लैव्यव्यवस्था 6

बेईमान माणसां खात्तर दोषबलि

1 फेर यहोवा नै मूसा तै कह्या, 2 "जै कोए यहोवा का बिश्वासघात करकै पापी ठहरै, जिसा के धरोहर, या लेण-देण, या लूट कै बारै म्ह अपणे भाई तै छळ करै, या उसपै अत्याचार करै, 3 या पड़ी होई चीज नै पाकै उसकै बारै झूठ बोल्‍लै अर झूठ्ठी कसम भी खावै; इसी कोए भी बात क्यूँ ना हो जिसनै करकै माणस पापी ठहरै सै, 4 तो जिब वो इसा काम करकै कसूरवार हो ज्या, फेर जो भी चीज उसनै लूट, या अत्याचार करकै, या धरोहर, या पड़ी पाई हो; 5 चाहे कोए चीज क्यूँ ना हो जिसकै बारै म्ह उसनै झूठ्ठी कसम खाई हो; तो वो उस ताहीं पूरी-पूरी बोहड़ा दे, अर पाँचवाँ हिस्सा भी बढ़ाकै भर दे, जिस दिन न्यू बेरा पाट्टै के वो कसूरवार सै, उस्से दिन वो उस चीज नै उसकै माल्‍लिक तै वापस दे दे। 6 अर वो यहोवा कै स्याम्ही अपणा दोषबलि भी ले आवै, यानिके एक बेकसूर मिंढा दोषबलि कै खात्तर याजक कै धोरै ले आवै, वो उतने ए दाम का हो जितना याजक ठहरावै। 7 इस तरियां याजक उसकै खात्तर यहोवा कै स्याम्ही प्रायश्चित करै, अर जिस काम नै करकै वो कसूरवार होया सै उसकी माफी उसनै मिलैगी।"

न्यारे-न्यारे ढाळ के बलिदानां की विधि

8 फेर यहोवा नै मूसा तै कह्या, 9 "हारुन अर उसके बेट्याँ नै हुकम देकै न्यू कह के होमबलि के नियम-कायदे ये सै: होमबलि लाकड़ी कै उप्पर रात भर तड़कैए ताहीं वेदी पै पड्या रहवै, अर वेदी की आग वेदी पै जळदी रहवै। 10 अर याजक अपणे सणी कै कपड़ेयां अर अपणे तन पै अपणी सणी की जाँघिया पहरकै होमबलि की राख, जो आग कै भस्म करण तै वेदी पै रह जावै, उसनै ठाकै वेदी कै धोरै धरै। 11 फेर वो अपणे ये कपड़े तारकै दुसरे कपड़े पहरकै राख नै छावणी तै बाहर किसे शुद्ध जगहां पै ले जावै। 12 वेदी पै आग जळदी रहवै, अर कदे बुझण न्ही पावै; अर याजक हरेक दिन तड़कैए तड़क नै उसपै लाकड़ी बाळ कै होमबलि के टुकड्या नै उसकै उप्पर सजा कै धरदे, अर उसकै उप्पर मेलबलियां की चर्बी नै जळाया करै। 13 वेदी पै आग लगातार जळदी रहवै; वो कदे बुझण न्ही पावै।"

अन्‍नबलि

14 "अन्‍नबलि के नियम-कायदे इस तरियां सै: हारुन के बेट्टे उसनै वेदी कै आग्गै यहोवा कै धोरै ले आवै। 15 अर वो अन्‍नबलि के तेल मिले होए मैदे म्ह तै मुट्ठी भर अर उसकै उप्पर का सारा लोबान ठाकै अन्‍नबलि कै यादगारी के तौर पै इस हिस्से नै यहोवा कै स्याम्ही सुखदायक सुगन्ध कै खात्तर वेदी पै जळावै। 16 अर उस म्ह तै जो बाकी रह जावै उसनै हारुन अर उसके बेट्टे खावै; वो बिना खमीर पवित्र स्‍थान म्ह खाया जावै, यानिके वे मिलापआळे तम्बू कै आँगण म्ह उसनै खावैं। 17 वो खमीर कै गेल्या पकाया ना जावै; क्यूँके मन्‍नै अपणे हवन म्ह तै उस ताहीं उनका खुद का हिस्सा होण कै खात्तर दिया सै; ज्यांतै जिसा पापबलि अर दोषबलि परमपवित्र सैं उस्से ढाळ वो भी सै। 18 थारी पीढ़ी-पीढ़ी म्ह हारुन के वंश के सारे आदमी उस म्ह तै खा सकै सैं, यहोवा के हवनां म्ह तै यो उनका हिस्सा सदा बण्या रहवैगा; जो कोए उन हवनां नै छुवै वो पवित्र ठहरैगा।"

याजकां की अन्‍नबलि

19 फेर यहोवा नै मूसा तै कह्या, 20 "जिस दिन हारुन का अभिषेक हो उस दिन वो अपणे बेट्याँ कै गेल्या यहोवा नै यो चढ़ावा चढ़ावै; यानिके एपा का दसमां हिस्सा मैद्दा रोज अन्‍नबलि म्ह चढ़ावै, उस म्ह तै आध्धा तड़कैए तड़क नै अर आध्धा साँझ कै बखत चढ़ावै। 21 वो तवे पै तेल तै पकाया जावै; जिब वो तेल तै तर हो ज्या फेर उसनै ले आईये, इस अन्‍नबलि के पके होए टुकड़े यहोवा कै सुखदायक सुगन्ध कै खात्तर चढ़ाईयों। 22 हारुन के बेट्याँ म्ह तै जो भी उस याजक पद पै अभिषिक्त होवैगा, वो भी उस्से तरियां का चढ़ावा चढ़ाया करैं; या धार्मिक विधि सदा कै खात्तर सै, के यहोवा कै स्याम्ही वो पूरा चढ़ावा जळाया जावै। 23 याजक के पूरे अन्‍नबलि सारे जळावै जावैं; वो कदे न्ही खाया जावै।"

पापबलि

24 फेर यहोवा नै मूसा तै कह्या, 25 "हारुन अर उसकै बेट्याँ तै या कह के पापबलि के नियम-कायदे ये सै: जिस जगहां म्ह होमबलि पशु मारया जावै सै उस्से म्ह पापबलि पशु भी यहोवा कै स्याम्ही बलि करया जावै; वो परमपवित्र सै। 26 जो याजक पापबलि चढ़ावै वो उस ताहीं खावै; वो पवित्र स्‍थान म्ह यानिके मिलापआळे तम्बू कै आँगण म्ह खाया जावै। 27 जो कुछ उसकै माँस तै छुया जावै, वो पवित्र ठहरैगा; अर जै उसके लहू के छिट्टे किसे के कपड़यां पै पड़ ज्यां, तो उस ताहीं पवित्र स्‍थान म्ह धो दियो। 28 अर वो माट्टी का बरतन जिस म्ह वो पकाया गया हो तोड़ दिया जावै; जै वो पीत्तळ कै बरतन म्ह उबाळया गया हो, तो वो मांज्या जावै, अर पाणी तै धो लिया जावै। 29 याजकां म्ह तै सारे माणस उसनै खा सकै सै; वो परमपवित्र चीज सै। 30 पर जिस पापबलि पशु कै लहू म्ह तै कुछ भी लहू मिलापआळे तम्बू कै भित्तर पवित्र स्‍थान म्ह प्रायश्चित करण खात्तर पोहचाया जावै उसका माँस कदे न्ही खाया जावै; वो आग म्ह जळा दिया जावै।"