1 Dhiiti dwoo saba, Yezu nadi edhaa tɔ pyeeb mɛbhek mɛ di edjóoaa ble ɛ. Bɛdjekel bɛ nadi ebɔ́k mɛbhek nɛ ɛdjas yɛ tɔ mɛmbɔ mɔɔ, bhii tak, bɛ eezɛdɛ bhum tak. 2 Bɛdhiiti eFalizyɛ ɛ́ boozɛke nɛ Yezu náá: «Étɛp yé bi di esa sa etsi di elyak dwoo saba ɛ?» 3 Yezu eezɛbɔɔza nɛ nɔɔ náá: «Bi dinaa ààpalaa dáa Dhavid nasa é sok za nasa bɛ nɛ bot bɛ ɛ? 4 Bɛ naani tɔ pɛt ɛbhɛŋ ɛ Zɛɛb, nyɛy zokanɔɔ emapa ee nakaŋaa Zɛɛb ɛ, dɛ, nɔɔ yak pak, djɛ bot ɛ nadi egyee bɛ nɛ nɛ ɔ. Dhi bɔɔ eezogu ɛnyɔɛpe náá, etsi lɛɛ ɛ́ náá, bot di egoka nɛ ɛdɛ emapa binek ɛ, yɛ ɛ́ bɔɔ bɛmet bɛghaa-Zɛɛb.» 5 Yezu zokabaazɛke nɛ nɔɔ náá: «Sɛɛŋɛlɛ Mɔn Mot ɛ́ di kukuma dwoo saba.»

6 Dhiiti dwoo saba, Yezu eezɛni tɔ ndjaa mendjaala mɛ eYuda, nyɛ moo tin elyo bot Mɛkpa ɛ Zɛɛb. Tɔ tak nadi ɛ́ nɛ dhiiti mot ngɔt nɛ mbɔ eghɛŋ sɔɔbela. 7 EFalizyɛ nɛ bɛghaŋ ɛ mɛkana mɛ etsi moo tinaak dhuuu nɛ mis é nyel ɛ Yezu é gwyák nɛghu nyɛ waatsik nyɛ dwoo saba, étɛp ɛbela lo mɛsɔ mɛ bɛ aapit nyɛ ɛ. 8 Tin, Yezu nadi egu egeka e ebhum e elyem bɔɔ. Nyɛ eezɛke nɛ mot na sɔɔbela mbɔ náá: «Wyɛla! Tyaŋa tetel tin kuku ɛbwak.» Wɔ gwaa, mot’enɔk eezɛwyɛl, nyɛ eezɛtyaa tetel. 9 Nyɛ eezɛdji ɛdhuu ɛ bot ɛ́ nadi tin ɔ náá: «Tɔ etsi, ɛyé di egoka nɛ ɛsael dwoo saba, enɛm esa ohoo, embee esesɛɛ? Ɛtsik ɛ mot ohoo, nɛghu ɛbet náá, nyɛ gwyɛ?» 10 Yezu eebulal mis gwyák bɛ, bhii tak, nyɛ eezɛke nɛ mot tak náá: «Sɛɛba mbɔ’ɔ.» Nyɛ eezɛsɛɛb mbɔ’ɛ, yɛ eezɛsekel, bula ɛnyɔɛpe. 11 Wɔ gwaa, bɛghaŋ ɛ mɛkana mɛ etsi nɛ eFalizyɛ zokazɛkpaa lyem ɛlyelɛpe, bɛ moo tinaak esɔs pak’ɔɔ, edjek tyee bɛ aasa kɔ ɛsu ɛ Yezu ɛ.

12 É ghɛŋ tak, Yezu naazɛbyet kɔ ɛtsok étɛp ɛkɛdjaala Zɛɛb. Nyɛ naadjaala Zɛɛb tu pum tak djas. 13 Dáa mɛlem nakalem ɛ, nyɛ eezɛdjóo bɛdjekel bɛ. Bhii tak, nyɛ eezɛsɛ́ɛ tɔ sama yɔɔ bot kam nɛ bɛbá, nyɛ nadjɛ bɛ din ɛ «bot ɛ lwoma» ɔ. 14 Min mɔɔ nabɛ ɛ́: Simɔŋ Yezu naget Pyɛɛd ɔ, nɛ dhyeeb Andele, Zak nɛ Zaŋ, Filip, Bhaatelemi, 15 Matye, Toma, Zak mɔɔ Alfe, zɛnɔɔ Simɔŋ, mot di tɔ ɛdhuu ɛ bot ɛ nadi djóoaa eZɛlɔt ɔ*, 16 zɛnɔɔ Zuud mɔn ɛ Zak, bɛ nɛ Yudas Iskaliɔt, mot aaka nyɛ ɔ.

17 Yezu eezɛwyeed ɛtsok bɛ nɛ bɛnɔɔ. Nyɛ eezɛtyaa é di na sɛbɛtɛɛ, é di bɛdhiiti bɛdjekel ɛbuɛpe nadi ɔ. É di tak, ye nabaabɛ ɛ́ nɛ zukamwaa nɛ mot. Bot ɛ tak naadudus ɛ́ pɛ kyee dik Yude nɛ Yeluzalɛm, kɔ eghaada di é ngwoob boo dii mɛsɔn ɛ, pɛ Tiid nɛ Sidɔn. 18 Bɛ nazyɛzɛgwak embɛɛ mɛlyo mɛ Zɛɛb, dɔɔ nɛ ɛzɛsaa tsik. Bot ɛ embee esisim nadi edhedhek ɔ, nabɛ ɛ́, bɛ naabela yɔbɔ tsik. 19 Bot nadi esuu ɛ́, bɛ mɛt nyɛ bɔɔ bɛmet, etɛɛ náá, dhiiti kwaambi mɛbwala nadi ewyis tɔ lɛ, é tsetsik bɔɔ djas.

20 Yezu eezɛgwyák bɛdjekel bɛ, nyɛy nɛ nɔɔ náá:

«Mɛnyɔ nɛ biyɔ bɛdjel ɛ bot,

etɛɛ náá, Ɛyoŋ ɛ Zɛɛb ɛ́ yebɔ.

21 Mɛnyɔ nɛ biyɔ bot ɛ di nɛ za nenak ɔ,

etɛɛ náá, bi ɛ́ waadɛ, djil.

Mɛnyɔ nɛ biyɔ bot ɛ di edje nenak ɔ,

etɛɛ náá, bi ɛ́ waagɔ.

22 Mɛnyɔ nɛ biyɔ, bot ɛ di ebhina bin ɔɔ,

bɛ sɔ bin ɔɔ,

bɛ lee bin ɔɔ,

nɛ saab ɛ dék ɛ len kɔ ɛsu ɛ Sɛɛŋɛlɛ Mɔn Mot ɔɔ.

23 É dwoo tak, myaalka, da bi ɛ́ bɔl zɛŋ, etɛɛ náá, boo etuud bin ɛ́ nɛɛga pɛ tɔ gwoo. Bɛbhaab bɔɔ nasesa ɛ́ deenek nɛ bɛngoolel ɛ Mɛkpa ɛ Zɛɛb.

24 Haaa kpaa-ghoŋ nɛ biyɔ, bɛkum ɛ bot,

etɛɛ náá, bi nazebela yebɔ enɛm nɛ embɛɛ.

25 Kpaa-ghoŋ nɛ biyɔ, bot ɛ zedɛ, djil nenak ɔ,

etɛɛ náá, bi aadi ɛ́ nɛ za.

Haaa kpaa-ghoŋ nɛ biyɔ, bot ɛ di egɔ nenak ɔ,

etɛɛ náá, bi aadi ɛ́ dje.

26 Haaa kpaa-ghoŋ nɛ biyɔ, yɛ bɛ náá, bot djas ɛpeduwal bin ɔɔ. Yɛ ɛ́ deenek ɛ́ bɛbhaab bɔɔ nadi eduwal bɛngoolel ɛ Mɛkpa ɛ Zɛɛb yii mɛkɔŋ.»

27 «Yɛ bɛ biyɔ, bot ɛ di egwak mɛ ɔɔ, mɛ lɛɛ bin ɛ́ náá, kwyɛlka bot ɛ mɛbhuka men. Saka enɛm esa nɛ bot ɛ́ di ebhina bin ɔ. 28 Sɛɛka bot ɛ di ekal bin ɔ, mɛtel. Da bi ɛ́ baadjaala Zɛɛb étɛp bot ɛ́ di esa bin ɛbiyo ɔ. 29 Yɛ bɛ náá, mot eenyuu wɔ bɛɛz é ɛmuk ɔɔ, baadjɛ yak kyee ɛmuk. Mot ɛ nɔɔ wɔ ndjookuwa ɔɔ, beta nyɛ baanɔɔ dɔɔ nɛ kuwa yɔ. 30 Gwyena nɛ mot nɛ mot di ewaab wɔ sonok ɔ. Yɛ bɛ náá, mot eenɔɔ sa yɔ ɔɔ, sa wɔ ààkabaakɛdu. 31 Saka nɛ bot tyee bi di ekwyɛl náá, bɛ sa nɛ nen ɛ.

32 Yɛ bɛ náá, biyɔ zokwyɛl ɛ́ bot ɛ di ekwyɛl bin ɔɔ, étɛp yé bi di ebun náá, bi djɛaa bhɔɔ? Dɔɔ nɛ bot ɛ mesyem zobaakwyɛl ɛ́, bot ɛ di ekwyɛl bɛ ɔ. 33 Yɛ bɛ náá, biyɔ zosa enɛm esa ɛ, nɛ bot ɛ di esa bin enɛm esa ɔɔ, étɛp yé bi di ebun náá, bi djɛaa bhɔɔ? Dɔɔ nɛ bot ɛ mesyem baasaa deenek. 34 Yɛ bɛ náá, bi zokola esonok ɛ nɛ bot ɛ bi di ebwaal náá, bɛ waabulal bin yɛ ɔɔ, étɛp yé bi di ebun náá, bi djɛaa bhɔɔ? Dɔɔ nɛ bot ɛ mesyem baadjɛel pak’ɔɔ ɛ fulu ɛkola, etɛɛ náá, bɛ neebulela yɛ. 35 Yɛ bɛ biyɔ ɔɔ, ye goka ɛ́, bi kwyɛl bot ɛ mɛbhuka men. Saka bɛ enɛm esa. Gwyenaka nɛ bot esa bin, ààbwaal náá, bɛ waabaabulal bin yɛ ɛ. Deenek Zɛɛb ɛ́ waadjɛ bin boo etuud. Bhii tak, bi ɛ́ waadjóoaa bɔn ɛ Zɛɛb Mɛkaake, etɛɛ náá, nyɛ ɛ́ Zɛɛb mɛnyɔ nɛ bot ɛ lwalɛŋ, zɛɛga nɛ bɛmbee ɛ bot. 36 Gekeka bot ghoŋ, dáa Sɛɛg’en di egék bin ghoŋ ɛ.»

37 «Sa bi ààdidi epɛ́ɛ bot, deenek Zɛɛb aanàkwaapɛ́ɛ bin. Sa bi ààdidi ekwyesal bot ndjɛ sɔs, deenek Zɛɛb aanàkwaakwyesal bin ndjɛ sɔs. Pelka bot ɛbiyo ɛ bɛ di esa bin ɛ, deenek Zɛɛb ɛ́ waapel bin. 38 Gwyenaka nɛ bot. Deenek Zɛɛb ɛ́ waadjɛ bin ɛbuɛpe, lwoodal. Zɛɛb ɛ́ waaso tɔ boo bhwaŋ’en bɛtɛ nɛ bhum, nyɔmelaa, dital-dital, tɔɔɔ see. Hɛɛɛ! Zɛɛb bee ɛ́ dáa bi di elwoodal bhwaa bɛsɔ bin ɛ. Yɛ ɛ́ deenek ɛ́ nyɛ aalwoodal yebɔ bhwaa.»

39 Tin, Yezu eebaazɛlii nɛ nɔɔ pɛ tɔ kana náá: «Mot edhim tok nɛ ghwyil ɛdul sɔ mot edhim étɛp ɛlyaal ɛ́ nyɛ ze, ààbɛ deenek é? Bɛ ɛ sa deenek ɔɔ, bɔɔ djas bɛbá ɛ́ waakɛdjoola tɔ guk. 40 Ye tok nɛ djekel ngɔt di edhaa mot di elyo nyɛ ɔ. Tin, yɛ bɛ náá, djekel di edjek mɛsa ɔɔ, nyɛ eezedjek ɛnyɔɛpe ɔ, nyɛ aakaswaala ɛ́, nyɛ moo dáa sɛɛg mɛsa mɛ. 41 Étɛp yé wɔ gwyák kwyɛɛzyoŋ di tɔ dis ɛ mɔn-nyoog, wɔ kadi ɛ́, ààbee pɛk le di tɔ dis ɛ lɔ ɛ? 42 Wɔ aanàkwaake nɛ sɔ’ɔ mot náá: "Mɔn-nyaagam, beta, mɛ dis mɔɔ kwyɛɛzyoŋ tɔ dis ɛ lɔ," dhi wɔy di ààbee pɛk le di tɔ yɔ dis ɛ! Wɔy mot mɛdjhaaz pɛ ɛko, bhimis pɛ si, pookodis sok pɛk le tɔ dis ɛ lɔ! Bhii tak ɛ́ wɔ aanyaa sok, étɛp wɔ needis kwyɛɛzyoŋ di tɔ dis ɛ mɔn-nyoog ɛ.»

43 «Mbɛɛ le ààbya mbee bhum. Tyee wat nɛ mbee le, yɛ aanàkwaabya mbɛɛ bhum. 44 Le djas gwyakaa ɛ́, nɛ ebhum nyɛ di edjɛ ɛ. Bhum efiigh ààbɔ́kaa kɔ le mɛgɔk. Baadi náá, bhum di saaa mɛnyok mɛ vin nɛ yɛ ɛ́, yɛ ààbɔ́kaa tɔ engwyinini. 45 Mbɛɛ mot dyeebawyisal ɛ́ embɛɛ etɛp di edus tɔ di ɛkwom ɛ di tɔ lyem’ɛ ɛ, kadi ɛ́ náá, mbee mot dyeebawyisal ɛ́ embee etɛp mɛbiyo mɛ di tɔ mbee lyem’ɛ ɛ. Etɛɛ náá, mɛkpa mɛ mot dyeebawyisal tɔ nuub’ɛ ɛ, yɛ ɛ́ mɛkpa mɛ zelwood tɔ lyem’ɛ ɛ.»

46 «Étɛp yé bi di edjóo mɛ "Ghɛŋ, Ghɛŋ", da bi kadi ɛ́, ààsa dáa mɛ ke ɛ? 47 Mɛ pookolyaal bin mbi mot zyɛ pɛ daa lam é gwak mɛkpa mam, da nyɛ ɛ́ kɛ tyee tak ɔ, di egoka nɛ ɛdi ɛ: 48 nyɛ ɛ́ dáa mot nadi eesum ndjaa, nyɛ ɛ́ zɛben epap e tak, zɛpu bɔs ɛdimɛpe, tuula kɔ bat ɛkok ɔ. Nyɛ nakawyɛl epap ɛ́ kɔ tak, tyee bhyoŋ nakatuula ɛ, ɛbhyeeb ɛ mɛdii mɛ tak naanyuŋa é ndjaŋ’enek, ààbik, etɛɛ náá, ndjaa naasumel ɛ ɛnyɔɛpe. 49 Deenek, mot maa-ɛlɔ di egwak mɛkpa mam, nyɛ kadi ɛ́, ààkɛ tyee tak ɔ, nyɛ ɛ́ dáa mot nasum ndjaŋ’ɛ kɔ bɔs, ààpu ɛdimɛpe, ààbɛ nɛ ghus epap. Tyee bhyoŋ nakatuula ɛ, ndjaŋ’enek eezɛbik é di tak wat syɛɛɛ.»