1 यहूदा के राजा उज्जियाह, योताम, आहाज, अर हिजकिय्याह कै दिनां म्ह अर इस्राएल के राजा यहोआश के बेट्टे यारोबाम के दिनां म्ह, यहोवा का वचन बेरी के बेट्टे होशे* कै धोरै पोहच्या।

2 जिब यहोवा नै होशे के जरिये पैहले-पहल बात करी, फेर उसनै होशे तै न्यू कह्या, "जाकै एक वेश्या नै अपणी घरआळी बणा ले, अर उसके कुकर्म के बाळकां नै अपणे बाळक बणाले, क्यूँके यो देश यहोवा कै पाच्छै चालणा छोड़कै वेश्या का जिसा काम करै सै।" 3 आखर म्ह उसनै जाकै दिबलैम की बेट्टी गोमेर ताहीं अपणी घरआळी कर लिया, अर वा उसतै गर्भवती होई अर उसकै छोरा पैदा होया।

4 फेर यहोवा नै उसतै कह्या, "उसका नाम यिज्रेल धर*; क्यूँके थोड़े ए बखत म्ह मै राजा येहू के घरान्‍ने नै यिज्रेल की हत्या की सजा देऊँगा, अर मै इस्राएल के घरान्‍ने के राज्य का अन्त कर दियुँगा। 5 उस बखत मै यिज्रेल की तराई म्ह इस्राएल के धनुष नै तोड़ गेरूँगा।"

6 वा जनान्‍नी फेर गर्भवती होई अर उसकै एक छोरी पैदा होई। फेर यहोवा नै होशे तै कह्या, "उसका नाम लोरुहामा* धर; क्यूँके मै इस्राएल के घरान्‍ने पै फेर कदे दया करकै उनका अपराध किसे तरियां तै माफ न्ही करुँगा। 7 पर यहूदा के घरान्‍ने पै मै दया करुँगा, अर उनका उद्धार करुँगा; उनका उद्धार मै धनुष या तलवार या युद्ध या घोड़यां या सवारां के जरिये न्ही, पर उनके परमेसवर यहोवा के जरिये करुँगा।"

8 जिब उस जनान्‍नी नै लोरुहामा का दूध छुड़ाया, वा फेर गर्भवती होई अर उसतै एक बेट्टा पैदा होया। 9 फेर यहोवा नै कह्या, "इसका नाम लोअम्मी धर; क्यूँके थम मेरी प्रजा न्ही सो, अर ना मै थारा परमेसवर रहूँगा।"

10 तोभी इस्राएलियाँ की गिणती समुन्दर के रेत की तरियां हो जावैगी, जिनका मापणा गिणना अनहोणा सै; अर जिस जगहां म्ह उनतै या कह्या जावै था, "थम मेरी प्रजा न्ही सो," उसे जगहां म्ह वे जिन्दा परमेसवर के बेट्टे कुह्वावैगें।

11 फेर यहूदी अर इस्राएली दोन्‍नु कठ्ठे हो अपणा एक प्रधान ठहराकै देश तै चले आवैंगे; क्यूँके यिज्रेल का दिन प्रसिद्ध होवैगा।