खास त्यौहार का दिन
1 फेर यहोवा नै मूसा तै कह्या, 2 "इस्राएलियाँ तै कह के यहोवा के त्यौहार जिनका थमनै पवित्र सभा कठ्ठी करण कै खात्तर सही बखत पै प्रचार करणा होवैगा, मेरे वे त्यौहार ये सैं।"
सब्त
3 "छः दिन काम-काज करया जावै, पर सातवाँ दिन परमविश्राम का अर पवित्र सभा का दिन सै; उस म्ह किसे ढाळ का काम-काज न्ही करया जावै; वो थारे सारे घरां म्ह यहोवा का विश्रामदिन ठहरै।"
फसह अर अखमीरी रोट्टी
4 "फेर यहोवा के त्यौहार जिन म्ह तै एक-एक के ठहराये होए बखत म्ह थमनै पवित्र सभा करण कै खात्तर प्रचार करणा होवैगा वे ये सैं। 5 पैहले महिन्ने कै23:5 पैहले महिन्ने कै इब्रानी म्हीन्या कै हिसाब तै यो दिन साल कै बीच म्ह सी आवै चौदहवें दिन म्ह साँझ कै बखत यहोवा का फसह का त्यौहार होया करै। 6 अर उस्से महिन्ने कै पन्द्रहवें दिन नै यहोवा कै खात्तर अखमीरी रोट्टी का त्यौहार होया करै; उस म्ह थम सात दिन तक अखमीरी रोट्टी खाया करियो। 7 उन म्ह तै पैहले दिन23:7 पैहले दिन त्यौहार का पैहला दिन थारी पवित्र सभा हो; अर उस दिन मेहनत का कोए काम ना करियो। 8 अर सातों दिन थम यहोवा नै हव्य चढ़ाया करियो; अर सातमै दिन पवित्र सभा हो; उस दिन मेहनत का कोए काम ना करियो।"
पैहली फसल का त्यौहार
9 फेर यहोवा नै मूसा तै कह्या, 10 "इस्राएलियाँ तै कह के जिब थम उस देश म्ह दाखल होवो जिस ताहीं यहोवा थारे तै देवै सै अर उस म्ह के खेत काट्टो, फेर अपणे-अपणे पके खेत की पैहली उपज का पूळा याजक कै धोरै ल्याया करियो; 11 अर वो उस पूळे नै यहोवा कै स्याम्ही हिलावै के वो थारै खात्तर ग्रहण करया जावै; वो उसनै विश्रामदिन के आगले दिन हिलावै। 12 अर जिस दिन थम पूळे नै हिलवाओ उस्से दिन एक साल का बेकसूर भेड़ का बच्चा यहोवा कै खात्तर होमबलि चढ़ाईयों। 13 अर उसकै गेल्या का अन्नबलि एपा कै दो दसमां हिस्सा23:13 दो दसमां हिस्सा 2 किलोग्राम मैद्दा अर 1 लीटर दाखमधु तेल तै सणे होए मैद्दे का हो वो सुखदायक सुगन्ध कै खात्तर यहोवा का हवन हो; अर उसकै गेल्या का अर्घ हीन23:13 अर्घ हीन लगभग 1 किलोग्राम जैतून का तेल भर की चौथाई दाखमधु हो। 14 अर जिब तक थम इस चढ़ावै नै अपणे परमेसवर कै धोरै ले जाओ, उस दिन तक नये खेत म्ह तै ना तो रोट्टी खाईयों अर ना भून्या होया अन्न अर ना हरी बाल; यो थारी पीढ़ी-पीढ़ी म्ह थारे सारे कुण्बे म्ह सदा की विधि ठहरै।"
सप्ताहां का त्यौहार
15 "फेर उस विश्रामदिन कै दुसरे दिन तै, यानिके जिस दिन थम हलाई जाण आळी भेंट कै पूळे नै ल्याओगे, उस दिन तै पूरे सात विश्रामदिन गिण लियो; 16 सातमै विश्रामदिन के आगले दिन तक पचास दिन गिणना, अर पचासवें दिन यहोवा कै खात्तर नया अन्नबलि चढ़ाईयों। 17 थम अपणे घर म्ह तै एपा23:17 एपा 2 किलोग्राम मैद्दा के दो दसमां हिस्से मैदे की दो रोट्टी हिलाण की भेंट कै खात्तर ले आणा; वे खमीर कै गेल्या पकाई जावैं, अर यहोवा कै खात्तर पैहली उपज ठहरै। 18 अर उस रोट्टी के गैल एक-एक साल के सात बेकसूर भेड़ के बच्चे, अर एक बाछड़ा, अर दो मिंढे चढ़ाईयों; वे अपणे-अपणे गैल के अन्नबलि अर अर्घ सुधा यहोवा कै खात्तर होमबलि की ढाळ चढ़ाए जावैं, यानिके वे यहोवा कै खात्तर सुखदायक सुगन्ध देण आळा हवन ठहरै। 19 फेर पापबलि कै खात्तर एक बकरा, अर मेलबलि कै खात्तर एक-एक साल कै दो भेड़ के बच्चे चढ़ाईयों। 20 फेर याजक उननै पैहली उपज की रोट्टी सुधा यहोवा कै स्याम्ही हिलाण की भेंट कै खात्तर हिलावै, अर इन रोटियाँ कै गैल वे दो भेड़ के बच्चे भी हिलाए जावैं; वे यहोवा कै खात्तर पवित्र, अर याजक का हिस्सा ठहरै। 21 अर थम उस दिन यो प्रचार करियो, के आज म्हारी एक पवित्र सभा होवैगी; अर मेहनत का कोए काम ना करियो; या थारे सारे कुण्बे म्ह थारी पीढ़ी-पीढ़ी म्ह सदा की विधि ठहरै।"
22 "जिब थम अपणे देश म्ह के खेत काट्टो, फेर अपणे खेत कै कुण्यां नै पूरी तरियां तै ना काटियो, अर खेत म्ह गिरी होई बाल्लां नै कठ्ठा ना करियो; उसनै गरीब अर परदेशी कै खात्तर छोड़ दियो; मै थारा परमेसवर यहोवा सूं।"
नये साल का त्यौहार
23 फेर यहोवा नै मूसा तै कह्या, 24 "इस्राएलियाँ तै कह के सातमै महिन्ने कै पैहल्ड़े दिन म्ह थारे खात्तर परमविश्राम हो; उस दिन नै याद दुवाण कै खात्तर नरसिंगे फूँके जावैं, अर एक पवित्र सभा कठ्ठी हो। 25 उस दिन थम मेहनत का कोए काम ना करियो, अर यहोवा कै खात्तर एक हवन चढ़ाईयों।"
प्रायश्चित का दिन
26 फेर यहोवा नै मूसा तै कह्या, 27 "उसे सातमै महिन्ने के दसवें दिन प्रायश्चित का दिन मान्या जावै; वो थारी पवित्र सभा का दिन होवैगा, अर उस म्ह थम उपवास करियो अर यहोवा का हवन चढ़ाईयों। 28 उस दिन थम किसे ढाळ का काम-काज ना करियो; क्यूँके वो प्रायश्चित का दिन ठहराया गया सै जिस म्ह थारे परमेसवर यहोवा कै स्याम्ही थारै खात्तर प्रायश्चित करया जावैगा। 29 इस करकै जो माणस उस दिन उपवास ना करै वो अपणे माणसां म्ह तै नाश करया जावैगा। 30 अर जो माणस उस दिन किसे ढाळ का काम-काज करै सै उस माणस नै मै उसके माणसां के बीच म्ह तै नाश कर दियुँगा। 31 थम किसे ढाळ का काम-काज ना करियो; या थारी पीढ़ी-पीढ़ी म्ह थारे घरान्यां म्ह सदा की विधि ठहरै। 32 वो दिन थारे खात्तर परमविश्राम का हो, उस म्ह थम उपवास करियो; अर उस महिन्ने कै नोम्मे दिन की साँझ तै आगली साँझ तक अपणा विश्रामदिन मान्या करियो।"
झोपड़ियां का त्यौहार
33 फेर यहोवा नै मूसा तै कह्या, 34 "इस्राएलियाँ तै कह के उस्से सातमै महिन्ने कै पन्द्रहवें दिन तै सात दिन तक यहोवा कै खात्तर झोपड़ियां का त्यौहार रह्या करै। 35 पैहल्ड़े दिन पवित्र सभा हो; उस म्ह मेहनत का कोए काम ना करया जावै। 36 सातों दिन यहोवा कै खात्तर हवन चढ़ाया करियो, फेर आठवें दिन थारी पवित्र सभा हो, अर यहोवा कै खात्तर हवन चढ़ाईयों; वो बड्डी सभा का दिन सै, अर उस म्ह मेहनत का कोए काम ना करियो।"
37 "यहोवा के त्यौहार येए सैं, इन म्ह थम यहोवा नै हवन चढ़ाईयों, यानिके होमबलि, अन्नबलि, मेलबलि, अर अर्घ, हरेक अपणे-अपणे सही बखत पै चढ़ाएँ जावै अर पवित्र सभा का प्रचार करियो। 38 इन सारया तै घणा यहोवा कै विश्रामदिनां नै मानियो, अर अपणी भेटां, अर सारी मन्नतां, अर स्वेच्छाबलियां नै जो यहोवा तै अर्पण करोगे चढ़ाया करियो।"
39 "फेर सातमै महिन्ने कै पन्द्रहवें दिन नै, जिब थम देश की उपज नै कठ्ठा कर ल्यो, फेर सात दिन तक यहोवा का त्यौहार मनाईयो; पैहल्ड़े दिन परमविश्राम हो, अर आठवें दिन परमविश्राम हो। 40 अर पैहल्ड़े दिन थारे आच्छे-आच्छे दरखत्तां की उपज, अर खजूर कै पत्ते, अर घणे दरखत्तां की डाळी, अर नदी म्ह कै मजनू नै लेकै अपणे परमेसवर यहोवा कै स्याम्ही सात दिन तक खुशी मनाईयो। 41 हरेक साल सात दिन तक यहोवा कै खात्तर त्यौहार मान्या करियो; या थारी पीढ़ी-पीढ़ी म्ह सदा की विधि ठहरै, के सातमै महिन्ने म्ह यो त्यौहार मान्या जावै। 42 सात दिन ताहीं थम झोपड़ियां म्ह रह्या करियो, यानिके जितने जन्म के इस्राएली सै वे सारे के सारे झोपड़ियां म्ह रहवै,"
43 "ज्यांतै के थारी पीढ़ी-पीढ़ी के माणस जाण सकै, के जिब यहोवा हम इस्राएलियाँ नै मिस्र देश तै लिकाड़कै ल्याण लागरया था फेर उसनै उन ताहीं झोपड़ियां म्ह टिकाया था; मै थारा परमेसवर यहोवा सूं।" 44 अर मूसा नै इस्राएलियाँ तै यहोवा के त्यौहार के सही बखत कह सुणाए।