1 दाऊद राज़े इस्राएलेरे सब गोट्लां केरे हाकिम ते राज़ेरी सेवा केरनेबाले टोली केरे हाकिम ते हज़ारां ते शौवां केरे सेनापति ते राज़े तैसेरे मट्ठां केरे जानबर भी सारे धन दौलतरे अधिकारी, प्रधान ते सारे बहादर यरूशलेम नगरे मां कुजाए। 2 तैखन दाऊद राज़ो खड़ो भोइतां ज़ोने लगो, "हे मेरे ढ्लाव! ते हे मेरे लोकव! मेरी शुना, मेरो इरादो त थियो कि यहोवारे करारेरे सन्दूखेरे लेई ते इश्शे लोकां केरे परमेशरे पव्वां केरि चेवकरे लेई आरामेरे लेई अक भवन बनेइं, ते मीं तैसेरे बनानेरी तियारी भी कियोरी थी। 3 पन परमेशरे मीं सेइं ज़ोवं, ‘तू मेरे लेई भवन न बनेई बटेलो, किजोकि तू जंग केरने बालोस ते तीं जंगी मां खून बगेवरोए।’ 4 फिरी भी इस्राएलेरे परमेशर यहोवा मेरे बाजी केरे सारे घराने मरां अवं च़ुनो, कि इस्राएलेरो राज़ो हमेशा बनोरो रेईं मतलब तैनी यहूदा त प्रधान भोनेरे लेई ते यहूदारे घराने मरां मेरे बाजी केरो घरानो च़ुनो ते मेरे ढ्लान मरां अवें सारे इस्राएलेरो राज़ो बनानेरे लेई खुशी भोव। 5 ते मेरे सब मट्ठन मरां (यहोवा त मीं बड़ां मट्ठां दित्तोरन) तैनी मेरे सैरी मट्ठन मरां सुलैमान इस्राएले पुड़ यहोवारे लोकन पुड़ राज़ केरनेरे लेई च़ुनोरोए। 6 ते यहोवा मीं सेइं ज़ोवं, ‘तेरू मट्ठू सुलैमान मेरे भवन ते अंगना बनालू, किजोकि मीं तैन च़ुनोरूए कि तैन मेरू मट्ठू भोल्हु, ते अवं तैसेरो बाजी भोल्हो। 7 ते अगर तै मेरे हुक्मन ते नियमन मन्ने मां अज़्ज़ेरो ज़ेरो मज़बूत राए, त अवं तैसेरू राज़ हमेशा मज़बूत रखेलो।’ 8 एल्हेरेलेइ हुनी इस्राएलेरे हेरते मतलब यहोवारे लोकां केरे हेरते, ते अपने परमेशरेरे सामने, अपने परमेशर यहोवारे सारे हुक्म मन्ने ते तैन पुड़ ध्यान केरतो राए। ताके तुस इस रोड़े मुल्खेरे मालिक बनोरे राथ, ते इस अपने बाद अपने खानदाने हमेशारो हिस्सो भोनेरे लेई छ़ेडी गाथ।"

9 दाऊदे सुलैमाने सेइं ज़ोवं, "हे मेरा मट्ठां सुलैमान! तू अपने बाजी केरे परमेशरे याद रख, ते साफ मने सेइं ते खुशी सेइं तैसेरी सेवा केरतो रा। किजोकि यहोवा मने परखते ते सोचने मां ज़ैन किछ पैदा भोते, तै तैन समझ़ते। अगर तू तैसेरी तलाशी मां रालो, त तै तीं मैल्हेलो। पन अगर तू तैस शारस त तै हमेशारे लेई तीं शारेलो। 10 हुनी होशियार रा, यहोवाए तू अक एरहो भवन बनानेरे लेई च़ुनोरोस, ज़ै पवित्र ठार भोल्ही, हिम्मत रेखतां इस कम्मे मां लेग्गी गा।"

11 तैखन दाऊदे अपने मट्ठे सुलैमाने भवनेरे ओसारे, कमरे, भण्डार बेइयें छतरे कमरे, एंत्रीं कमरे, ते प्रायश्चित ढकनेरे लेई ठारारो नमूनो, 12 ते यहोवारे भवनेरां अंगना ते च़ेवरे पासां केरे कमरे, ते परमेशरेरे भवनेरे भण्डार ते च़ैढ़ोरी चीज़ां केरे भण्डार, ते ज़ै-ज़ै नमूनो परमेशरेरे आत्मारे ज़िरिये सेइं तैस मैल्होरो थियो, तैना सारे तैनी सुलैमाने दित्ते। 13 फिरी दाऊदे याजक ते लेवी केरि टोली, ते यहोवारे भवनेरे सेवारू सारू कम, ते यहोवारे भवनेरे सेवारू सारू सामान, 14 मतलब दाऊदे सुलैमाने हदायत दित्ती कि हर किसमेरी सेवारे लेई सोन्नेरां भांडां केरे लेई सोन्नू तुलतां, ते हर किसमेरे सेवारे लेई चैंदरां भांडां केरे लेई चाँदी तुलतां, 15 ते सोन्नेरे दीवटां केरे लेई, ते तैन केरे हर एक्‍की दीयेरे लेई अक-अक धूपदान, ते तैसेरे दीयां केरू सोन्नू तुलतां ते चैंदरे दीयां केरे लेई अक-अक धूपदान, ते तैसेरे दीयां केरि चाँदी, हर एक्‍की दीवटेरे सब कम्मां केरे मुताबिक तुलतां, 16 ते च़ैढ़ोरी रोट्टी केरे मेज़ां केरे लेई हर एक्‍की मेज़ेरे ते तैसेरू सोन्नू तुलतां, ते चैंदरे मेज़ां केरे लेई चाँदी, 17 ते शुद्ध सोन्नेरे कंटे, कुटोरे ते प्यालां ते सोन्नेरी कटोरी केरे लेई एक्‍की-एक्‍की कटोरारू सोन्नू तुलतां, ते चैंदरी कटोरी केरे लेई हर एक्‍की कुटोरेरी चाँदी तुलतां, 18 ते धूपेरी वेदरे लेई तेवरू सोन्नू तुलतां, ते रथ मतलब यहोवारे करारेरो सन्दूख ढकने बाले ते फंघां फैलवरे करूबां केरे नमूनेरे लेई सोन्नू दित्तू। 19 दाऊदे तैखन सुलैमाने सेइं ज़ोवं, "मीं यहोवारी योजना सेइं ज़ै मीं मैल्ही, इन सब किछ सेमझ़तां लिखेरूए।"

20 फिरी दाऊदे अपने मट्ठे सुलैमाने सेइं ज़ोवं, "हिम्मत रख ते मज़बूत भोइतां इस कम्मे मां लगोरो रा। डर न, ते तू हिम्मत न हार किजोकि यहोवा परमेशर ज़ै मेरो परमेशरे, तै तीं सेइं साथीए। ते ज़ांतगर यहोवारे घरे मां ज़ेत्रू कम केरनू भोल्हु तैन पूरू न भोए, तांतगर तै तीं न धोखो देलो ते न तीं शारेलो। 21 ते हेर परमेशरेरे भवनेरे सारे कम्मेरे लेई याजक ते लेवी केरि टोली च़ुनी, ते हर किसमेरे सेवारे लेई हर किसमेरू कम खुशी सेइं केरनेबाले माहिर कारीगिर भी तेरू साथ देले। ते हाकिम ते सारे लोक भी ज़ैन किछ तू ज़ोलो तैन्ने केरेले।"