1 अब्रामेरि कौन्श सारैरी कोई औलाद न थी भोवरी: ते तैसेरी अक मिस्र मुल्खेरी नौकरानी थी ज़ैसारू नवं हाजिरा थियूं। 2 एक्सां सारै अब्रामे सेइं ज़ोवं, "हेर, यहोवा परमेशरे अवं बेऔलाद रखोरोइं, एल्हेरेलेइ अवं तीं कां बिनती केरती कि तू मेरी नौकरैनी कां गा; भोइ सकते कि मेरू घर तैसेरे ज़िरिये बेस्सी गाए।" सारैरी ई गल अब्रामे मन्नी। 3 ज़ैखन अब्रामे कनान मुल्खे मां रहते 10 साल बीती जे तैखन तैसेरी कौन्श सारै अपनि मिस्री नौकरानी हाजिरा नेइतां अपने मुन्श अब्रामे दित्ती, कि तै तैसेरी कौन्श बने। 4 अब्राम हाजिरा कां जेव, ते तै दोज़ींती भोइ; ज़ैखन तैस पतो लगो कि तै दोज़ींतीए, तैखन तै अपनि मालकिनी अपने नज़री मां घटिया समझ़ने लग्गी। 5 तैखन सारै अब्रामे सेइं ज़ोवं, "ज़ै मीं पुड़ ज़ुलम भोव तै तेरे दोग्गे पुड़ पे। मीं त अपनि नौकरानी तेरी कौन्श बनाई; पन ज़ैखन तैस पतो लग्गो कि तै दोज़ींतीए, तैखन तै मीं घटिया समझ़ने लग्गी, एल्हेरेलेइ यहोवा मेरे ते तेरे दरमियान न्याय केरे।" 6 अब्रामे सारै सेइं ज़ोवं, "हेर तेरी नौकरानी तेरे हथ्थे मांए; ज़ेरू तीं ठीक लग्गे तेरहु तैस सेइं केर।" तैखन सारै तैस सेइं सेखती सेइं बर्ताव केरने लग्गी ते तै तैसेरे सामनेरां नेश्शी जेई।

7 तैखन यहोवा परमेशरेरे दूते तै जंगले मां शूरेरे बत्ती मां पैनेरे एक्‍की नागे कां मैल्ही ते तैने ज़ोवं, 8 "हे सारैरी नौकरानी हाजिरा, तू कोट्ठां अई ते कोरहां च़लोरिस?" तैसां ज़ोवं, "अवं अपनि मालकिन सारैरे सामनेरां नश्शोरीं।" 9 यहोवा परमेशरेरे दूते तैस सेइं ज़ोवं, "अपनि मालकिनी कां वापस गा ते तैसेरे अधीन रा।" 10 ते यहोवा परमेशरेरे दूते तैस सेइं ज़ोवं, "अवं तेरे खानदाने बड़ो बधेइलो, इड़ी तगर कि बड़े जादे भोनेरे वजाई सेइं तैसेरी गिनती न भोइ सकेली।" 11 ते यहोवा परमेशरेरे दूते तैस सेइं ज़ोवं, "हेर तू दोज़ींती आस, ते तू मट्ठू ज़ाली; ते तैसेरू नवं इश्माएल*16:11 इश्माएल मतलब परमेशर शुनते रेखां; किजोकि यहोवा तेरे दुखेरो हाल शुनोरोए। 12 ते तै मैन्हु जंगली गधेरो ज़ेरो भोल्हो, तैसेरो हथ सेब्भी केरे खलाफ उठेलो, ते सेब्भी केरे हथ तैसेरे खलाफ खड़े भोल्हे; ते तै अपने सेब्भी भियालां केरे खलाफ रालो*16:12 खलाफ रालो मतलब तै अपने ढ्लां केरे पूर्वेरे पासे बस्सेलो।।" 13 तैखन तैसां यहोवारू नवं अत्ताएलरोई*16:13 अत्ताएलरोई तू तै परमेशरस ज़ै मीं लातस। रख्खू ज़ैनी तैस सेइं गल्‍लां कियोरी थी, ते ज़ोवं, "कुन तै मीं इड़ी भी गातो लाव ते लहनेरां पत्ती भी ज़ींती राई?" 14 इस वजाई सेइं तैस खुहेरू नवं बएर-लहैरोई खुह*16:14 बएर-लहैरोई खुह मतलब ज़ींते परमेशरेरू खुह ज़ै मीं हेरते। पेवं; तै त कादेश ते बेरेदेरे दरमियाने मांए।

15 हाजिरारू अब्रामे अक मट्ठू भोवं; ते अब्रामे अपने मट्ठेरू नवं, ज़ैस हाजिरा ज़र्म दित्तोरू थियूं, इश्माएल रख्खू। 16 ज़ैखन हाजिरा अब्रामेरे ज़िरिये इश्माएले ज़र्म दित्तू तैस वक्ते अब्राम 86 सालां केरो थियो।