे; वो यहोवा कै खात्तर हवन ठहरै।"