João 18

Esodja eezɛmɛt Yezu

1 Bhii nyɛ nazelii deenek ɛ́, Yezu bɛ nɛ bɛdjekel bɛ eezɛtɔ́ pe yii kyiid dii Sedelɔn. É di tak ye nabɛ ɛ́ nɛ dhiiti bok, wɔ gwaa, nyɛ zɛni tɔ tak, bɛ nɛ bɛdjekel bɛ. 2 Tin, Yudas, mot naka nyɛ ɔ, nadi egu di tak etɛɛ náá, Yezu bɛ nɛ bɛdjekel bɛ nadi ezezyɛ sok zɛsɛɛga é di tak. 3 Deenek, Yudas zokazɛtɔ́ pɛ bok tak, bɛ nɛ ɛdhuu ɛ esodja. Tɔ sama esodja é tak, ye nabɛ ɛ́ nɛ bɛmbaalel ɛ kok Ndjaa-ebuwa eboo bɛghaa-Zɛɛb nalwom ɔ, zɛnɔɔ bot ɛdhuu ɛ eFalizyɛ. Bot binɔk djas nadi ɛ́ nɛ mɛkɔɔ mɛ dɛɛb, nɛ etwol nɛ elama é mɛmbɔ. 4 Tin, dáa Yezu nadi egu sa nadi ekwyɛl ɛsael dum nɛ nɛ ɛ, wɔ gwaa, nyɛ zɛtiila pɛ kyee bɛ nadi ɛ́. Tin, nyɛ eezɛdji bɛ náá: «Bi saa zɛ?» 5 É di’enek, wɔ gwaa, bɛ zɛbɔɔza nɛ nɛ náá: «Yezu mot Nazalɛt.» Tin, Yezu eezɛke nɛ nɔɔ náá: «Yɛ ɛ́ mam.»

Yudas mot naka bɛ nwyak ɔ nadi ɛ́ tin, bɛ nɛ bɛnɔɔ. 6 Dáa Yezu nake nɛ nɔɔ náá: «Yɛ ɛ́ mam» ɛ, wɔ gwaa, bɛ bula pɛ bhis, zɛghaaga si. 7 Wɔ gwaa, Yezu baadji bɛ yak sok náá: «Bi saa zɛ é?» Bɛ eebaazɛbɔɔza náá: «Yezu mot Nazalɛt.» 8 Tin, Yezu eezɛke nɛ nɔɔ náá: «Ye bɛ ɛ́ mɛ eezelɛɛ bin náá, yɛ ɛ́ mam. Yɛ bɛ náá, bi saŋ ɛ mam ɔɔ, betka bot ɛ sis bɛ tɔ́ yɔbɔ.»

9 Nyɛ nake deenek ɛ́, etɛɛ náá, etɛp ee nyɛ nalɛɛ náá: «Saagam, mɛ ààpadiibal mot ngɔt tɔ bot ɛ wɔ nadjɛ mɛ ɔ» neebela mɛsuk. 10 Simɔŋ Pyɛɛd nabɛ ɛ́ nɛ pɛl. Tin, nyɛ eezɛwaal yɛ tɔ pɛp, nyɛ eezɛkwyal mot-mɛsa ɛ boo ghaa-Zɛɛb.

Wɔ gwaa, nyɛ zɛtsaal nyɛ ɛlɔ pɛ kyee mbɔ eghɛŋ. Din ɛ mot-mɛsa mɛ tak nabɛ ɛ́ Malkus. 11 É di’enek, Yezu eezɛke nɛ Pyɛɛd náá: «Bulela pɛl’ɔ tɔ pɛp! Wɔ ke ɛ́ náá, mɛ aanàkwaadɛ bɛɛlɛ mezuk mɛ Saagam zedjɛ mɛ ɛ?»

12 Deenek, ɛdhuu ɛ esodja nɛ mot nadi kɔ elo bɔɔ ɔ, zɛnɔɔ bɛmbaalel ɛ ekukuma eYuda, zokazɛmɛt Yezu. Bɛ eezɛkɔl nyɛ mɛmbɔ nɛ ekel.

Esodja eezɛtɔ́ nɛ Yezu pɛ daa An

13 Bhii tak, bɛ eezɛtɔ́ nɛ nɛ sok pɛ daa An. An nabɛ ɛ́ sɛɛg ɛ mwaa Kayif, mot nadi boo ghaa-Zɛɛb é mbu tak ɔ. 14 Ghuna, Kayif ɛ nadjɛ mɛlyo menek nɛ ekukuma eYuda, náá: «Ye nyɔ náá, mot ngɔt gwyɛ kɔ ɛsu ɛ bot djas.»

Pyɛɛd eezɛswonal Yezu

15 Simɔŋ Pyɛɛd bɛ nɛ dhiiti djekel nadi edu Yezu pɛ bhis. Tin, dhiiti djekel’enɔk nadi egunel nɛ boo ghaa-Zɛɛb. Deenek, ye naasa náá, nyɛ ni tɔ kok ndjaŋ ɛ boo ghaa-Zɛɛb lɔɔg wat bɛ nɛ Yezu. 16 É di’enek, Pyɛɛd eezɛlik pɛ kel, é ngwoob ɛniel. Tin, wɔ gwaa dhiiti djekel nadi egunel nɛ boo ghaa-Zɛɛb ɔ zɛwyis, tɔ́, kɛlii nɛ moma mɛsa nadi ebaal ɛniel ɔ. Bhii tak, bɛ eezɛniigal Pyɛɛd. 17 Moma nadi ebaal ɛniel tak eezɛke nɛ Pyɛɛd náá: «Dɔɔ nɛ wɔy pe, wɔ nadi ɛ́ ngɔt tɔ sama bɛdjekel ɛ mot yenɔk é?» Wɔ gwaa, Pyɛɛd zɛswonal. Nyɛy náá: «Ààbɛ! Mɛ ààgunel nɛ nɛ.»

18 Dáa ɛgwyiyo nadi epupal ɛbuɛpe ɛ. Wɔ gwaa, bot ɛ mɛsa nɛ bɛmbaalel kok Ndjaa-ebuwa zokazɛpaada du. Bɛ moo tin egɔɔl bɔɔ djas. Dɔɔ nɛ Pyɛɛd pe nadi ɛ́ tin, bɛ nɛ bɛnɔɔ egɔɔl du.

Boo ghaa-Zɛɛb eezɛdji Yezu mɛdjin

19 Tin, boo ghaa-Zɛɛb eezɛdji Yezu mɛdjin dum nɛ bɛdjekel bɛ, nɛ dum nɛ mɛlyo mɛ nyɛ di elyo ɛ. 20 É di’enek, Yezu eezɛbɔɔza nɛ nɛ náá: «Mam nalelyo ɛ́, popoopwon é mis mɛ bot djas, ààbɛ tɔ syaab. Mɛ nalelyo ɛ́, tɔ mendjaa mɛ mendjaala mɛ eYuda nɛ tɔ kok Ndjaa-ebuwa, é edi bot ɛ mbyak eYuda djas nadidi é sesɛɛga ɔ. Ye tok nɛ tɛp mɛ nalii tɔ syaab. 21 Étɛp yé wɔ di edji mɛ yenek mɛdjin? Djia bot ɛ nadi egwak mɛ ɔ etɛp ee mɛ nadi elelɛɛ bɛ ɛ. Bɔɔ, bɛ nɛ gu ɛnyɔɛpe sa mɛ nadi elɛɛ bɛ ɛ.»

22 Dáa Yezu nabɔɔza deenek ɛ́, wɔ gwaa, mot ngɔt tɔ bɛmbaalel ɛ kok Ndjaa-ebuwa nadi tin ɔ zokazɛnyuu nyɛ bɛɛz. Nyɛy nɛ Yezu náá: «Bɛ lii nɛ boo ghaa-Zɛɛb ɛ́ deenek é?» 23 Yezu eezɛbɔɔza nɛ nɛ náá: «Yɛ bɛ náá, mɛ eelii ɛbiyoɛpe ɔɔ, lyaala mɛ tɛp ɛbiyo ɛ tak. Yɛ kabɛ náá, mɛ eelii etsɛɛtsɛ ɔɔ, haaa wɔ kamyak mɛ etɛp yé?»

24 Tin, An eezɛkyeed Yezu pɛ daa Kayif boo ghaa-Zɛɛb, mɛmbɔ ekɔla.

Pyɛɛd eebaazɛswonal Yezu swonela sis

25 É ɛwala ɛlenek djas Simɔŋ Pyɛɛd nadi ɛ́ tin tɔ ɛbɛsɛɛ ɛ kok ndjaŋ ɛ boo ghaa-Zɛɛb é gɔɔl du. Wɔ gwaa, bɛ zɛdji nyɛ náá: «Dɔɔ nɛ wɔy pe, wɔ tok ngɔt tɔ bɛdjekel ɛ mot tak é?» É di’enek, Pyɛɛd eezɛswonal, nyɛy náá: «Ààbɛ! Mam ààgyee bis nɛ nɛ.» 26 Tin, mot ngɔt tɔ sama bot ɛ mɛsa ɛ boo ghaa-Zɛɛb, mot nadi ebyel nɛ mot Pyɛɛd natsaal ɛlɔ ɔ, nyɛ eezɛke nɛ Pyɛɛd náá: «Wɔ ke ɛ́ náá, mɛ bɛ mbembɛ ɛ́ ààbee wɔ tɔ bok é?» 27 Tin, Pyɛɛd eebaazɛswonal nyɛ swonela sis. Deenek, é di tak wat kuu eezɛkɔk.

Yezu sok bhwoob ɛ Pilat

28 Tin, bɛ eezɛdus nɛ Yezu pɛ daa Kayif, tɔ́ nɛ nɛ pɛ ndjaŋ ɛ kukuma mot kyee dik Lɔm. Ye nabɛ ɛ́ tɔ mɛlem kɛɛŋ. Tin, ekukuma eYuda nabɛ ɛ́ ààni yɔbɔ pɛ daa kukuma mot kyee dik Lɔm. Bɛ nasa deenek ɛ́ étɛp bɛ nadi ekaab náá, bɛ ɛzɛkɛbela edhuud, da bɛ di ààdɛ edee e ɛbyoŋ ɛ Pak. 29 Yɛ ɛ́ étɛp tak ɛ Pilat nazɛboma nɛ nɔɔ pɛ kel. Tin, nyɛ ɛ́ boozɛdji bɛ náá: «Lo mɛsɔ mɛ bi zɛpit mot tak ɛ yé?» 30 Tin, bɛ eezɛbɔɔza nɛ nɛ náá: «Nyɛ ɛpedi ɛ́, ààdi mbee mot ɔɔ, pe bis ààpazyɛ nɛ nɛ pɛ daa lɔ.» 31 Tin, wɔ gwaa Pilat zɛbɔɔza nɛ nɔɔ náá: «Yɛ bɛ deenek ɔɔ, nɔɔka nyɛ, da bi ɛ́ kɛpɛ́ɛ nyɛ dáa etsi bin di elɛɛ ɛ.» É di’enek, ekukuma eYuda eezɛbɔɔza náá: «Bisɔ eYuda, bis tok nɛ ghwyil ɛdjɛ mot epɛ́ɛ e ɛsyee.»

32 Ye nasael deenek ɛ́ etɛɛ náá, mɛkpa mɛ Yezu nalɛɛ dum nɛ kɔkɔ mbi ɛsyee ɛ nyɛ aagwyɛ ɛ, neebela ɛsuk. 33 Tin, Pilat eezɛni tɔ ndjaŋ’ɛ, bhii tak, nyɛ eezɛdjóo Yezu. Nyɛ eezɛdji nyɛ náá: «Wɔ ɛ́ mɛkoozi mɛ eYuda?» 34 Deenek, Yezu eezɛbɔɔza nɛ nɛ náá: «Yɛ ɛ́ esiiza bɔ met ɛ di eke náá, wɔ dji mɛ deenek ohoo, wɔ dji deenek ɛ́, etɛɛ náá, bot ɛ sis ɛlɛɛ wɔ deenek kɔ ɛsu ɛ lam?» 35 Tin, Pilat eezɛbɔɔza náá: «Wɔ bee mɛ ɛ́ mot mbyak eYuda? Bot ɛ mbyak’ɔ nɛ eboo bɛghaa-Zɛɛb ɛ́ zɛpit wɔ pɛ daa lam. Wɔ sa yé?» 36 É di’enek, Yezu eezɛbɔɔza nɛ nɛ náá: «Ɛyoŋ ɛ lam tok yii bɔs’ak. Ɛyɔŋ ɛ lam ɛpedi ɛ́ di yii bɔs’ak ɔɔ, pe bot ɛ di ebaal mɛ ɔ, ɛpelumla dɛɛb nɛ nen, ekaab náá, eYuda ɛzɛkɛmɛt mɛ, kɛka mɛ é mɛmbɔ mɛ ekukuma bɔɔ. Ààbɛ! Ye tok deenek, ɛyoŋ ɛ lam tok ɛyoŋ ɛ bɔs’ak.» 37 Tin, Pilat eebaazɛdji nyɛ náá: «Deenek, ye kwyɛl ɛlɛɛ ɛ́ náá, wɔ ɛ́ mɛkoozi?» É di’enek, Yezu eebaazɛbɔɔza náá: «Wɔy wɔ ɛmet eeke náá, mɛ ɛ́ mɛkoozi. Mɛ eezebyel, tin, mɛ nazyɛ kɔ bɔs ɛ́ etɛp mɛ neezɛbaŋa bot sa etsɛɛtsɛ di ɛ. Mot di emyaal etsɛɛtsɛ ɔ, nɛ gwak etɛp ee mɛ di elii ɛ.» 38 É di’enek Pilat eezɛdji náá: «Etsɛɛtsɛ kwyɛl ɛlɛɛ yé?»

Yezu eepɛ́ɛaa epɛ́ɛ e ɛsyee

Bhii Pilat nadji Yezu deenek ɛ́, nyɛ eebaazɛsik, kɛboma nɛ eYuda pɛ kel. Nyɛ eezɛke nɛ nɔɔ náá: «Mam ààbee lo mɛsɔ mɛ mɛ di egoka nɛ ɛpɛ́ɛ mot’ak epɛ́ɛ e ɛsyee dum nɛ tak ɛ.» 39 Tin, dáa bi di náá: «Bi nɛ gu dáa mena di ezyɛka nɛ ɛsesa sok, é mɛbyoŋ mɛ Pak djas ɛ, mɛ nɛ dyeebapel bin mot membok ngɔt. Bi kwyɛl ɛ́ náá, mɛ wyisal mɛkoozi mɛ eYuda?» 40 Bɛ eezɛbɔɔza nɛ Pilat nɛ etsim náá: «Hooo! Ààbɛ nyɛy! Bis kwyɛl ɛ́ náá, wɔ wyisal Bhaalabhas!» Ghuna Bhaalabhas nabɛ ɛ́ mot ɛzɛm nɛ ebhooba.