1 आऊँ शारोन देशो रा गुलाब

ओर काअटिया बीचला सोसणो रे फूलो जेड़ा ए।*2:1 यशा. 35:2; 65:10

वर

2 जिंयाँ सोसणो रा फूल कांडेया बीचे खिलोआ

तिंयाँ ई मेरी प्यारी जवाणसा बीचे सजी री ए।

वधू

3 जिंयाँ सेऊआ रे डाल़ जंगल़ो दे ओरी डाल़ा बीचे ए,

तिंयाँ ई मेरा प्रेमी जवाना बीचे ए।

आऊँ तेसरिया छांयी रे खुश ऊई की बैठी गी

ओर तेसरा फल माखे खाणे रे मीठा लगेया।*2:3 प्रकाशित 22:1,2

4 से माखे बड़े खाणे वाल़े कअरो दे लई आया,

ओर आऊँ तिने आपणे प्यारे की टकी ती।

5 सेलियो! तुसे माखे किशमिश*2:5 सुकी दाख खुल़ाई की तागत देओ,

सेऊ खुल़ाई की माखे तरोताजा करो,

कऊँकि माखे प्यारो री बमारी लगी गी री।

6 काश, तेसरा खूँजा आथ मेरे सिरो निठे ऊँदा

ओर से माखे आपणे दाँणे आथो साथे गल़े लगांदा!

7 ओ यरूशलेमो री जवाणसो, आऊँ तुसा खे बारासींगिया

ओर मैदानो री ईरणियां री कसम देई की बोलूँई

कि तुसे म्हारे प्यारो दे बाधा नि डाल़ो।*2:7 बांके गाणे 3:5, 8:4

वधू

8 सुणो! मेरे प्रेमिये रे आऊणे री आवाज सुणने लगी री।

देखो एड़ा लगोआ कि से पाह्ड़ो पाँदिए उटकदा ओर पाह्ड़िया खे लाँगदा ऊआ मां कनारो खे आऊणे लगी रा।

9 मेरा प्रेमी बारासींगे या जवान ईरणो जेड़ा ए।

देखो से म्हारिया दवाला पीछे खड़ी रा

ओर द्धारिया रिया तरफा खे चांकी की देखणे लगी रा

ओर जाल़िया वाल़ी द्धारिया बीचा ते देखणे लगी रा।

10 मेरा प्रेमी माखे बोलणे लगी रा,

वर

ओ मेरी प्यारी, ओ मेरी सुन्दरी, उठी की मां साथे चल;

11 देख, यिऊँद चलीगा रा,

बरखा बी ऊई की चली गी री।*2:11 इस्राइलो दे सर्दिया दे तेज, ठण्डी बर्खा ओई

12 तरतिया पाँदे फूल फूलणे लगी रे,

चिड़िया रा गाणे रा बखत आईगा रा

ओर म्हारे देशो रे कबूतरो री आवाज सुणोई।

13 दाऊगल़े पाकणे लगी गे रे

ओर अंगूरा री बेला फूलणे लगी रिया,

सेयो खुशबू देणे लगी रिया।

ओ मेरी प्यारी, ओ मेरी सुन्दरी, उठी की मां साथे चल।

14 तुँ एक कबूतरिया जेड़ी ए, जो मांते दूर चट्टानी री खीड़ा रे लूकी री ए।

माखे आपणा मूँ दखा, ओर माखे आपणी आवाज सुणने दे,

कऊँकि तेरी आवाज मीठी ओर तेरा मूँ बऊत सुन्दर ए।

15 तिना छोटिया गीदड़िया खे पकड़ी लओ,

जो म्हारे फूल लगे दे अंगूरा रे बगीचे खे नाश करी सकोईया,*2:15 पजन 80:8-13, यहेजकेल 13:4

वधू

16 मेरा प्रेमी मेरा ए ओर आऊँ तेसरी ए,

से आपणियां पेडा-बाकरिया खे सोसणो रे फूला बीचे चराओआ।

17 जदुए तक दिन ठण्डा नि ओ ओर छांए लाम्बी ऊँदे-ऊँदे खत्म नि ओ,

तदुए तक ओ मेरे प्रेमी तेस बारासींगे या जवान ईरणो जेड़ा बण

जो बेतेर रे पाह्ड़ो पाँदे कूमोआ।