1 "सुर्गेरू राज़ तैस ज़िमदारेरू ज़ेरूए ज़ै झ़ेझ़ां उट्ठतां ते अपने दाछ़री बागी मां मज़दूर कम्मे लाए। 2 तैनी अक दीनार* रोज़ मज़दूरी देनेरे लेई तैना बागी मां भेज़े। 3 फिरी नौ बज़ेइं बेइर गेइतां तैनी बज़ारे मां काई लोक बेकार खड़े लाए। 4 तैनी तैन सेइं ज़ोवं, ‘तुस भी मेरी बागी मां गाथ, ते ज़ैन किछ जाइज़ भोल्हु अवं तुसन देलो।’ तैना कम्मे पुड़ जो जे। 5 फिरी तैनी दुपहरेईं ते ट्लेइ बज़न तगर एन्ने कियूं। 6 पंच़े बज़ेइं तैनी बेइर निस्तां किछ होरे लोक भी खड़खड़े लेइतां तैन पुछ़ू, ‘तुस झ़ेझ़ेरे देंते किजो बेकार खेड़ोरेथ?’ तैनेईं जुवाब दित्तो, ‘अस केन्चे कम्मे नईं लेवरे।’ 7 तैनी तैन सेइं ज़ोवं, ‘तुस भी मेरे बागी मां गाथ ते कम केरा।’"

8 "ड्लवझ़ी तैनी बागरे मालिके अपने मुन्शी सेइं ज़ोवं कि, ‘पेइले लग्गोरे मज़दूर ते पत्ती कम्मे लग्गोरे मज़दूर सेब्भन अक-अक दीनार दिहाड़ी दे।’ 9 ज़ैना पंच़े बज़ेइं एवरे थिये, तैन भी अक दीनार पूरी दिहाड़ी मैल्ही। 10 ज़ैना मज़दूर झ़ेझ़ां कम्मे लग्गोरे थिये तैन केरि बारी आई त तैनेईं सोचू कि असन जादे मैलनेन, पन तैन भी अक-अक दीनार मैल्हो। 11 ज़ैखन दिहाड़ी मैल्ही, त तैस मालिकेरे बारे मां तैना एप्पू मांमेइं बुराई केरने लग्गे। 12 ‘पत्ती लेवरे मज़दूरेईं सिर्फ अक घैन्टो कम कियोरूए, ते तीं तैन भी असन बराबर ज़ैनेईं सैरी दिहैड़ी कम कियां मज़दूरी दित्ती।’ 13 तैनी तैन मरां एक्‍की जुवाब दित्तो, ‘दोस्त मीं तीं सेइं कोई अन्याय नईं कियोरो, कुन मीं तीं सेइं अक दीनार दिहैड़री गल न थी कियोरी? 14 एल्हेरेलेइ ज़ै तेरी मज़दूरीए तै ट्ला ते च़लो गा, ऐह मेरी मर्ज़ीए कि बादे मां लग्गोरे मज़दूर भी एत्रे देईं। 15 कुन मीं ऐह अधिकार नईं कि अपने माले मरां ज़ैन चैईं तैन केरि? तू मीं पुड़ एल्हेरेलेइ ज़लतस कि अवं खुल्‍ले दिले सेइं देने बालोईं?’ 16 एल्हेरेलेइ बड़े मैन्हु ज़ैना हुन्ना पेइले आन, तैना बादे मां पत्रोवं भोनेन, ते ज़ैना हुन्ना पत्रोवं आन, तैना बादे मां पेइले भोनेन।"

17 यरूशलेम नगरे जो गांते बार यीशुए अपने 12 चेलन अलग नेइतां तैन सेइं ज़ोवं, कि तैस सेइं कुन भोनेबालूए। 18 "हेरा, अस यरूशलेम नगरे जो च़लोरेम, मैन्हेरू मट्ठू प्रधान याजकां ते शास्त्री लोकां केरे हवाले कियूं गालू, ते तैना तैस मारनेरे काबल ठहरेले। 19 तैस गैर कौमां केरे हवाले केरेले, तैना मैन्हेरे मट्ठेरी यानी मेरी हासी बनाले, ते तैस कोड़े बाहेले, ते फिरी तैस क्रूसे पुड़ च़ाढ़ेले, ते अवं ट्लेइयोवं दिहाड़े फिरी ज़ींतो भोल्हो।"

20 तैखन जब्दी नंव्वेरे मैन्हेरां मट्ठां केरि अम्मा अपने मट्ठन सेइं साथी यीशु कां आई, ते तैस कां मिन्नत केरने लाई ते तैस करां किछ मगने लग्गी। 21 तैने तैस पुछ़ू, "तीं कुन लोड़ते?" तैसां ज़ोवं, "वचन दे, कि मेरां इन्ना मट्ठां तेरे राज़्ज़े मरां अक तेरे देइने पासे त होरू तेरे बांए पासे बिश्शन।" 22 पन यीशुए तैन सेइं ज़ोवं, "तुस न ज़ानथ कि कुन मगने लग्गोरेथ! ज़ेन्च़रे दुख अवं झ़ैलने बालोईं, कुन तुस झ़ेल्‍ली सकतथ? तैनेईं जुवाब दित्तो, हाँ झ़ेल्‍ली सकतम।" 23 तैनी तैन सेइं ज़ोवं, "तुस मेरे ज़ेरो दुख झ़ल्‍लेले, पन एन मेरू कम नईं कि एक्‍की देइने पासे ते होरि बांए पासे बिशैली, ऐह ठार ज़ेसेरे लेई मेरे बाजेरे तरफां रख्खोरीए तै तैसेरे लेइए।"

24 एन शुन्तां होरि दश चेलेईं तैन दूई ढ्लान पुड़ नराज़ भोइ जे। 25 यीशुए अपने सारे चेले नेड़े कुजेइतां, तैन सेइं ज़ोवं, "होरि कौमां केरे प्रधान अपने लोकन पुड़ राज़ केरतन, ते तैन केरे मालिक तैन पुड़ अधिकार रखतन। 26 पन तुसन मां एरू न लोड़े भोरू, बल्के तुसन मां ज़ै बड्डो बन्नो चाते, तै सेब्भी केरो सेवक बने। 27 ज़ै कोई तुसन मां प्रधान बन्नू चाए, तै सेब्भी केरो सेवक बने, 28 ज़ेन्च़रे कि मैन्हेरू मट्ठू एल्हेरेलेइ नईं एवरू कि कोई तैसेरी सेवा केरे, बल्के एल्हेरेलेइ कि सेवा केरे, ते अपनि जान बड़े लोकां केरे छुटकारेरे लेई दे।"

29 ज़ैखन यीशु त तैसेरे चेले यरीहो नगरे मरां च़लोरे थिये, त बड़े लोक तैस पत्पती च़ले। 30 दूई काने बत्ती मां बिश्शोरे थिये, तैनेईं एन शुनू कि यीशु इस बत्तां च़लोरोए, त तैना चिन्डां मारने लग्गे, "हे प्रभु दाऊदेरा मट्ठां असन पुड़ दया केर।" 31 लोक तैन झ़िड़कने ते ज़ोने लग्गे कि च़ुप राथ, पन तैना मना चिन्डां मारने लग्गे, "हे प्रभु, दाऊदेरा मट्ठां असन पुड़ दया केर।" 32 तैखन यीशु खेड़ोव ते तैन कुजेइतां पुछ़ने लगो, "तुस कुन चातस अवं तुश्शे लेई केरि?" 33 तैन कानेईं जुवाब दित्तो, "हे प्रभु अस चातम कि इश्शी एछ़्छ़न लौ एज्जे।" 34 यीशुए तैन पुड़ बड़ो तरस अव, ते तैनी तैन केरे एछ़्छ़न पुड़ हथ रख्खो ते तैना लहने लग्गे, ते दूईये काने यीशु पत्ती च़ले जे।