1 दाऊद राज़े सारे सभारे लोकां केरे पासे फिरो ते तैन सेइं ज़ोवं, "मेरू मट्ठू सुलैमान हेजू मट्ठू आहे ते तैस हेजू अनुभव नईं, ते सिर्फ तैए परमेशरे च़ुनोरोए। कम त बड़ू बड्डू आहे, किजोकि ई भवन मैन्हु केरे लेई नईं, पन यहोवा परमेशरेरे लेई बनेलो। 2 अवं त अपने पूरे ज़ोरे सेइं, अपने परमेशरेरे भवनेरे लेई सोन्नेरी चीज़ां केरे लेई सोन्नू, चैंदरी चीज़ां केरे लेई चाँदी, पितलरी चीज़ां केरे लेई पितल, लोंहेरी चीज़ां केरे लेई लोंह, ते लेकड़री चीज़ां केरे लेई लकड़ी, ते सुलैमानी घोड़, ते मढ़नेरे लेई मणि, ते पच्‍चीकारी केरनेरे लेई अलग-अलग रंगां केरे नग, ते सेभी किसमेरी मणि ते बड़े संगमरमर अकोट्ठो कियो। 3 मेरो मन अपने परमेशरेरे भवने मां लगोरोए, एल्हेरेलेइ ज़ैन किछ मीं पवित्र भवनेरे लेई अकोट्ठू कियोरूए, तैन सेभन करां जादे अवं अपनु धन भी ज़ैना सोन्नेरे चैंदरे रुपेइये मीं कां आन, अपने परमेशरेरे भवनेरे लेई देताईं। 4 मतलब अक लख किल्‍लो ओपीरेरू सोन्नू, ढाई लख तपेवरी चाँदी, ज़ै भवनेरी दिवारन सेइं लाई गाए। 5 ते सोन्नेरी चीज़ां केरे लेई सोन्नू, ते चैंदरी चीज़ां केरे लेई चाँदी, ते कारीगिरन करां बनानेबाले हर किसमेरे कम्मेरे लेई अवं तैस देताईं। ते कौन अपनि इच्छाई सेइं यहोवारे लेई दान देते?"

6 तैखन पूर्वजां केरे घरानेरे प्रधानेईं ते इस्राएलेरे गोट्लां केरे हाकिमेईं ते हज़ार ते शौवां केरे सेनापतिएईं ते राज़ेरे कम्मेरे अधिकैरेईं अपने-अपने इच्छाई सेइं, 7 परमेशरेरे भवनेरे कम केरनेरे लेई पौने दूई लख किल्‍लो सोन्नू ते दश हज़ार सोन्नेरे सिक्‍के, सड़े ट्लाई लख चाँदी, शा लख किल्‍लो पितल, ते पेनती लख किल्‍लो लोंह दित्तू। 8 ते ज़ैन कां मणि थिये, तैनेईं तैना यहोवारे भवनेरे खज़ानेरे लेई गेर्शोन कुलेरे यहीएल लेवेरे हथ्थे मां दित्ते। 9 तैखन लोक खुश भोए, किजोकि हाकिमेईं खुशी भोइतां सच़्च़े मने सेइं ते एपनी-एपनी इच्छाई सेइं यहोवारे लेई भेंट दित्तोरी थी। ते दाऊद राज़ो बड़ो खुश भोव।

10 तैखन दाऊद राज़े सारे लोकां केरे सामने यहोवारी तारीफ़ की, ते दाऊदे ज़ोवं, "हे यहोवा! हे इश्शे पूर्वज इस्राएलेरे परमेशर! अनादिकाले करां हमेशा तगर तूए धन आस। 11 हे यहोवा! महिमा, पराक्रम, शोभा, सामर्थ ते वैभव तेरूए। किजोकि अम्बरे ते धेरती पुड़ ज़ैन किछ आहे, तैन तेरूए। हे यहोवा! राज़ तेरूए, ते तू सेभन पुड़ प्रधान ते महान आस।✝ 12 दौलत ते आदर तेरी तरफां मैलचे, ते तू सेभन पुड़ हुकूमत केरतस। ते तेरे हथ्थे मां कुदरत ते पराक्रम आहे, ते सब लोक बधाने ते शक्ति देनी तेरे हथ्थे मां आहे। 13 एल्हेरेलेइ हुनी हे इश्शे परमेशर! अस तेरू शुक्र ते तेरे महान नंव्वेरी तारीफ़ केरतम।

14 "पन अवं कुन आईं ते मेरे लोक कुन आन? कि असन इस तरीके एपनी इच्छाई सेइं तीं कां भेंट देनेरी शक्ति मैल्हे? तीं करां त सब किछ मैलते, ते असेईं तेरे हथ्थेरां मैलतां तीं दित्तोरूए। 15 तेरी नज़री मां अस त अपने सारे पूर्वजां केरे ज़ेरे बखले ते परदेशी अहम। धेरती पुड़ इश्शे दिहाड़े छावरे ज़ेरे बीती गातन, ते इश्शो कोई ठिकानो नईं।✝ 16 हे इश्शे परमेशर यहोवा! इन सब ज़ैन असेईं अकोट्ठो कियोरोए तेरे लेई अक भवन बनानेरे कियोरूए, तै तेरे तरफां असन मैल्होरो थियो, ते एन सब तेरूए। 17 ते हे मेरे परमेशर! अवं ज़ानताईं कि तू मने परखतस ते सच़्च़ैई सेइं खुश रहतस। मीं त एन सब किछ मनेरी इच्छाई सेइं दित्तोरूए। ते इन लेइतां अवं खुश भोवं, कि तेरे लोक ज़ैना इड़ी हाज़र आन, तैना एपनी इच्छाई सेइं तेरे लेई भेंट देतन। 18 हे यहोवा! हे इश्शे पूर्वज अब्राहम, इसहाक ते इस्राएलेरे परमेशर! अपने लोकां केरे मनेरे खियालन मां ऐह गल बनेइतां रेखां ते तैन केरे मन अपने पासे लगोरे रख। 19 ते मेरे मट्ठे सुलैमानेरो मन एरहो सच़्च़ो केरां कि तै तेरे हुक्म, हदायतां ते विधन मनतो राए ते इन सब केरतो राए, ते तैस भवने बनाए, ज़ेसेरी तियारी मीं कियोरीए।"

20 तैखन दाऊदे सैरी सभाई सेइं ज़ोवं, "तुस अपने परमेशर यहोवारू शुक्र केरा।" तैखन सभारे सेभी लोकेईं अपने पूर्वजां केरे परमेशर यहोवारू शुक्र कियूं, ते अपने-अपने क्रोड़ी झुकेइतां यहोवा ते दाऊद राज़े कां झुके।

21 होरसां तैनेईं यहोवारे लेई बलिदान कियूं, मतलब पीनेरी च़ढ़तलन सने 1000 दांत, 1000 हुड़ ते 1000 गबड़ां होमबलि केरतां च़ाढ़ां, ते सारे इस्राएलेरे लेई बेड़ी होमबेलि च़ैढ़ी। 22 तैस्से दिहाड़े यहोवारे सामने तैनेईं बड़े आनन्दे सेइं खावं पीवं।

फिरी तैनेईं दाऊदेरू मट्ठू सुलैमान दूइयोवं बार राज़ो बनेइतां यहोवारी तरफां प्रधान भोनेरे लेई तैसेरू ते याजक भोनेरे लेई सादोकेरू अभिषेक कियूं। 23 तैखन सुलैमान अपने बाजी दाऊदेरी जगाई पुड़ राज़ो बेनतां यहोवारे लोकन पुड़ राज़ केरने लगो ते कामयाब भोव, ते सारे इस्राएली तैसेरो हुक्म मन्ते थिये। 24 ते सब हाकिमेईं ते शूरबीरेईं ते इड़ी तगर कि दाऊद राज़ेरे सारे मट्ठेईं सुलैमान राज़ेरे अधीन भोनेरे लेई इकरार कियो। 25 ते यहोवा सुलैमाने सारे इस्राएली केरे हेरते बड़ो कामयाब कियो, ते तैस ऐरी शान-ओ-शोकत दित्ती, ज़ै तैस करां पेइले इस्राएलेरे कोन्ची राज़े न थी मैल्होरीए।

26 एन्च़रां सेइं यिशैरे मट्ठे दाऊद राज़े सारे इस्राएले पुड़ राज़ कियूं। 27 ते तैनी 40 साल इस्राएले पुड़ राज़ कियूं। तैनी 7 साल हेब्रोन नगरे मां ते 33 साल यरूशलेम नगरे मां राज़ कियूं। 28 ते तै पूरे बुढापेरी हालती मां लेम्मी उमरारो भोइतां ते दौलतमन्द भोइतां ते वैभव, ते रेज़्ज़तां मेरि जेव। ते तैसेरू मट्ठू सुलैमान तैसेरे जगाई पुड़ राज़ो बनू। 29 शुरू करां आखरी तगर दाऊद राज़ेरे सारे कम्मां केरे बारे मां, 30 ते तैसेरी सारी हुकूमत ते शक्ति, तैस पुड़ ते इस्राएले पुड़, बल्के मुल्खे-मुल्खेरे सारे राज़न पुड़ ज़ैन किछ बीतू, तैसेरे भी बारे मां शमूएल नबी ते नातान नबी ते गाद नेबेरे किताबन मां सब लिखेरूए।