1 तैने मीं सेइं इन भी ज़ोवं, "सरदीस नगरेरे कलीसियारे स्वर्गदूते जो ई सन्देश लिख कि, ‘ज़ैस कां परमेशरेरी सत आत्मान ते सत तारेन, तै इन ज़ोते कि अवं तेरे कम्मन ज़ानताईं, कि तींझो ज़ींतो ज़ोतन, पन तू आस मर्रो। 2 एल्हेरेलेइ बींझ़ो रा, ते तैन चीज़न ज़ैना रेवरिन, ते ज़ैना मिटने बैलिन, तैन मज़बूत केर; किजोकि मीं तू केन्ची चीज़ी मां अपने परमेशरे कां पूरो न लव। 3 याद केर, कि तीं केरि शिक्षा मैल्होरी थी तीं ते शुनोरी थी, ते तैस मनतो रा ते कने मन फिरा, ते अगर तू बींझ़ो न रालो, त अवं चोरेरो ज़ेरो एज्जेलो ते तू कधे न ज़ांनेलो, कि अवं कोस घेड़ी तीं पुड़ एज्जेलो। 4 पन सरदीस नगरे मां तुसन मां किछ लोक एरे आन, ज़ैनेईं अपनो आप पापे सेइं अशुद्ध नईं कियोरो, तैना छ़ित्तां लिगड़ां लेइतां मीं सेइं साथी च़लेले किजोकि तैना इस काबलन। 5 ज़ैना ज़ींत हासिल केरेले तैन इस्से तरीके सेइं तैन केरां ज़ेरां छ़ित्तां लिगड़ां लुवां गालां। अवं तैन केरू नवं तैस किताबी मरां हटेइलो ज़ैस मां परमेशरे तैन केरां नंव्वां लिखोरन ज़ैना हमेशारी ज़िन्दगी हासिल केरेले। अवं तैन केरू नवं अपने बाजी ते अपने स्वर्गदूतां केरे सामने एलान केरेलो। 6 ज़ै समझ़नू चाते तै ध्याने सेइं शुने कि परमेशरेरो आत्मा कलीसियान सेइं कुन ज़ोते।’"

7 तैने मीं सेइं इन भी ज़ोवं, "फिलदिलफिया नगरेरे कलीसियारे स्वर्गदूते जो इन लिख, ‘अवं तै आईं ज़ै पवित्र ते सच़्च़े, ते ज़ैस कां दाऊदेरी चाबीए, ज़ेसेरे खोल्‍लेरे कोई बंद न केरि सके ते ज़ेसेरे बंद कियोरे कोई खोल्‍ली न सके, तै इन ज़ोंते: 8 अवं तेरे कम्मन ज़ानताईं, हेर, मीं तेरे सामने अक बत खोलोरीए, ज़ैस कोई बंद न केरि सके कि तेरी शक्ति थोड़ीए, ते तीं मेरू वचन मन्नोरूए, ते मेरे नंव्वेरो इन्कार नईं कियोरो। 9 हेर, ज़ैन लोकां केरो रिश्तो शैतानेरी टोली सेइं आहे, तैना ज़ोतन कि तैना यहूदी आन, पन आन नईं, बल्के झूठ ज़ोतन हेर, अवं एरू केरेलो, तैना तीं कां एइतां झुकेले, ते इन ज़ानेले, कि अवं तीं सेइं प्यार केरताईं। 10 ज़ैखन तू दुख झ़ैल्‍लतो थियो तीं सबरी सेइं मेरो सन्देश मन्नो। एल्हेरेलेइ अवं भी तीं बड़े अज़मैइशरे वक्ते बच़ेइलो, ज़ै धेरतली पुड़ रानेबालन पुड़ परखनेरे लेई सारे दुनियाई पुड़ एजने बालीए। 11 अवं जल्दी एजने बालोई; ज़ैन किछ तीं कांए, तैस ठेमतां रख, कि कोई तेरू ताज न थसोड़े। 12 ज़ै ज़ींत हासिल केरे, तै ज़ेन्च़रे अक खम्भो घरे मज़बूत रखते, तेन्च़रे तै भी परमेशरेरे मन्दरे मां हमेशा रालो; ते अवं अपने परमेशरेरू नवं, ते अपने परमेशरेरे नगर, मतलब नंव्वे यरूशलेमेरू नवं, ज़ैन नगर सुर्गे पुड़ां एजने बालूए ते अपनु नंव्वू नवं तैस पुड़ लिखेलो। 13 ज़ै समझ़नू चाते तै ध्याने सेइं शुने कि परमेशरेरो आत्मा कलीसियान सेइं कुन ज़ोते।’"

14 तैने मीं सेइं इन भी ज़ोवं, "लौदीकिया नगरेरे कलीसियारे स्वर्गदूते जो ई सन्देश लिख कि, ‘ज़ै आमीन, वफादारे, ते सच़्च़ो गवाहे, ते परमेशरेरी स्रष्टिरी वजाए, तै इन ज़ोते। 15 कि अवं तेरे कम्मन ज़ानताईं, कि तू तैस पैनेरो ज़ेरोस ज़ैन न ठंढू ते न गर्मे, रोड़ू भोथू कि तू ठंडो भोथो या फिरी गर्म, यानी तू मीं पूरो विश्वास केरेथो या बिलकुल न केरेथो। 16 एल्हेरेलेइ तू निघोस, ते न ठंडोस ते न त्तओस, पन तू अध्धे मने सेइं मीं पुड़ विश्वास केरतस, एल्हेरेलेइ अवं तीं रद केरनेबालो आईं। 17 तू ज़ैन ज़ोतस, कि अवं धनी, ते धनी भोवरोईं, ते मीं केन्ची चीज़री घटी नईं, ते इन न ज़ानस, कि तू बदकिसमत ते तुच्छ ते कंगाल ते कानो, ते नगोस। 18 एल्हेरेलेइ अवं तीं सलाह देताईं, कि अग्गी मां तवरू सोन्नू मीं करां ने, कि धनी भोस; ते छ़ित्तां लिगड़ां ने, कि तीं अपने नग्गे पनेरी शर्म न भोए; ते अपने एछ़्छ़ी केरे लानेरे लेई कजल ने, कि तू लहस। 19 अवं ज़ैन-ज़ैन सेइं प्यार केरताईं, तैन शिखालताईं ते सज़ाह देताईं ताके तैना रोड़े बनन। एल्हेरेलेइ भलियाई केरने मां लग्गोरो रा, ते पापन करां मन फिरा। 20 हेर, तेरे दिले मां एजनेरे लेई अवं ज़ेन्च़रे कोई घरेरू दार गुड़काते अवं तेन्च़रे आईं; अगर तू मेरी आवाज़ शुन्तां अपनो दिल खोल्‍लस, त अवं अन्तर एज्जेलो ते अस एप्पू मांमेइं संगती केरमेले। 21 ज़ै ज़ींते, अवं तैस एप्पू सेइं साथी अपने तखते पुड़ बिशैलेलो, ज़ेन्च़रे अवं भी ज़ींत हासिल केरतां अपने बाजी केरे तखते पुड़ बिश्शोरोईं। 22 ज़ै समझ़नू चाते तै ध्याने सेइं शुने कि परमेशरेरो आत्मा कलीसियान सेइं कुन ज़ोते।’"