1 हनन्याह नव्वेंरो अक मैन्हु थियो, ते तैसेरी कुआन्शरू नवं सफीरा थियूं ते तैनेईं अपनि जेईदातरो किछ हिस्सो बेच़ी छ़डो। 2 ते कीमती मरां किछ पेइंसे एप्पू कां रख्खे, ज़ेसेरो तैसेरी कुआन्शी भी पतो थियो, ते बाकी होरे पेइंसे एन्हतां प्रेरितन दित्ते। 3 पन पतरसे तैस सेइं ज़ोवं, "हे हनन्याह! शैताने तेरे मने मां ऐह गल केन्च़रे छ़डी, कि तू पवित्र आत्माई सेइं झूठ ज़ोस, ते ज़मीनरे पेंइसन मरां किछ रेखी छ़डस? 4 कुन बेच़ने करां पेइले ज़मीन तेरी न थी, पन बेच़नेरां बाद कुन पेइंसो तेरो न भोव? तीं अपने मने मां किजो सोचू? तीं मैन्हु सेइं नईं बल्के परमेशरे सेइं झूठ ज़ोवरूए।" 5 हनन्याह एन शुनते खिरकी जेव, ते तैसेरे प्राण निस्से, ते ज़ैन लोकेईं एन शुनू त तैना बड़े डेरि जे। 6 तैखन किछ नौजुवान आए ते तैनेईं तैसेरी लाश कफने मां पलेटतां ते बेइरोवं नेइतां देबतां छ़डी। 7 ट्लेइ घैन्टना पत्ती तैसेरी कुआन्श आई, ते तैस एस बारे मां कोई पतो न थियो। 8 पतरसे तैस पुछ़ू, "मीं ज़ो, कुन तुसेईं दूइयेईं ज़मीन एत्रे मां बेच़ोरी थी?" तैसां ज़ोवं, "हाँ कुल कीमत एत्री मैल्होरी थी।" 9 पतरसे तैस सेइं ज़ोवं, "प्रभुएरी आत्मा अज़मानेरे लेई तुस केन्च़रे सेइं राज़ी भोए, ते ज़ैन लोकेईं तेरो मुन्श दबोरोए, तैन केरे पव हेर दारे पुड़ आन, ते तैना तीं भी बेइरोवं घिन्नी गाले।" 10 तै कुआन्श तैखने तल्‍ले बिछ़ड़ी, ते तैसारे भी प्राण निस्से, ते ज़ैखन नौजुवान अन्तर आए त तै कुआन्श मर्री लेहितां तै भी छ़ुइतां तैसारे मुन्शे ड्लखोरां देबतां छ़डी। 11 सैरी यरूशलेमेरी कलीसिया ते एन गल्‍लां केरे शुन्ने बाले बड़े डेरि जे।

12 प्रेरितां केरे ज़िरिये बड़े चमत्कार ते निशान बांदे भोए, ते सारे विश्वासी अक भोइतां सुलैमानेरे अंगने मां जम्हां भोते थिये। 13 हालांकी होरे लोक तैन केरि बड़ी इज़्ज़त केरते थिये, पन केन्ची हिम्मत न आई कि तैन मां शामल भोन। 14 बड़े मड़देइं ते कुआन्शेईं विश्वास कियो ते तैन लोकां केरि मेण्डली मां शामल भोए, ते परमेशर मन्नेबालां केरि तैधात बद्धती च़ली। 15 ज़ैन प्रेरितेईं कियूं तैसेरो नितीजो ई भोव, कि लोक बिमारन खट्टन पुड़ ते पिठी पुड़ छ़ुइतां सड़की मां रखते थिये, कि पतरस ज़ैखन तैस बत्तां एज्जे त तैसेरी छाव त तैन पुड़ पे। 16 यरूशलेम नगरेरे च़ेवरे पासना ड्लाव्वां केरे बड़े लोक बिमारन ते ज़ैन पुड़ भूतां केरो सैयो थियो, एप्पू सेइं साथी आनते थिये, ते तैना सब बेज़्झ़ोते थिये।

17 तैखन महायाजक ते तैसेरे साथी ज़ैना सदूकी केरे फिरके मरां थिये, तैन बड़ी जलन भोने लगी ते तैना प्रेरितां केरे खलाफ खड़े भोए। 18 ते तैनेईं प्रेरित ट्लुवेइतां कैदे मां छ़ेड्डी दित्ते। 19 पन प्रभुएरो राती स्वर्गदूत कैदखाने मां दार खोलतां प्रेरितन कां जेव, ते तैना बेइर केढतां तैन सेइं ज़ोने लगो, 20 "गाथ ते मन्दरेरे अंगने मां खड़े भोइतां हमेशारे ज़िन्दगरे बारे मां लोकन बिस्तार देथ।" 21 तैना एन शुन्तां झ़ेझ़ां मन्दरेरे अंगने मां पुज़्ज़े ते ज़ेन्च़रे तैन स्वर्गदूते हुक्म दित्तोरो थियो, तेन्च़रे लोकन शिक्षा देने लगे, ते ज़ैखन इस्राएली महायाजक ते तैसेरे साथी तैड़ी आए, त तैनेईं महासभा ते सब यहूदी केरे सारे बुज़ुर्ग कुजाए, ते तैनेईं यीशुएरे प्रेरित कैदखाने मरां कुजाए। 22 ज़ैखन मन्दरेरे पहरदार कैदखाने मां पुज़्ज़े त तैन प्रेरित तैड़ी न मैल्हे, ते वापस एइतां तैन खबर दित्ती, 23 "असेईं कैदखानो रोड़ेच़ारे बंद कियोरी थियो, ते पेरहेदार भी असन दारे मां खड़खड़े मैल्हे, पन ज़ैखन असेईं कैदखानो खोल्‍लो त अन्तर कोई न मैल्हो।" 24 एना गल्‍लां शुन्तां मन्दरेरे पहरेदारां केरो प्रधान, प्रधान याजक ते सारे लोक हैरान रेइजे, ते तैन केरि फिक्री मां पे कि हुनी कुन भोनूए! 25 तैखन केन्चे एइतां ज़ोवं, "तैना मैन्हु ज़ैना तुसेईं कैदे मां छ़डोरे थिये, तैना मन्दरे मां खड़े भोइतां शिक्षा देने लगोरेन।" 26 तैखन मन्दरेरे पहरेदारां केरे प्रधान अपने सिपाही साथी घिन्तां जे, ते प्रेरित कुजेइतां आने पन ज़बरदस्ती नईं, किजोकि तैना लोकन करां डरते थिये, कि एरू न भोए एना असन घोड़ेईं बान।

27 तैनेईं प्रेरित एन्हतां महासभा मां पेश किये, ते महायाजके तैन पुछ़ू, 28 "असेईं तुसन ठाकेरू थियूं, कि यीशुएरू नवं घिन्तां शिक्षा न देइयथ? फिरी भी हेरा, तुसेईं सारे यरूशलेम नगरे मां अपनि शिक्षा फैलाई, ते तैस मैन्हेरो खूनेरो दोष असन पुड़ लानो चातथ।" 29 पतरस ते होरि प्रेरितेईं जुवाब दित्तो, "असन मैन्हु केरो हुक्म मन्नेरे बजाहे परमेशरेरो हुक्म मन्नो जादे ज़रूरीए। 30 इश्शे दादे-पड़दादां केरे परमेशरे ऐह यीशु मुड़दन मरां ज़ींतो कियो, ज़ै तुसेईं क्रूसे पुड़ च़ेढ़तां मारो। 31 तैए परमेशरे, प्रभु ते मुक्ति देनेबालो बनेइतां अपने देइने पासे बिशालो, ताके तै इस्राएलिन मन फिराने ते पापां केरि मैफरो मौको दे। 32 असां एन गल्‍लां केरे गवाह आम, ते पवित्र आत्मा भी, ज़ै परमेशरे अपनो हुक्म मन्ने बालन दित्तोरीए।"

33 ज़ैखन तैनेईं एन शुनू त फुकोई जे, ते तैन केरि मर्ज़ी लगी ज़ोने कि एन मैरी छ़डम। 34 पन अक फरीसी मैन्हु ज़ेसेरू नवं गमलीएल थियूं, ते ज़ै शास्त्री भी थियो, ते ज़ै सेब्भी लोकन मां इज़्ज़तदार थियो, तैनी महासभा मां खड़े भोइतां हुक्म दित्तो कि एना मैन्हु थोड़े च़िरे बेइर भेज़ा। 35 तै एन ज़ोने लगो, "हे इस्राएली लोकव तुस ज़ैन किछ एन मैन्हन सेइं केरनू चातथ तैन रोड़ेच़ारे सोचा। 36 किजोकि थोड़े च़िरे पेइले थियूदास इन ज़ोइतां खड़ो भोवरो थियो, ते ज़ोतो थियो, अवं भी किछ आई, ते लगभग 400 मैन्हु तैस सेइं मिले, पन तै मारो जेव, ते तैसेरे मन्नेबाले सारे तितर-बितर भोइ जे, ते तैन केरो नामो निशान मिटी जेव। 37 तैसेरां पत्ती मैन्हु केरे गिनतरे वक्ते गलील इलाकेरो यहूदा निस्सोरो थियो, ते तैनी काई लोक अपने पासे खिचोरे थिये, तै भी मारो जेव, ते तैसेरे ज़ेत्रे साथी थिये, सब तितर-बितर भोइ जे। 38 हुनी अवं तुसन एन्ने ज़ोताईं कि एन मैन्हन करां दूर भोथ, ते एन गाने देथ, किजोकि अगर एना चमत्कार, मैन्हु केरि तरफां भोल्हे त एप्पू खतम भोइ गानेन। 39 पन अगर एना कम्मां परमेशरेरी तरफां भोल्हां, त तुस एन मैन्हु केरू किछ न बिगैड़ी सकत, ते तुस परमेशरेरे खलाफ लड़नेबाले भोल्हे, तैनेईं तैसेरी सलाह मन्नी।"

40 ते प्रेरित अन्तर कुजेइतां तैन डंडेइं बावैहीतां तैन ज़ोवं, कि अज़्ज़ेरां बाद यीशुएरे नंव्वे सेइं कोई गल न केरथ, ते तैना हथरां छ़डे। 41 प्रेरित महासभा मरां च़ले जे, तैना एस गल्‍ली पुड़ खुशी थिये, कि असां यीशुएरे नंव्वे सेइं बेइज़्ज़त भोनेरे काबल त भोए। 42 तैनेईं शिक्षा देनी बंद न की, बल्के रोज़ मन्दरे मां गेइतां ते घर-घर गेइतां लगातार खुशखबरी शुनाते राए कि यीशु ही मसीह आहे।