होशे 9

इस्राएल के पाप का न्याय

1 हे इस्राएल, तू देश-देश कै माणसां की तरियां आनन्द म्ह मगन ना हो! क्यूँके तू अपणे परमेसवर नै छोड़कै वेश्या बणी। तन्‍नै अन्‍न के हर एक खलिहाण पै ओच्छेपण की कमाई आनन्द तै ली सै। 2 वे ना तो खलिहाण के अन्‍न तै छिक जावैंगे, अर ना कुण्ड के दाखमधु तै; अर नये दाखमधु के घटण तै वे धोखा खावैंगे। 3 वे यहोवा के देश म्ह रहण न्ही पावैंगें; पर एप्रैम मिस्र म्ह बोहड़ जावैगा, अर वे अश्शूर म्ह अशुद्ध चीज खावैंगे।

4 वे यहोवा कै खात्तर दाखमधु का अर्घ न्ही देवैंगे, अर ना उनके बलिदान उसनै भावैंगें*9:4 ना उनके बलिदान उसनै भावैंगें क्यूँके उनके धोरै परमेसवर कै गैल मेल-मिलाप कै खात्तर निर्धारित साधन न्ही रहे होवैंगे।। उनकी रोट्टी शोक करण आळयां का जिसा भोजन ठहरैगी; जितने उसनै खावैंगे सारे अशुद्ध हो जावैंगे; क्यूँके उनकी खाण की चीज उनकी भूख बुझाण कै ए खात्तर होवैगी; वो यहोवा के भवन म्ह ना आ सकैगी।

5 सही बखत के त्यौहार अर यहोवा के त्यौहार के दिन थम के करोगे? 6 देक्खो, वे सत्यानाश होण के डर के मारे चले गए; पर ओड़ै मर जावैंगे अर मिस्री उनकी लाश कठ्ठी करैंगे; अर मोप के बासिन्दे उननै माट्टी देंवैंगे। उनकी मनभावणी चाँदी की चीज बिच्छु दरखत्तां कै बीच म्ह पड़ैंगी, अर उनके तम्बुआ म्ह काण्डे उगैंगे।

7 सजा के दिन आवैं सै; बदला लेण के दिन आवैं सैं; अर इस्राएल या जाण लेगा। उनके भोत-से अधर्म अर घणी जळण कै कारण भविष्यवक्ता तो मूर्ख, अर जिस माणस पै आत्मा उतरै सै, वो बावळा ठहरैगा।

8 एप्रैम का पहरेदार मेरे परमेसवर कै गैल था; पर भविष्यवक्ता सारे राह म्ह बहेलिये का फंदा सै, अर वो अपणे परमेसवर के घर म्ह बैरी होया सै। 9 वे गिबा के दिनां की तरियां घणे बिगड़े सै; इस करकै परमेसवर उनके अधर्म नै याद करकै उनके पाप की सजा देवैगा।

10 मन्‍नै इस्राएल ताहीं इसा पाया*9:10 इस्राएल ताहीं इसा पाया परमेसवर के जरिये पाण का मतलब यो न्ही के उसतै कुछ खो ग्या हो या वो जाण्दा ना हो के वो कित्त था अर चाणचक ए उसनै दिख ग्या हो जिसकी उसनै उम्मीद ना थी। उसके सम्बन्ध के परिप्रेक्ष्य म्ह इस्राएल भटक ग्या था जिब परमेसवर नै उन ताहीं पाया। जिस तरियां प्रभु यीशु नै उड़ाऊ बेट्टे की कहाणी म्ह बताया सै नए नियम म्ह। जिस तरियां कोए जंगळ म्ह दाख पावै; अर थारे पुरखां पै इसी नजर करी जिस तरियां अंजीर के पैहले फळां पै नजर करी जावै सै। पर उननै बालपोर कै धोरै जाकै अपणे ताहीं शर्म का कारण होण कै खात्तर अर्पण कर दिया, अर जिसपै मोहित होगे थे, वे उसे की तरियां घिनोणे होगे। 11 एप्रैम का वैभव पक्षी की तरियां उड़ जावैगा; ना तो किसे का जन्म होवैगा, ना किसे ताहीं गर्भ रहवैगा, अर ना कोए जनान्‍नी गर्भवती होवैगी! 12 चाहे वे अपणे बाळकां का पालन-पोषण कर कै बड़े भी करै, तोभी मै उननै उरै ताहीं बेबस करुँगा के कोए भी ना बचैगा। जिब मै उनतै दूर हो जाऊँगा, फेर उनपै हाय! 13 जिसा मन्‍नै सोर ताहीं देख्या, उसाए एप्रैम ताहीं भी मनभाऊ जगहां म्ह बस्या होया देख्या; फेर भी उसनै अपणे बाळकां ताहीं नाश करण आळे कै स्याम्ही ले जाणा पड़ैगा। 14 हे यहोवा, उननै सजा दे! तू के देवैगा? यो, के उनकी जनानियाँ के गर्भ गिर जावैं, अर स्तन सूखे रहवैं।

15 उनकी सारी बुराई गिलगाल म्ह सै; ओड़ैए मन्‍नै उनतै घृणा करी। उनके बुरे काम्मां कै कारण मै उननै अपणे घर तै लिकाड़ देऊँगा। अर उनतै फेर प्यार ना करुँगा, क्यूँके उनके सारे हाकिम धोक्खा देण आळे सै।

16 एप्रैम मारया होया सै, उनकी जड़ सूखगी, उन म्ह फळ ना लागैगा। चाहे उनकी जनान्‍नी बच्‍चे भी जणै तोभी मै उनके जाम्मे होए लाडल्यां नै मार गेरुगां।

17 मेरा परमेसवर उननै निकम्मा ठहरावैगा, क्यूँके उननै उसकी न्ही सुणी। वे गैर जातियाँ कै बीच मारे-मारे फिरैंगे।