1 "थम अपणे खात्तर मूर्ति ना बणाईयो, अर ना कोए खुदी होई मूर्ति या खम्बा अपणे खात्तर खड्या करियो, अर ना अपणे देश म्ह दण्‍डवत करण कै खात्तर नक्‍काशीदार पत्थर स्थापित करियो; क्यूँके मै थारा परमेसवर यहोवा सूं। 2 थम मेरै विश्रामदिनां का पालन करियो अर मेरै पवित्र स्‍थान का भय मानियो; मै यहोवा सूं।"

3 "जै थम मेरे नियमां पै चाल्‍लों अर मेरे हुकमां नै मानकै उनका पालन करो, 4 तो मै थारै खात्तर बखत-बखत पै मिह बरसाऊँगा, अर धरती अपणी उपज उगावैगी, अर मैदान के दरखत्त अपणे-अपणे फळ दिया करैंगे; 5 उरै ताहीं के थम अंगूर तोड़ण कै बखत भी दाँवणी करदे रहोगे, अर बोण कै बखत भी भर-पेट अंगूर तोड़दे रहोगे, अर थम मनमान्‍नी रोट्टी खाया करोगे, अर अपणे देश म्ह बेफिकर बसे रहोगे। 6 अर मै थारै देश म्ह सुख-चैन दियुँगा, अर थम सोओगे अर थमनै कोए डराण आळा न्ही होवैगा; अर मै उस देश म्ह खतरनाक जन्तुआं नै न्ही रहण दियुँगा, अर तलवार थारे देश म्ह न्ही चाल्‍लैगी। 7 अर थम अपणे बैरियाँ नै मार भगा द्योगे, अर वे थारी तलवार तै मारे जावैंगे। 8 थारे म्ह तै पाँच माणस सौ नै अर सौ माणस दस हजार नै भजावैंगें; अर थारे बैरी तलवार तै थारै आग्गै-आग्गै मारे जावैंगे; 9 अर मै थारी ओड़ दया की निगांह करुँगा अर थारे ताहीं फळवन्त करुँगा अर बढ़ाऊँगा, अर थारै गैल अपणे करार नै पूरा करुँगा। 10 अर थम धरे होए पुराणे अनाज नै खाओगे, अर नये कै रहंदे भी पुराणे नै लिकाड़ोगे। 11 अर मै थारै बिचाळै अपणा निवास-स्थान बणाए राखूँगा, अर मेरा जी थारे तै नफरत न्ही करैगा। 12 अर मै थारे बिचाळै चल्या फिरया करुँगा, अर थारा परमेसवर बण्या रहूँगा, अर थम मेरी प्रजा बणे रहोगे। 13 मै तो थारा वो परमेसवर यहोवा सूं, जो थारे ताहीं मिस्र देश तै इस करकै लिकाड़ ले आया, के थम मिस्रियाँ के गुलाम ना बणे रहो; अर मन्‍नै थारे जूए ताहीं तोड़ दिया सै, अर थारे ताहीं सीध्धा खड्या करकै चलाया सै।"

14 "जै थम मेरी न्ही सुणोगे, अर इन सारे हुकमां नै न्ही मान्‍नोगे, 15 अर मेरी विधियाँ नै निकम्मा जाणोगे, अर थारी आत्मा मेरे फैसल्यां तै नफरत करै, अर थम मेरे सारे हुकमां का पालन न्ही करोगे, बल्के मेरे करार नै तोड़ोगे, 16 तो मै थारे तै न्यू करुँगा; यानिके मै थमनै बेचैन करुँगा, अर क्षयरोग अर बुखार तै पीड़ित करुँगा, अर इनकै कारण थारी आँख धुँधळी हों जावैंगी, अर थारा मन घणा उदास होवैगा। अर थारा बीज बोणा बेकार होवैगा, क्यूँके थारे बैरी उसकी उपज खा लेवैगें; 17 अर मै भी थारे बिरुध्द हो ज्याऊँगा, अर थम अपणे बैरियाँ तै हार जाओगे; अर थारे बैरी थारै उप्पर हक जमावैंगें, अर जिब कोए थमनै भजावै भी कोनी, फेर भी थम भाज्जोगे। 18 अर जै थम इन बात्तां कै बाद भी मेरी न्ही सुणो, तो मै थारे पापां के कारण थमनै सातगुणा ताड़ना और दियुँगा, 19 अर मै थारी ताकत्त का घमण्ड तोड़ दियुँगा, अर थारे खात्तर अकास नै मान्‍नो लोहे का अर धरती नै मान्‍नो पीत्तळ की बण्या दियुँगा; 20 अर थारा बल बेकार म्ह गँवाया जावैगा, क्यूँके थारी धरती अपणी पैदावार न्ही देवैगी, अर मैदान के दरखत्त अपणे फळ न्ही देवैंगे।"

21 "जै थम मेरै बिरुध्द चाल्दे-ए रहो, अर मेरा कहणा ना मान्‍नो, तो मै थारै पापां कै मुताबिक थारे उप्पर और सात गुणा मुसीबत्त गेरूँगा। 22 अर मै थारे बिचाळै बणपशु भेज्जूँगा, जो थमनै बेबस करैंगे, अर थारे घरेलू डान्गरां नै नाश कर देवैंगे, अर थारी गिणती घटावैगें, जिसतै थारी सड़क सून्‍नी पड़ ज्यांगी।"

23 "फेर जै थम इन बात्तां पै भी मेरी ताड़ना तै ना सुधरो, अर मेरै बिरुध्द चाल्दे-ए रहो, 24 तो मै भी थारे बिरुध्द चाल्‍लूँगा, अर थारे पापां के कारण मै खुद ए थारे ताहीं सात गुणा मारूँगा। 25 अर मै थारे पै एक इसी तलवार चलवाऊँगा, जो करार तोड़ण का पूरा-पूरा बदला लेगी; अर जिब थम अपणे नगरां म्ह जा-जाकै कठ्ठे होवोगे फेर मै थारे बिचाळै मरी फैलाऊँगा, अर थम अपणे बैरियाँ कै बस म्ह सौंप दिए जाओगे। 26 जिब मै थारै खात्तर अन्‍न कै आधार नै दूर कर दियुँगा, फेर दस बिरबान्‍नी थारी रोट्टी एक ए तंदूर म्ह पका कै तौल-तौल कै बांड देंगी; अर थम खाकै भी न्ही छिकोगे।"

27 "फेर जै थम इसकै बाद भी मेरी न्ही सुणोगे, अर मेरै बिरुध्द चाल्दे-ए रहोगे, 28 तो मै अपणे न्याय म्ह थारै बिरुध्द चाल्‍लूँगा, अर थारे पापां के कारण थमनै सातगुणी ताड़ना और भी दियुँगा। 29 अर थारे ताहीं अपणे बेट्याँ अर बेटियाँ का माँस खाणा पड़ैगा। 30 अर मै थारे पूजा की ऊँच्‍ची जगहां नै गेर दियुँगा, अर थारे सूरज की मूर्तियाँ तोड़ दियुँगा, अर थारी लोथां नै थारी तोड़ी होई मूर्तियाँ पै बगा दियुँगा; अर मेरी आत्मा नै थारे तै नफरत हो जावैगी। 31 अर मै थारे नगरां नै उजाड़ दियुँगा, अर थारे पवित्रस्‍थानां नै उजाड़ दियुँगा, अर थारा सुखदायक सुगन्ध कबूल न्ही करुँगा। 32 अर मै थारे देश नै सुन्‍ना कर दियुँगा, अर थारे बैरी जो उस म्ह रहवै सैं वे इन बात्तां कै कारण हैरान होवैगें। 33 अर मै थारे ताहीं हरेक देश के माणसां कै बिचाळै तित्तर-भित्तर करुँगा, अर थारे पाच्छै-पाच्छै तलवार खिचे रहूँगा; अर थारा देश सुन्‍ना हो ज्यागा, अर थारे नगर उजाड़ हो जावैंगे।"

34 "फेर जितने दिन वो देश सुन्‍ना पड्या रहवैगा अर थम अपणे बैरियाँ कै देश म्ह रहोगे उतने दिन वो अपणे विश्रामकालां नै मान्दा रहवैगा। फेर ए वो देश आराम पावैगा, यानिके अपणे विश्रामकालां नै मान्दा रहवैगा। 35 जितने दिन वो सुन्‍ना पड्या रहवैगा उतने दिन उसनै आराम रहवैगा, यानिके जो आराम उसनै थारै ओड़ै बसै रहण कै बखत विश्रामकालां म्ह न्ही मिल्या होगा वो उसनै फेर मिलैगा। 36 अर थारे म्ह तै जो बचे रहवैंगे अर अपणे बैरियाँ कै देश म्ह होवैगें उनकै मन म्ह मै कायरता उपजाऊँगा; अर वे पत्ते कै खड़कण तै भी भाग जावैंगे, अर वे इसे भाजैंगे जिस तरियां कोए तलवार तै भाज्जै, अर किसे के बिना पिच्छा करे भी वे गिर पड़ैंगे। 37 जिब कोए पिच्छा करणीया ना हो फेर भी मान्‍नो तलवार कै डर तै वे एक-दुसरे तै ठोक्‍कर खाकै गिरदे जावैंगे, अर थमनै अपणे बैरियाँ कै स्याम्ही ठहरण की कुछ ताकत ना होवैगी। 38 फेर थम जात-जात के माणसां कै बिचाळै पोहचकै नाश हो जाओगे, अर थारे दुश्मनां की धरती थारे ताहीं खा ज्यागी। 39 अर थारै म्ह तै जो बचे रहवैंगें वे अपणे बैरियाँ कै देशां म्ह अपणे अधर्म कै कारण गळ जावैंगे; अर अपणे पूर्वजां के अधर्म के काम्मां कै कारण भी वे उन्हे की ढाळ गळ जावैंगे।"

40 "पर जै वे अपणे अर अपणे पितरां के अधर्म कै काम्मां नै मान लेवैगें, यानिके उस बिश्वासघात नै जो उननै मेरै बिरुध्द करया, अर या भी मान लेवैगें, के हम यहोवा कै बिरुध्द चाल्‍ले थे, 41 इस्से करकै वो म्हारे खिलाफ होकै हमनै दुश्मनां कै देश म्ह ले आया सै। जै उस बखत उनका खतनारहित हृदय दब जावैगा अर वे उस बखत अपणे अधर्म की सजा नै मान लेवैंगे; 42 फेर जो करार मन्‍नै याकूब के गैल करया था उसनै मै याद करुँगा, अर जो करार मन्‍नै इसहाक तै अर जो करार मन्‍नै अब्राहम तै करया था उननै भी याद करुँगा, अर इस देश नै भी मै याद करुँगा। 43 पर वो देश उनतै दूर होकै सुन्‍ना पड्या रहवैगा, अर उनकै बिना सुन्‍ना रहकै भी अपणे आराम के बखतां नै मान्दा रहवैगा; अर वे माणस अपणे अधर्म की सजा नै मान लेगें, इस्से कारण तै के उननै मेरे हुकमां का उलंघण करया था, अर उनकी आत्मा नै मेरी विधियाँ तै नफरत थी। 44 इतणै पै भी जिब वे अपणे बैरियाँ कै देश म्ह होवैंगे, फेर मै उननै इस तरियां न्ही छोड़ूँगा, अर ना उनतै इसी नफरत करुँगा के उनका सत्यानाश कर दियुँ अर अपणे उस करार नै तोड़ दियुँ। जो मन्‍नै उनतै करया सै; क्यूँके मै उनका परमेसवर यहोवा सूं; 45 पर मै उनकी भलाई कै खात्तर उनके पितरां तै करे होए करार नै याद करुँगा, जिननै मै गैरजात्तां की आँखां कै स्याम्ही तै मिस्र देश तै लिकाड़ ल्याया के मै उनका परमेसवर ठहरूँ; मै यहोवा सूं।"

46 जो-जो विधियाँ अर नियम-कायदे यहोवा नै अपणी ओड़ तै इस्राएलियाँ कै खात्तर सीनै पर्वत पै मूसा कै जरिये तय करे थे वे येए सैं।