लैव्यव्यवस्था 8

हारुन अर उसके बेट्याँ का अभिषेक

1 फेर यहोवा नै मूसा तै कह्या, 2 "तू हारुन अर उसके बेट्याँ की पोशाक, अर अभिषेक के तेल, अर पापबलि के बाछड़े, अर दोन्‍नु मिंढे, अर अखमीरी रोट्टी की टोकरी नै 3 मिलापआळे तम्बू कै दरबाजे पै ले आ, अर उड़ैए सारी मण्डळी नै कठ्ठा कर।"

4 यहोवा के इस हुकम कै मुताबिक मूसा नै करया; अर मण्डळी मिलापआळे तम्बू कै दरबाजे पै कठ्ठी होई। 5 फेर मूसा नै मण्डळी तै कह्या, "जो काम करण का हुकम यहोवा नै दिया सै वो यो सै।"

6 फेर मूसा नै हारुन अर उसके बेट्याँ ताहीं धोरै ल्याकै पाणी तै नुहाया। 7 फेर उसनै उनतै अंगरखा पैहराया, अर कटिबन्ध लपेटकै चोग्गा पिराह दिया, अर एपोद लगाकै एपोद के काढ़े होए पट्टे तै एपोद ताहीं बाँधकै कस दिया। 8 अर उसनै चपरास लगाकै चपरास म्ह ऊरीम अर तुम्मीम धर दिए। 9 फेर उसनै उसकै सिर पै पगड़ी बाँधकै पगड़ी कै स्याम्ही सोन्‍ने के टीक्‍के नै, यानिके पवित्र मुकुट ताहीं लगाया, जिस तरियां यहोवा नै मूसा तै हुकम दिया था।

10 फेर मूसा नै अभिषेक का तेल लेकै निवास का अर जो कुछ उस म्ह था उन सारया का भी अभिषेक करकै उन ताहीं पवित्र करया। 11 अर उस तेल म्ह तै कुछ उसनै वेदी पै सात बार छिड़क्या, अर सारे सामान सुधा वेदी का अर पावेयां सुधा हौदी का अभिषेक करकै पवित्र करया। 12 अर उसनै अभिषेक कै तेल म्ह तै कुछ मूसा हारुन कै सिर पै गेर कै उसका अभिषेक करकै उस ताहीं पवित्र करया। 13 फेर मूसा नै हारुन के बेट्याँ ताहीं धोरै ल्याकै, अंगरखे पिराह कै, कटिबन्ध बाँधकै उनकै सिर पै टोपी धर दी, जिस तरियां यहोवा नै मूसा तै हुकम दिया था।

14 फेर वो पापबलि कै बाछड़े नै धोरै लेग्या; अर हारुन अर उसकै बेट्याँ नै अपणे-अपणे हाथ पापबलि के बाछड़े कै सिर पै धरे। 15 फेर वो बलि करया गया, अर मूसा नै लहू ताहीं लेकै आन्गळी तै वेदी कै च्यांरु सीन्गां पै लगाकै पवित्र करया, अर लहू ताहीं वेदी कै पावेयां पै उण्डेल दिया, अर उसकै खात्तर प्रायश्चित करकै उस ताहीं पवित्र करया। 16 अर मूसा नै आंतड़ी पै की सारी चर्बी, अर कळेजे पै की झिल्‍ली, अर चर्बी सुधा दोन्‍नु गुर्देयां नै लेकै वेदी पै जळाया। 17 पर बाछड़े म्ह तै जो कुछ बाकी रहग्या उस ताहीं, यानिके गोबर सुधा उसकी खाल अर माँस ताहीं उसनै छावणी तै बाहर आग म्ह जळा दिया, जिस तरियां यहोवा नै मूसा तै हुकम दिया था।

18 फेर वो होमबलि के मिंढे नै धोरै लेग्या, अर हारुन अर उसके बेट्याँ नै अपणे-अपणे हाथ मिंढे कै सिर पै धरै। 19 फेर वो बलि करया गया, अर मूसा नै उसका लहू वेदी पै चौगरदे छिड़क्या। 20 फेर मिंढा टुकड़े-टुकड़े करया गया, अर मूसा नै सिर अर चर्बी सुधा टुकड्या ताहीं जळाया। 21 फेर आंतड़ी अर पैर पाणी तै धोये गए, अर मूसा नै पूरे मिंढे ताहीं वेदी पै जळाया, अर वो सुखदायक सुगन्ध देण कै खात्तर होमबलि अर यहोवा कै खात्तर हवन होग्या, जिस तरियां यहोवा नै मूसा तै हुकम दिया था।

22 फेर वो दुसरे मिंढे नै जो विधि का मिंढा था धोरै लेग्या, अर हारुन अर उसके बेट्याँ नै अपणे-अपणे हाथ मिंढे कै सिर पै धरै। 23 फेर वो बलि करया गया, अर मूसा नै उसके लहू म्ह तै कुछ लेकै हारुन कै सोळे कान के सिरे पै अर उसकै सोळे हाथ अर सोळे पैर कै अँगूठयाँ पै लगाया। 24 अर वो हारुन के बेट्याँ नै धोरै लेग्या, अर लहू म्ह तै कुछ एक-एक कै सोळे कान के सिरे पै अर सोळे हाथ अर सोळे पैर कै अँगूठयाँ पै लगाया; अर मूसा नै लहू ताहीं वेदी पै चौगरदे छिड़क्या। 25 अर उसनै चर्बी, अर मोट्टी पुन्झड़, अर अंतड़ियाँ पै की सारी चर्बी, अर कळेजे पै की झिल्‍ली सुधा दोन्‍नु गुर्दे, अर सोळी जाँघ, ये सारे लेकै न्यारे राक्खै; 26 अर अखमीरी रोट्टी की टोकरी जो यहोवा कै आग्गै धरी गई थी उस म्ह तै एक अखमीरी रोट्टी, अर तेल तै सणे होए मैदे का एक फुलका, अर एक पापड़ी लेकै चर्बी अर सोळी जाँघ पै धर दी; 27 अर ये सारी चीज हारुन अर उसके बेट्याँ कै हाथ्थां पै धर दी गई, अर हिलाणे की भेंट कै खात्तर यहोवा कै स्याम्ही हिलाई गई। 28 फेर मूसा नै उन ताहीं फेर उनकै हाथ्थां पै तै लेकै उनतै वेदी पै होमबलि कै उप्पर जळाया, यो सुखदायक सुगन्ध देण कै खात्तर विधि की भेंट अर यहोवा कै खात्तर हवन था। 29 फेर मूसा नै छात्ती ताहीं लेकै हिलाणे की भेंट कै खात्तर यहोवा कै आग्गै हिलाया; अर विधि के मिंढे म्ह तै मूसा का हिस्सा योए होया जिसा यहोवा नै मूसा तै हुकम दिया था।

30 फेर मूसा नै अभिषेक के तेल अर वेदी पै के लहू, दोनुआ म्ह तै कुछ लेकै हारुन अर उसकै पोशाक पै, अर उसके बेट्याँ अर उनकी पोशाक पै भी छिड़क्या; अर उसनै पोशाक सुधा हारुन ताहीं भी पवित्र करया।

31 फेर मूसा नै हारुन अर उसके बेट्याँ तै कह्या, "माँस नै मिलापआळे तम्बू के दरबाजे पै पकाओ, अर उस रोट्टी नै जो विधि की टोकरी म्ह सै उड़ैए खाओ, जिसा मन्‍नै हुकम दिया सै के हारुन अर उसकै बेट्टे उसनै खावैं। 32 अर माँस अर रोट्टी म्ह तै जो बाकी रह ज्या उसनै आग म्ह जळा दियो। 33 अर जिब तक विधि के दिन पूरे ना हों तब ताहीं, यानिके सात दिन तक मिलापआळे तम्बू के दरबाजे कै बाहर ना जाईयो, क्यूँके वो सात दिन तक थारा विधि संस्कार करदा रहवैगा। 34 जिस तरियां आज करया गया सै उस्से तरियां ए करण का हुकम यहोवा नै दिया सै, जिसतै थारा प्रायश्चित करया जावै। 35 इस करकै थम मिलापआळे तम्बू कै दरबाजे पै सात दिन ताहीं दिन-रात रुके रहियो, अर यहोवा कै हुकम नै मानियो, ताके थम मर ना जाओ; क्यूँके इसाए हुकम मेरे ताहीं दिया गया सै।" 36 फेर यहोवा के इन सारे हुकमां कै मुताबिक जो उसनै मूसा कै जरिये दिये थे हारुन अर उसके बेट्याँ नै करया।