1 फिरी यीशु किश्ती मां च़ेढ़तां दरियाए पार जो जेव, ते अपने नगरे मां अव। 2 ते हेरा, किछ मैन्हेईं अक अधरंगी मैन्हु खट्टी पुड़ छ़ुइतां तैस कां आनो, ज़ैखन यीशुए तैन केरो विश्वास हेरो, त तैस अधरंगी मैन्हु जो ज़ोवं, "मट्ठा, गा हिम्मत रख, तेरे पाप माफ़ भोए।" 3 एस गल्‍ली पुड़ किछ शास्त्री एप्पू मांमेइं ज़ोने लग्गे, "ऐह त परमेशरेरी तुहीन केरते!" 4 यीशुए तैन केरि मनेरी गल्‍लां बुझ़तां तैन जो ज़ोवं, "तुस अपने-अपने मने मां एन्च़रां किजो सोचने लग्गोरेथ? 5 एन ज़ोनू कुन सुखतुए कि गा ‘तेरे पाप माफ़ भोए,’ या एन ज़ोनू कि ‘उठ, ते च़ल फिर?’ 6 पन अवं किछ केरनेबालोईं, ज़ैस सेइं तुसेईं बुझ़नूए कि मैन्हेरे मट्ठे (यानी मीं) धेरती पुड़ लोकां केरे पाप माफ़ केरनेरो अधिकार आए।" तैखन तैनी तैस अधरंगी मैन्हु जो ज़ोवं, "अपनि खट छ़ुइतां अपने घरजो च़लो गा।" 7 तै अधरंगी मैन्हु तैखने अपनि खट छ़ुइतां घरजो च़लो जेव। 8 लोक एन हेरतां डेरि जे ते परमेशरेरी तारीफ़ केरने लग्गे, कि ज़ैनी मैन्हु एत्रो अधिकार दित्तोरोए।

9 ज़ैखन यीशु तैट्ठां अग्रोवं च़लो त तैनी अक मत्ती नंव्वेरो मैन्हु, चुंगी नेनेबालो दफ़तरे मां बिशोरो लाव, ते यीशुए तैस जो ज़ोवं, "तू मीं पत्ती च़ल।" तै तैखने यीशु पत्ती च़लो। 10 ते ज़ैखन यीशु अपने चेलेरे घरे गेइतां रोट्टी खाने बिश्शो ज़ेसेरू नवं मत्ती थियूं, त बड़े चुंगी नेनेबाले ते पापी मैन्हु* भी आए ते यीशु त तैसेरे चेलन सेइं साथी रोट्टी खाने बिश्शे। 11 ज़ैखन फरीसी लोकेईं एन हेरू, त तैनेईं तैसेरे चेलन पुछ़ू, "तुश्शो गुरू चुंगी घिन्ने बाले ते पापी लोकन सेइं साथी रोट्टी किजो खाते?" 12 एन शुन्तां यीशुए तैन मिसाल देइतां ज़ोवं, "सझ़र लोकन डाक्टरेरी ज़रूरत न भोए, पन बिमारन भोचे।" 13 फिर भी तुस गेइतां एस गल्‍लरो मतलब कढा, "अवं बलिदान नईं बल्के दया पसंद केरताईं, किजोकि अवं धर्मी लोकन नईं बल्के पापी लोकन कुजाने एवरोईं।"

14 तैखन यूहन्नारे चेले यीशु कां एइतां ज़ोने लग्गे कि कुन वजा आए, कि अस ते फरीसी लोक त बरत रखतम, पन तेरे चेले किजो बरत न रखन? 15 यीशुए तैन्न जुवाब दित्तो, "ड्लाहेरे दिहाड़े, ज़ैखन लाड़ो जैनी सेइं साथी रहते, कुन जन शोग बनेइं सकतन? पन तैना दिहाड़े एज्जेले, ज़ेइस लाड़ो तैन करां अलग कियो गालो (यानी मारो गालो), तैखन तैना (अपने दुखेरे वजाई सेइं) बरत रख्खेले। 16 अवं तुसन अक होरि मिसाल देताईं, नंव्वे लिगड़ेरी टलोई पुराने लिगड़े कोई न लाए। किजोकि नंव्वे लिगड़ेरी टलोई पुराने लिगड़े अपने पासे खिच्‍ची छ़डेली। ते तैन पेइले करां भी जादे छ़िन्दोलू। 17 ते नंव्वो दाछ़रो रस पुरैनी मसकन मां न भरन, किजोकि मसकां फैट्टी गाचिन ते दाछ़रो रस ज़ैया भोइ गाते ते मसकां भी कोन्ची कम्मेरी न रान। एल्हेरेलेइ नंव्वो दाछ़रो रस नेव्वीं मसकी मां छ़डतन ताके दूईये बरबाद न भोन।"

18 यीशु एन गल्‍लां हेजू मसां ज़ोने लगोरो थियो, त प्राथना घरेरो अक प्रधान अव ते यीशु कां मथ्थो टेकतां ज़ोने लगो, मेरी कुई मेरि जेवरीए, "पन तू अगर एइतां तैस पुड़ हथ रख्खस त तै हुन्ना ज़ींती भोइ गानीए।" 19 यीशु तैस सेइं साथी च़लो जेव, ते चेले भी तैस सेइं साथी जे। 20 ते एरू भोवं कि अक कुआन्श भी थी, ज़ैस 12 सालां केरि खून च़लनेरी बिमारी थी। तैसां यीशु पत्पती एइतां तैसेरे चोगे सेइं हथ लाव। 21 किजोकि तै अपने दिले मां एन ज़ोती थी, कि अगर अवं यीशुएरे चोगे सेइं हथ लाएली त अवं बेज़्झ़ोईं गानीं। 22 यीशुए बेदलोइतां तैस कुआन्शरे पासे तक्‍कू ते ज़ोवं, "हे कुइये, हिम्मत रख, तेरे विश्वासे सेइं तू बेज़्झ़ोरोस" ते तै तैखने बेज़्झ़ोइ जेई। 23 ज़ैखन यीशु तैस प्रधानेरे घरे पुज़ो, त लोक नगारो बज़ाते ते लेरां देंते लाहे। 24 तैखन यीशुए तैन लोकन सेइं ज़ोवं, "दूर भोथ, किजोकि कुई मर्री नईं, बल्के झ़ुल्‍लोरीए।" एन शुन्तां तैना लोक हसने लग्गे। 25 पन ज़ैखन लोक तैट्ठां दूर कढे, त यीशुए अन्तर गेइतां कुइयरो हथ ट्लाव, त तै ज़ींती भोइ। 26 ते एस गल्‍लरी खबर सारे इलाके मां फैली जेई।

27 ज़ैखन यीशु तैट्ठां अग्रोवं च़लो, त दूई काने तैस पत्ती चिन्डां मारते ज़ोने लग्गे, "हे दाऊदेरा मट्ठां असन पुड़ दया केर!" 28 ज़ैखन तै घरे अन्तर जेव, त तैना काने तैस कां आए, ते यीशुए तैन सेइं ज़ोवं, "कुन तुसन विश्वासे, कि अवं तुसन बज़्झ़ेई सकताईं?" तैनेईं जुवाब दित्तो "हाँ प्रभु, अस विश्वास केरतम, तू असन बज़्झ़ेइं सकतस।" 29 तैखन तैनी तैन केरि एछ़्छ़न सेइं हथ लाव ते ज़ोवं, "तुस विश्वास केरतथ कि अवं बज़्झ़ेई सकताईं, अवं तुसन बज़्झ़ेइलो।" 30 ते तैना लहने लाए, ते यीशुए तैन रोड़ेच़ारे समझ़ेइतां ज़ोवं, "खबरदार ज़ैन मीं तुश्शे लेई कियूं तैसेरे बारे मां कोन्ची सेइं न ज़ोइयथ!" 31 पन तैनेईं बेइर गेइतां सारे मुल्खे मां एस चमत्कारेरे बारे मां ज़ोवं।

32 ज़ैखन तैना बेइर च़लोरोरे थिये, त लोकेईं अक मैन्हु ज़ै गल्‍लां न थियो केरि बटतो, किजोकि तैस पुड़ भूतेरो सैयो थियो, तै तैनेईं यीशु कां आनो। 33 ते ज़ैखन भूतेरो सैयो तैस मरां कढो, त लट्टो गल्‍लां केरने लगो, लोक बड़े हैरान भोइजेइ ते ज़ोने लग्गे, असेईं एरो ज़ेरो माजरो इस्राएले मां पेइले कधे नईं लाहोरो। 34 पन फरीसी लोक ज़ोने लग्गे, "ऐह त भूतां केरे प्रधानेरे मद्दती सेइं भूतां कढते।"

35 यीशु त कने तैसेरे चेले गलील इलाकेरे ड्लाव्वन ते नगरन मां ते प्राथना घरन मां जे। ते तै शिक्षा देतो राव, ते परमेशरेरे राज़्ज़ेरी खुशखबरी शुनातो राव, ते लोकां केरि हर किसमेरी बिमारी ते कमज़ोरी दूर केरतो राव। 36 ज़ैखन तैनी बड़े लोक लाहे त तैस तैन लोकन पुड़ बड़ो तरस अव, किजोकि तैना तैन भैड्डां केरे ज़ेरे थिये ज़ैन केरो कोई पुहाल न भोए, तैन केरो बड़ो बुरो हाल थियो ते तैना टेपलोरे थिये। 37 तैखन यीशुए अपने चेलन सेइं ज़ोवं, "पकोरी फसलरे ज़ेरे बड़े लोक तियार आन ज़ैना परमेशरेरे वचने पुड़ विश्वास केरनू चातन, पन कम केरनेबाले थोड़े आन ज़ैना तैन परमेशरे राज़्ज़ेरे बारे मां ज़ोन। 38 एल्हेरेलेइ तुस फसलरे मालिके कां प्राथना केरा कि तै जादे कम केरनेबाले भेज़े, कि तैना लोकन परमेशरेरे राज़्ज़ेरे बारे मां ज़ोन।"