होशे 12

यहूदा के पाप पै परमेसवर का छो

1 एप्रैम हवा चराण अर पुरवाई का पिच्छा करदा रहवै सै; वो लगातार झूठ अर हुड़दंग नै बढ़ान्दा रहवै सै; वे अश्शूर कै गैल करार बान्धै अर मिस्र म्ह तेल भेज्जै सैं। 2 यहूदा कै गैल भी यहोवा का मुकद्दमा सै, अर वो याकूब नै उसके चाल चलण कै मुताबिक सजा देवैगा; उसके काम्मां कै मुताबिक वो उसनै बदला देवैगा। 3 अपणी माँ की कोख म्ह ए याकूब नै अपणे भाई ताहीं अड़ंगा मारया, अर बड़ा होकै वो परमेसवर कै गैल लड्या। 4 वो दूत तै लड्या, अर जीत भी गया, वो रोया अर उसनै गिड़गिड़ाकै बिनती करी। बेतेल म्ह वो उसनै मिल्या, अर ओड़ैए उसनै म्हारे तै बात करी। 5 यहोवा, सेनाओं का परमेसवर, जिस ताहीं यहोवा के नाम तै याद करया जावै सै। 6 इस करकै तू अपणे परमेसवर की और मुड़; कृपा अर न्याय के काम करदा रहो, अर अपणे परमेसवर की बाट लगातार देखदा रहो।

7 वो व्यापारी सै, अर उसके हाथ म्ह छळ का तराजू सै; अंधेर करणा ए उसनै भावै सै। 8 एप्रैम कहवै सै, "मै अमीर होग्या, मन्‍नै सम्पत्ति ली सै; मेरे किसे काम म्ह इसा अधर्म न्ही पाया गया जिसतै पाप लाग्गै।" 9 मै यहोवा, मिस्र देश तै ए तेरा परमेसवर सूं*12:9 मै यहोवा, मिस्र देश तै ए तेरा परमेसवर सूं परमेसवर, कुछ ए कहण म्ह, सारी शताब्दियाँ के आशीर्वाद यानिके मिस्र तै उन माणसां के बाहर लिकड़ण तै लेकै आज के दिन तक मिस्र म्ह करे गए सारे चमत्कारां नै शामिल कर देवै सै।; मै फेर तेरे ताहीं तम्बुआ म्ह इसा बसाऊँगा जिसा ठीक त्यौहार के दिनां म्ह होया करै सै।

10 मन्‍नै भविष्यवक्ता के जरिये बात करी, अर बार-बार दर्शन देन्दा रहया; अर भविष्यवक्ता के जरिये उदाहरण कहन्दा आया सूं। 11 के गिलाद कुकर्मी न्ही? वे पूरे छळ करण आळे होगे सै। गिलगाल म्ह बळध बलि करे जावैं सैं, बलके उनकी वेदी उन ढेरां की तरियां सै जो खेत की क्यारियाँ के धोरै हों। 12 याकूब अराम के मैदान म्ह भाज ग्या था; ओड़ै इस्राएल नै एक घरआळी कै खात्तर सेवा करी, अर घरआळी कै खात्तर वो पाळी रहया था। 13 एक भविष्यवक्ता कै जरिये यहोवा इस्राएल नै मिस्र तै लिकाड़ ले आया, अर भविष्यवक्ता ए कै जरिये उसकी हिफाजत होई। 14 एप्रैम नै भोत रिस दिलाई सै; इस करकै उसका करया होया खून उसे कै उप्पर बण्या रहवैगा, अर उसनै अपणे परमेसवर के नाम म्ह जो बट्टा लगाया सै, वो उसे ताहीं बोहड़ाया जावैगा।