1 एक्सां अब्राहम मम्रे नंव्वेरी ठैरी बंज़ेरे बुट्टन मां बड़े धुपरे वक्ते तेम्बेरे दारे पुड़ बिशोरो थियो, तैखन यहोवा परमेशरे तैस दर्शन दित्तू: 2 तैनी हेरू, कि ट्लाई मड़द तैसेरे सामने खड़ेन। ज़ैखन तैने तैना लाहे तैखन तै तैन सेइं मुलाकात केरनेरे लेई तेम्बेरे दारे मरां दौड़ो, ते तल्‍ले झुकतां मथ्थो टेको ते ज़ोने लगो, 3 "हे प्रभु, अगर मीं पुड़ तेरे अनुग्रहेरी नज़रे त अवं बिनती केरताईं, कि अपने दासे करां च़ले न गेइयथ। 4 अवं थोड़ू ज़ेरू पानी आनताईं ते तुस अपने पव धोइतां इस बुट्टे हैठ थाकी छ़डा। 5 फिरी अवं तुश्शे लेई खाने जो किछ आनताईं, ताके तुश्शी ढ्लुख मिटी गाए; तैखन तैसेरे बाद अग्रोवं गाथ किजोकि तुस अपने दासेरे कां एल्हेरेलेइ एवरेथ।" तैनेईं ज़ोवं, "ज़ेरू तू ज़ोतस त तेरहु केर।" 6 तैखन अब्राहम लूशी तेम्बु मां सारा कां जेव ते ज़ोवं, "ट्लाई सआ* मैदो लूशी सन, ते रोट्टी बना।" 7 फिरी अब्राहम गोरन कां दौड़तो जेव, ते अक रोड़ू ते निगर बछ़ड़ू नेइतां अपने नौकरे दित्तू, ते तैने जल्दी बनावं। 8 तैखन तैने ज़म्मेरू दुद्ध, ते दुद्ध, ते बछ़ड़ेरू मास, ज़ैन तैने बनावारू थियूं, नेइतां तैन कां बन्टू; ते एप्पु बुट्टे हैठ तैन कां ड्लखोरां खड़ो राव, ते तैना खाने लगे।

9 तैनेईं तैस पुछ़ू, "तेरी कौन्श सारा कोड़िए?" तैने ज़ोवं, "तै त तेम्बु मांए।" 10 तैन मरां एक्‍के ज़ोवं, "नेलाह अवं, पक्‍को तीं कां फिरी एज्जेलो; ते तेरी कौन्शी सारारू अक मट्ठू भोल्हु।" सारा डेरेरे दारे पुड़ ज़ैन अब्राहमे पुतोरां थियूं शुनी राहोरी थी। 11 अब्राहम ते सारा दूईये बड़ां बुढां थियां; ते सारा मासिक धर्म बन्द भोइ जेवरो थियो। 12 एल्हेरेलेइ सारा मने मां हेसतां ज़ोने लगी, "अवं त बुढी आईं, ते मेरो मालिक भी बुढोए, त कुन मीं इस गल्‍लरू सुख भोल्हु?" 13 तैखन यहोवा अब्राहमे पुछ़ू, "सारा इन ज़ोइतां किजो हस्सी, कि कुन अवं, ज़ै एत्री बुढी भोवरीं, मीं सच़्च़े अक मट्ठू भोल्हु? 14 कुन यहोवारे लेई कोई कम मुश्किले? एग्री साल तैस्से बराबर मौके, मतलब नेलाह, अवं तीं कां फिरी एज्जेलो, ते सारा मट्ठू भोल्हु।" 15 तैखन सारा डरके मारे इन ज़ोइतां इन्कार कियो, "अवं नईं हस्सोरी।" तैने ज़ोवं, "नईं; तू हस्सोरी त थी।"

16 फिरी तैन मड़देइं तैट्ठां अग्रोवं गेइतां, सदोमेरे पासे नज़र की; ते अब्राहम तैन भेज़नेरे लेई तैन साथी-साथी च़लो। 17 तैखन यहोवा परमेशरे अपने आपे सेइं ज़ोवं, "इन ज़ैन अवं केरताईं तैस कुन अब्राहमे करां छ़ुपेइतां रेखी? 18 अब्राहमे मरां त पक्‍की अवं अक बड़ी ते ताकतबर कौम बनेइलो, ते धेरतरे सैरी कौमन तैसेरे ज़िरिये बरकत मैल्हेली। 19 किजोकि मीं तै एल्हेरेलेइ च़ुनोरोए, कि तै अपने मट्ठन ते टब्बरे ज़ैना तैसेरां पत्ती रेइ गाले, हुक्म देलो कि तैना यहोवा परमेशरेरी बत्ती पुड़ अटल बनोरे रान, ते धार्मिकता ते न्याय केरते रान, ताके ज़ैन किछ मीं अब्राहमेरे बारे मां ज़ोवरूए तैस पूरू केरे।" 20 फिरी यहोवा ज़ोवं, "सदोम ते गमोरारे खलाफ चिन्डां केरि शौर बेद्धी जेई, ते तैन केरो पाप बड़ो भारी भोइ जेवरोए; 21 एल्हेरेलेइ अवं ओस्तां हेरेलो, कि तैन केरि ज़ेरी चिन्डां केरि शौर मेरे कन्ने तगर पुज़ोरीए, तैनेईं ठीक तेन्च़रे कम कियोरू या नईं; ते न कियोरू भोए त मीं पतो लग्गेलो।"

22 तैखन तैना मड़द तैट्ठां मुड़तां सदोमेरे पासे गाने लग्गे; पन अब्राहम यहोवा कां खड़ो रेइ जेव। 23 तैखन अब्राहम तैसेरे नेड़े गेइतां ज़ोने लगो, "कुन तू सच़्च़े दुष्टी सेइं साथी धर्मी भी नाश केरेलो? 24 अगर तैस नगरे मां 50 धर्मी भोन त कुन तू सच़्च़े तैस ठारी नाश केरेलो ते तैन 50 धर्मी लोकां केरे वजाई सेइं ज़ैना तैस मां भोन न बखशेलो? 25 एरू कम केरनू तीं करां दूर राए कि दुष्टे सेइं साथी धर्मी भी मारस ते धर्मी ते दुष्टेरी, दूईयां केरि अक्‍के हालत भोए। इन तीं करां दूर राए। कुन सैरी धेरतरो न्याय केरनेबालो न्याय न केरेलो?" 26 यहोवा परमेशरे ज़ोवं, "अगर मीं सदोम नगरे मां 50 धर्मी भी मैल्हन, त तैन केरि वजाई सेइं तैस सारे ठारी बखशेलो।" 27 फिरी अब्राहमे ज़ोवं, "हे प्रभु, शुन अवं त मित्ती ते मांज़न आईं; फिरी भी मीं एत्री जिद की, कि तीं सेइं गल्‍लां केरि। 28 अगर तैन 50 धर्मी लोकन मां 5 घट भोन; त कुन तू 5 घट भोनेरे वजाई सेइं तैस सारे नगरेरो नाश केरेलो?" तैने ज़ोवं, "अगर मीं तैस मां 45 भी मैल्हन, फिर भी तैसेरो नाश न केरेलो।" 29 फिरी तैने तैस सेइं इन भी ज़ोवं, "अगर तैड़ी 40 मैल्हन।" तैने ज़ोवं, "त अवं 40 केरे वजाई सेइं भी एरू न केरेलो।" 30 फिरी तैने ज़ोवं, "हे प्रभु, क्रोध न केरस, त अवं किछ होरू ज़ोईं: अगर तैड़ी 30 मैल्हन।" तैने ज़ोवं, "अगर मीं, तैड़ी 30 भी मैल्हन, त फिरी भी एरू न केरेलो।" 31 फिरी तैने ज़ोवं, "हे प्रभु, शुन, मीं एत्री त जिद कियोरीए कि तीं सेइं गल्‍लां केरि: अगर तैस मां 20 मैल्हन।" तैने ज़ोवं, "अवं 20 केरे वजाई सेइं भी तैसेरो नाश न केरेलो।" 32 फिरी तैने ज़ोवं, "हे प्रभु, क्रोध न केरस, त अवं एक्‍की बार हेजू ज़ोइलो: अगर तैस मां 10 मैल्हन।" तैने ज़ोवं, "त अवं 10 केरे वजाई सेइं भी तैसेरो नाश न केरेलो।" 33 ज़ैखन यहोवा परमेशरे अब्राहमे सेइं गल्‍लां केरतां मुकेइ, तैखन तै च़लो जेव: ते अब्राहम अपने घरजो वापस जेव।