1 ज़ैखन यीशुए एन गल्‍लां की, त तै अपने चेलन सेइं ज़ोने लगो। 2 "तुसन पत्तोए कि दूई दिहैड़ना बाद फ़सह तिहारे, ते मैन्हेरू मट्ठू क्रूसे पुड़ च़ाढ़नेरे लेई ट्लुवाव गाए।"

3 तैखन प्रधान याजक ते कौमरे बुज़ुर्ग कैफा महायाजकेरे अंगने मां अकोट्ठे भोए। 4 ते तैनेईं सलाह की, कि यीशु धोखे सेइं ट्लेइतां मैरी छ़डम। 5 पन तैना ज़ोते थी, कि फ़सह तिहारेरे मौके पुड़ नईं, एरू न भोए कि लोक हंगामो केरन।

6 तैस मौके यीशु बैतनिय्याह ड्लाव्वें मां शमौन कोढ़ेरो घरे मां थियो। 7 ते अक कुआन्श संगमरमरेरे भांडे मां इत्र घिन्तां यीशु कां आई, तैखन तै रोट्टी खानेरे लेई बिशोरो थियो, त तैसेरे दोग्गे पुड़ तै इत्र उलटाव। 8 चेले एन लेहितां बड़े नाराज़ भोए ते ज़ोने लग्गे, "कि ऐह किजो बरबाद कियो?" 9 अगर ऐह बेच़ोरो भोथो, त बड़ी कीमत मैल्हनी थी, ज़ै गरीबन बेंटतां देथे। 10 यीशुए एन शुन्तां तैन सेइं ज़ोवं, "तुस एस कुआन्शी किजो तंग केरने लगोरेथ? एसां त मीं सेइं रोड़ू कियोरूए। 11 गरीब त हमेशा तुसन सेइं साथी भोनेन, पन अवं तुसन सेइं साथी हमेशा नईं भोनो। 12 तैसां मेरी जानी पुड़ ज़ै ई इत्र उलटावरोए, तैसां मेरे दबनेरे लेई कियोरू। 13 अवं तुसन सेइं सच़ ज़ोताईं, कि सैरी दुनियाई मां ज़ैड़ी भी खुशखबरी शुनाई गाली, तैड़ी तैसेरी यादगैरी मां एस गल्‍लरे बारे मां भी ज़ोवं गालू।"

14 फिरी 12 चेलन मरां अक ज़ेसेरू नवं यहूदा इस्करियोती थियूं, प्रधान याजकन कां जेव ते ज़ोवं। 15 "अगर अवं यीशु तुसन ट्लुवेइं, त तुस मीं कुन देले? तैनेईं तैस 30 चैंदरे सिक्‍के दित्ते। 16 ते तै तेइसेरो तै ठीक मौके बलगने लगो कि यीशु केन्च़रे सेइं ट्लुवाए।"

17 "अखमीरी रोट्टरे तिहारेरी पेइली दिहाड़ी चेले यीशु कां एइतां पुछ़ने लग्गे कि, तू फ़सह तिहारेरी रोट्टी कोड़ि खानी चातस, ताके अस गेइतां तियारी केरम?"✝ 18 तैनी ज़ोवं, "नगरे मां अक फलानो मैन्हुए, ते तुस तैस कां गाथ ते तैस ज़ोथ, कि गुरू ज़ोने लग्गोरोए, मेरो वक्त नेड़े पुज़ोरोए ते अवं अपने चेलन सेइं साथी फ़सह तेरे घरे मां मनेइलो।" 19 बस्सा ज़ेरो यीशुए अपने चेलन हुक्म दित्तोरो थियो, तैनेईं तेन्च़रे फ़सह तिहारेरी रोट्टी तियार की।

20 ज़ैखन ड्लोझ़ भोइ त यीशु 12 चेलन सेइं साथी रोट्टी खाने बिश्शो। 21 ते रोट्टी खांते बार यीशुए तैन सेइं ज़ोवं, "अवं तुसन सेइं सच़ ज़ोताईं कि तुसन मरां अक मीं ट्लुवालो।" 22 "एन शुन्तां तैना सारे चेले उदास भोए, तैना बैरी-बैरी सेइं तैस पुछ़ने लग्गे, हे प्रभु कुन अव्वें त नईं?" 23 तैनी जुवाब दित्तो, "ज़ैनी मीं सेइं साथी थैली मां हथ छ़डोरोए, तैए मीं ट्लुवालो। 24 मैन्हेरे मट्ठेरे लेई त ज़ेरू तैसेरे बारे मां लिखेरूए तैस सेइं तेरहु कियूं गाते, पन अफ़सोस तैस मैन्हु पुड़ ज़ेसेरी वजाई सेइं तैन ट्लुवाव जेव, तैसेरेलेइ एन्ने रोड़ू थियूं कि तै ज़र्मोरो न भोथो। 25 तैखन ट्लुवानेबालो यहूदा ज़ोने लगो, हे गुरू अव्वें त नईं? तैनी तैस सेइं ज़ोवं, तीं एप्पू ज़ोवं।"

26 खांते बार यीशुए रोट्टी ट्लाती, ते बरकत मेगतां ट्लोड़ी, ते चेलन कां देइतां ज़ोवं यांथ खाथ ई मेरी जाने। 27 फिरी यीशुए दाछ़रे रसेरो कटोरो ट्लातो, ते परमेशरेरू शुक्र केरतां चेलन कां दित्तो ते ज़ोवं, "यांथ तुस सब इस मरां पीया। 28 किजोकि ई मेरे नंव्वे करारे मां मेरो तै खूने ज़ै बड़ां केरे पापां केरि मैफरे लेई दित्तो गाते। 29 अवं तुसन सेइं ज़ोताईं, कि अवं दाछ़रो ई रस फिरी कधे न पियेलो ज़ांतगर परमेशरेरे राज़्ज़े मां तुसन सेइं साथी नंव्वो न पीं।" 30 तैल्‍ला पत्ती, यीशु त कने तैसेरे चेले परमेशरेरू भजन ज़ोइतां, यरूशलेम नगरेरे बेइर ज़ैतून नंव्वेरे पहैड़ी पुड़ च़ली जे।

31 तैखन यीशुए तैन सेइं ज़ोवं, "तुस अज़्ज़े राती मेरी वजाई सेइं ठोकर खाले, किजोकि लिखेरूए, ‘अवं पुहाले मारेलो ते धनेरी भैड्डां तितर-बितर भोल्ही।’ 32 पन अवं ज़ींतो भोइतां तुसन करां पेइले गलील इलाके मां गेइलो।" 33 पतरसे तैस सेइं ज़ोवं, "अगर सारे तेरी वजाई सेइं ठोकर खान त खान, पन अवं तेरे बारे मां कधी ठोकर न खेइलो।" 34 यीशुए तैस सेइं ज़ोवं, "अवं तुसन सेइं सच़ ज़ोताईं कि अज़ राती कुकड़ बांग देने करां पेइले तू मेरो ट्लाई बार इन्कार केरेलो।" 35 पन पतरसे ज़ोवं, "अगर तीं साथी मीं मरनू भी पे, त तांभी अवं तेरो इन्कार न केरेलो ते सैरी चेलेईं भी एन्ने ज़ोवं।"

36 तैखन यीशु अपने चेलन सेइं साथी एक्‍की ठैरी पुज़ो, ज़ैस ठारारू नवं गतसमनी थियूं, ते तै अपने चेलन सेइं ज़ोने लगो, तुस इड़ी बिश्शा, ते तांतगर अवं उड़ी अगर गेइतां प्राथना केरताईं। 37 तैनी पतरस ते जेब्देरां दूईये मट्ठां साथी नियां, ते तैड़ी तै बड़े परेशान भोने त कने घबराने लगो। 38 फिरी यीशुए तैन सेइं ज़ोवं, इस दुखेरे वजाई सेइं मेरे प्राण निसने लगोरेन इड़ी बिश्शोरे राथ ते बींझ़े राथ। 39 फिरी तैने थोड़ो ज़ेरे अगर गेइतां तल्‍ले मां तुत्तरेरे भारे झुकतां प्राथना की, "हे बाजी अगर भोइसखे त ई कटोरो मीं करां टेली गाए, फिरी भी ज़ैन अवं चाताईं तैन नईं बल्के ज़ैन तू चातस तैन्ने भोए।" 40 फिरी तै चेलन कां वापस अव ते तैना झ़ुलोरे लाहे, ते तैने पतरसे सेइं ज़ोवं, "कुन तुस अक घड़ी भी मीं सेइं साथी बींझ़े न बिश्शी सके?" 41 बींझ़े बिश्शा ते प्राथना केरते राथ ताके तुस अज़मैइशी मां न राथ, आत्मा त तियारे पन जान कमज़ोरे। 42 यीशुए फिरी जेव, ते ई प्राथना की, "हे मेरे बाजी ई दुखेरो कटोरो मेरे पीने बगैर टेली न सखे, त तेरी मर्ज़ी पूरी भोए।" 43 तैखन तै चेलन कां एइतां तैना फिरी झ़ुलोरे लाहे, किजोकि तैन केरि एछ़्छ़ी ओंड्ले सेइं गिरकी भोवरी थी। 44 तै तैन तैड़ी छ़ेडतां च़लो जेव, ते फिरी तैए प्राथना केरने लगो ज़ै पेइली कियोरी थी। 45 तैसेरां बाद तै चेलन कां वापस अव, ते तैन सेइं ज़ोने लगो, "हुनी झ़ुलोरे राथ ते आराम केरा, हेरा तै मौको नेड़े पुज़ोरोए, ते मैन्हेरू मट्ठू पापी लोकां केरे हवाले कियूं गाते। 46 उठा, च़लम। हेरा! मीं ट्लुवांने बालो नेड़े पुज़्ज़ी जेवरोए!"

47 तै एना गल्‍लां ज़ोने लगोरो थियो, त यहूदा ज़ै 12 चेलन मरां थियो तैड़ी पुज़ो, तैस सेइं साथी बड़े मैन्हु थिये ज़ैना तलवारां ते लट्ठां घिन्तां एवरे थिये तैना प्रधान याजकेईं ते कौमरे बुज़ुर्ग लोकेईं भेज़ोरे थिये।✝ 48 तैसेरे ट्लुवांने बाले तैन ई निशान दित्तोरो थियो, कि ज़ैस अवं फुम्मड़ी देइलो त तैए, ते तुस तैस ट्लेइयथ। 49 ते तैखन यहूदा, यीशु कां एइतां ज़ोवं, हे गुरू नमस्कार, ते एइतां तैस फुम्मड़ी दित्ती। 50 यीशुए तैस सेइं ज़ोवं, हे मेरे दोस्ता ज़ैस कम्मेरे लेई तू एवरोस तैन कम केर, तैखन लोकेईं एगरोइतां यीशु पुड़ हथ रख्खे ते ट्लाव। 51 यीशुएरे सैथन मरां एक्‍के अपनि तलवार कढी, ते महायाजकेरे नौकरे पुड़ बाई ते तैसेरो कन्न कट्टो। 52 तैखन यीशुए तैस जो ज़ोवं, तलवारी म्याने मां रख किजोकि ज़ैना तलवार च़लातन तैना तलवारी सेइं मारे गाले। 53 "कुन तू न ज़ानस अवं अपने बाजी करां मिन्नत केरि सकताईं तै हुन्ना स्वर्गदूतां केरि 12 फौजां बल्के तैस करां भी जादे भेज़ते। 54 पन फिरी तैना पवित्रशास्त्रेरी गल्‍लां केन्च़रे पूरी भोनिन ज़ैन केरू पूरू भोनू ज़रूरीए?" 55 तैखन यीशुए तैन हछे लोकन सेइं ज़ोवं, "अवं कुन कोई डैकू आईं ते तुस मींजो डांग सोटे ते तलवारां ट्लेइतां मीं ट्लाने एवरेथ? अवं त रोज़ मन्दरे मां बिशतां शिक्षा देतो थियो ते तैखन तुसेईं अवं नईं ट्लातोरो? 56 पन एन सब किछ एल्हेरेलेइ भोवं, कि पवित्र वचने मां नेबी केरि लिखोरी गल्‍लां पूरी भोन, तैखन सारे चेले तैस तैड़ी छ़ेडतां च़ले जे।"

57 ते यीशु ट्लानेबाले तैस महायाजक कैफा कां घिन्तां जे, ज़ैड़ी तैना शास्त्री ते बुज़ुर्ग अकोट्ठे भोवरे थिये।✝ 58 ते पतरस भी दूरेरां देंतो पत्पती तैस महायाजकेरे अंगनेरे तगर जेव, ते तैड़ी पेरहेदारन सेइं साथी बिशतां यीशुएरो अन्त लेवरो थियो हेरने कि कुन केरतन। 59 प्रधान याजक ते कने सारी महासभा यीशुएरे खलाफ गवाही तोपनेरी कोशिश केरि राओरे थिये, कि ज़ैस सेइं यीशु कत्ल कियो गाए। 60 पन कोई गवाह न मैल्हो, हालांकी बड़े झूठे गवाह भी पेश भोए, आखर्कार दूई गवाह पेश भोए। 61 ते ज़ोने लग्गे, एनी ज़ोवरू कि, "अवं परमेशरेरू घर डोलतां ट्लेइ दिहाड़न मां फिरी खड़ू केरि सकताईं।" 62 तैखन महायाजक खड़ो भोइतां यीशु पुछ़ने लगो, "कुन तू कोई जुवाब न देस, इना लोक तेरे खलाफ कुन गवाही देतन?" 63 पन यीशु च़ुप राव, "तैखन महायाजक फिरी पुछ़ने लगो, तीं ज़ींते परमेशरेरी कसम भोए कि असन ज़ो, कि तू परमेशरेरू मट्ठू मसीह आस? 64 यीशुए जुवाब दित्तो, तीं एप्पू ज़ोई छ़डू ते हुनी अवं भी ज़ोताईं कि अज़्ज़ेरे बाद तुस मैन्हेरे मट्ठे परमेशरेरे देइने पासे बिश्शोरे लाएले, ते अम्बरे पुड़ बिदलारी मां एइते लाएले।" 65 तैखन महायाजके अपना लिगड़ां छ़िंदां, ते ज़ोने लगो, एनी परमेशरेरी तुहीन कियोरीए हुनी असन केन्ची गवाहेरी ज़रूरत नईं, तुसेईं हुन्ना एसेरू झूठ शुनेरूए। 66 तुश्शी कुन राईए? तैनेईं जुवाब दित्तो ऐह कत्लेरे काबले? 67 तैखन तैनेईं तैसेरे तुत्तरे पुड़ थुकू ते तैस घुसेइं ते होरेईं थप्पड़ मैरतां ज़ोवं। 68 "हे मसीह अगर तू नबी आस त भविष्यिवाणी केर ते ज़ो, तीं केनि बाहोरिए?"

69 पतरस बेइर अंगने मां बिशोरो थियो, ते अक नौकरानी तैस कां आई ते ज़ोने लग्गी कि तू भी यीशु गलीली सेइं साथी थियो। 70 तैनी सेब्भी केरे सामने इन्कार कियो ते ज़ोवं, "मीं नईं पतो तू कुन लगोरिस ज़ोने? 71 तैखन पतरस बेइर फाटकेरे पासे जेव, त अक होरि नौकरानी तैस लेइतां तैन सेइं ज़ैन तैड़ी थी ज़ोने लाई, ई मैन्हु भी नासरतेरे यीशु सेइं साथी थियो।" 72 पन तैनी सेब्भी केरे सामने कसम केरतां इन्कार कियो, ते ज़ोवं, अवं एस मैन्हु सैइयां न ज़ैनी। 73 थोड़े च़िरेरां पत्ती तैना लोक ज़ैना तैड़ी खड़खड़े थिये, पतरसे कां आए ते ज़ोने लग्गे, सच़्च़े तू भी तैन्ने मरां अक आस, किजोकि तेरी बोली सेइं बुझ़ोते कि तू तैसेरो साथिस। 74 तैखन तै तैस जो गैई देइतां ज़ोने लगो, ते कसम केरतां ज़ोने लगो, "अवं एस मैन्हु सैइयां न ज़ैनी।" तैखन कुकड़े बांग दित्ती। 75 पतरसे तैखन यीशुएरी तै गल याद आई, ज़ै तैनी ज़ोवरी थी कि कुकड़ेरे बांग देने करां पेइले तू ट्लेइ बार मेरो इन्कार केरेलो, ते पतरस बेइर गेइतां हुस्बुकैइं-हुस्बुकैइं लेरां देने लगो।✝