Gênesis 47

फ़िरौन याकूबेरू सुवागत केरते

1 तैखन यूसुफे फ़िरौने कां गेइतां ई खबर शुनाई, "मेरो बाजी ते मेरे ढ्ला, ते तैन केरां गोरू-गब्बां ते ज़ैन किछ तैन केरूए, तैनेईं तैन सब कनान मुल्खेरां आनोरूए; ते हुन्ना त तैना गोशेन मुल्खे मां आन।" 2 फिरी तैनी अपने ढ्लान मरां पंच़ मैन्हु एन्हतां फ़िरौनेरे सामने खड़े किये। 3 फ़िरौने तैसेरे ढ्लान पुछ़ू, "तुश्शो कारोबार कुने?" तैनेईं फ़िरौने सेइं ज़ोवं, "तेरे नौकर पुहाल आन, ते इश्शे दादे-पड़दादे भी एन्ने कम केरते एवरेन।" 4 फिरी तैनेईं फ़िरौने सेइं ज़ोवं, "अस इस मुल्खे मां परदेशी बेनतां रानेरे लेई एवरेम; किजोकि कनान मुल्खे मां भारी काल भोनेरे वजाई सेइं तेरे नौकरन अपना गब्बां केरे च़ारनेरे लेई घास न राव; एल्हेरेलेइ अपने नौकरन गोशेन मुल्खे मां रानेरे लेई हुक्म दे।" 5 तैखन फ़िरौने यूसुफे सेइं ज़ोवं, "तेरो बाजी ते तेरे ढ्ला तीं कां एवरेन, 6 ते मिस्र मुल्ख तेरे सामने पेवरोए; इस मुल्खेरो ज़ै रोड़ो ज़ेरो हिस्सो भोल्हो, तैस मां अपने बाजी ते ढ्लान बसेई दे; मतलब तैना गोशेन मुल्खे मां रान; ते अगर तू ज़ानतस कि तैन मां मेहनती मैन्हु आन, त तैन मरां किछ मेरे जानबरां केरे अधिकारी बनेई दे।" 7 तैखन यूसुफे अपनो बाजी याकूब एन्हतां फ़िरौनेरे सामने खड़ो कियो; ते याकूबे फ़िरौने आशिर्वाद दित्तो। 8 तैखन फ़िरौने याकूबे पुछ़ू, "तेरी उमर केत्रीए?" 9 याकूबे फ़िरौने जुवाब दित्तो, "मीं त 130 साल परदेशी भोइतां अपनि ज़िन्दगी गुज़ारी; मेरे ज़िन्दगरे दिहाड़े थोड़े ज़ेरे दुखे सेइं भरोरे भी थिये, ते मेरे दादे-पड़दादे परदेशी भोइतां ज़ेत्रे दिहाड़न तगर ज़ींते राए एत्री मेरी उमर हेजू नईं भोवरी।" 10 ते याकूब फ़िरौने आशिर्वाद देइतां तैसेरे सामनेरां च़लो जेव। 11 तैखन यूसुफे अपने बाजी ते ढ्ला बसेई छ़डे, ते फ़िरौनेरे हुक्मेरे मुताबिक मिस्र मुल्खेरे रोड़े करां रोड़ो हिस्सो, मतलब रामसेस नंव्वेरे नगरेरे ड्लेखी मां, ज़मीन देइतां तैन्न सौंफी दित्ती। 12 ते यूसुफ अपने बाजी केरो ते अपने ढ्लां केरो, ते बाजी केरे सारे घरानेरो, एक्‍की-एक्‍की बाल-बच्‍चां केरि गिनतरे मुताबिक, रोट्टी देइतां तैन केरि हेरगेश केरने लगो।

कालेरे वक्ते यूसुफेरो इंतज़ाम

13 तैस सारे मुल्खे मां खाने जो किछ न रावं; किजोकि काल बड़ो भारी थियो, ते कालेरे वजाई सेइं मिस्र ते कनान दूईये मुल्ख तबाह भोइ जे। 14 ते ज़ेत्रे रुपेइये मिस्र ते कनान मुल्खे मां थिये, तैना सब यूसुफे तैस अन्नेरे बदले, ज़ैना तैस करां घिन्तां नेते थिये तैना अकोट्ठे केरतां फ़िरौनेरे भवने मां पुज़ातो थियो। 15 ज़ैखन मिस्र ते कनान मुल्खेरो सारो रुपेइयो खतम भोइ जेव, तैखन सब मिस्री यूसुफे कां एइतां ज़ोने लगे, "असन खानेरी चीज़ां दे, कुन असन कां रुपेइये न भोनेरी वजाई सेइं तेरे रहते भी मेरि गाम?" 16 यूसुफे ज़ोवं, "अगर रुपेइये न भोन त अपने जानबरे देथ, ते अवं तुसन तैन केरे बदले खाने जो अन्न देइलो।" 17 तैखन तैनेईं अपने जानबर यूसुफे कां आने; ते यूसुफ तैन घोड़े, गोरू-गब्बां ते गधां केरे बदले खाने जो अन्न देने लगो: तैस साल तै सब कौमरे जानबरां केरे बदले रोट्टी देइतां तैन केरि हेरगेश केरने लगो। 18 तै साल त बीती जेव; तैखन एग्री साले तैनेईं तैस कां एइतां ज़ोवं, "अस अपने मालिके करां ई गल न छ़ुपेई बटमेले कि इश्शो रुपेइयो खतम भोइ जेवरोए, ते इश्शे हर किसमेरे जानबर इश्शे मालिके कां पुज़ोरेन; एल्हेरेलेइ हुनी इश्शे मालिकेरे सामने असन कां अपनि जान ते ज़मीनरे अलावा होरू किछ नईं राहोरू। 19 असां तेरे हेरते-हेरते किजो मरम, ते इश्शी ज़मीन किजो उज़ड़ी गाए? ते इश्शी ज़मीन खानेरी चीज़ां केरे बदले घिन, कि असां एपनी ज़मीनी सने फ़िरौनेरे नौकर भोम ते असन बीज़ दे, कि अस मरम न, बल्के ज़ींते रहम, ते ज़मीन तबाह न भोए।"

20 तैखन यूसुफे मिस्रेरी सारी ज़मीन फ़िरौनेरे लेई घिन्नी; किजोकि तैस बड़े कालेरे वजाई सेइं मिस्रेरे लोकेईं अपनु-अपनु ऊडार बेच़नू पेवं। एन्च़रे सेइं सारी ज़मीन फ़िरौनेरी भोइ जेई। 21 ते एक्‍की पासे करां लेइतां होरि पासे तगर सारे मिस्र मुल्खे मां ज़ैना लोक रहते थिये, तैना अपने नगरन मां एन्हतां बसेई छ़डे*47:21 एन्हतां बसेई छ़डे तैने तैना फ़िरौनेरे गुलाम बनाए।। 22 पन याजकां केरि ज़मीन तैनी न घिन्नी; किजोकि याजकां केरे लेई फ़िरौनेरी तरफां रोज़ेरी रोट्टरो इंतज़ाम भोतो थियो, ते रोज़ ज़ै रोट्टी फ़िरौन तैन देतो थियो, तैए तैना खाते थिये; एस्से वजाई सेइं तैन अपनि ज़मीन बेच़नी न पेई। 23 तैखन यूसुफे लोकन सेइं ज़ोवं, "शुना, मीं अज़्ज़ेरी दिहाड़ी तुसन ते तुश्शी ज़मीन भी फ़िरौनेरे लेई घिन्नोरीए; हेरा, तुश्शे लेई इड़ी बीज़े, एस ज़मीनी मां बेआ। 24 ते ज़ैन किछ उगी गालू तैसेरो पंच़ोंव हिस्सो फ़िरौने जो देइयथ, बाकी च़ेवर हिस्से तुश्शे राले कि तुस तैस अपने उडारन मां बेइयथ, ते अपने-अपने बाल-बच्‍चे ते घरेरे लोक खेइयां केरथ।" 25 तैनेईं ज़ोवं, "तीं असां बंच़ेवरेम; इश्शे मालिकेरी सिद्धी नज़र असन पुड़ बनोरी राए, ते असां फ़िरौनेरे नौकर बेनतां रहमेले।" 26 एन्च़रे सेइं यूसुफे मिस्रेरी ज़मीनरे बारे मां एरहो कानून बनाव, ज़ै अज़्ज़ेरी दिहैड़ी तगर च़लतो राहोरोए कि पंच़ोंव हिस्सो फ़िरौने मैल्हे; ते सिर्फ याजकां केरि ज़मीन फ़िरौनेरी न भोइ।

इस्राएलेरू गोशेन सूबे मां बस्सनू

27 इस्राएली मिस्रेरे गोशेन प्रदेशे मां राने लगे; ते तैट्ठेरी ज़मीन तैन केरे कब्ज़े मां थी, ते तैना फुले-फले, ते बड़े बेद्धी जे। 28 मिस्र मुल्खे मां याकूब 17 साल ज़ींतो राव एन्च़रे सेइं याकूबेरी सारी उमर 147 साल भोइ।

29 ज़ैखन इस्राएलेरे मरनेरे दिहाड़े नेड़े आए, तैखन तैनी अपनु मट्ठू यूसुफ कुजेइतां ज़ोवं, "अगर तेरी दया मीं पुड़ भोए, त अपनो हथ मेरी ज़ंघी हैठ रेखतां कसम केर, कि तू मीं सेइं महरबानी ते सच़्च़ाई सेइं इन कम केरेलो, कि मीं मिस्र मुल्खे मां मित्ती न देलो। 30 ज़ैखन अवं मेरि, अवं चाताईं ज़ैड़ी मेरे दादे-पड़दादे दबोरेन तैड़ी मीं भी दबा, एल्हेरेलेइ मेरी लाश मिस्रे मरां नेइयथ।" तैखन यूसुफे ज़ोवं, "अवं तेरे ज़ोनेरे मुताबिक केरेलो।" 31 फिरी तैनी ज़ोवं, "मीं सेइं कसम केर।" ते तैनी तैस सेइं कसम की। तैखन इस्राएले खट्टरे शिरेइंतेरे पासे मथ्थो टेकतां परमेशरेरू शुक्र कियूं।